Fiɛɛmi Kɛ Ní Tsɔɔmi He Hia Wawɛɛ Ngɛ Kaseli Peemi Ní Tsumi ɔ Mi

Yesu fã e se nyɛɛli kaa a ya nɛ a ya pee nihi kaseli. (Mat 28:19) Enɛ ɔ biɔ fiɛɛmi kɛ ní tsɔɔmi. Ngɛ be kɛ behi a mi ɔ, e sa nɛ wɔ tsuo wa bi wa he ke, ‘Mɛni blɔ nɔ ma gu kɛ ya ye hɛmi ngɛ kaseli peemi ní tsumi fã nɛ ɔmɛ nɛ a he hia wawɛɛ ɔ a mi?’

FIƐƐMI

E sa kaa wɔ mohu waa ya nɛ wa ya hla nihi nɛ a “sa” a, a se blɔ, pe nɛ wa maa mlɛ kaa a ba wa ngɔ. (Mat 10:11) Ke wa ngɛ fiɛɛmi tso mi ɔ, anɛ wa ngɔɔ he blɔ ɔ kɛ fiɛɛ kɛ haa ‘nihi nɛ’ waa kɛ mɛ kpeɔ ɔ lo? (Nít 17:17) Kã nɛ bɔfo Paulo kɛ fiɛɛ ɔ ha nɛ yo ko nɛ tsɛɛ lɛ ke Lidia ba pee kaselɔ.​—Nít 16:13-15.

NYƐƐ HYƐ VIDEO NƐ JI YAA NƆ NƐ O FIƐƐ ‘NƐ O KO KPA’​—BE MI NƐ O BE FIƐƐMI TSO MI KƐ NGƐ WE FƐƐ WE MI, LƆ Ɔ SE Ɔ, NYƐ HA SANE BIMIHI NƐ NYƐƐ SE Ɔ A HETO:

• Mɛni tsɔɔ kaa be tsua be ɔ Samuel hlaa blɔhi a nɔ nɛ e maa gu kɛ fiɛɛ anɔkuale ɔ?

• Mɛni he je nɛ e sa kaa waa ngɔ blɔ slɔɔtohi nɛ a guɔ nɔ kɛ fiɛɛɔ kɛ tsu ní ɔ?

• Ke o ngɛ níhi nɛ o peeɔ daa ligbi ɔ a he ní tsue ɔ, mɛnɔmɛ nɛ o ma nyɛ maa fiɛɛ Matsɛ Yemi sɛ gbi ɔ kɛ ha?

NÍ TSƆƆMI

Kaseli peemi bi ɔ babauu pe womi kɛkɛ nɛ wa kɛ ma ha nihi. Bɔ nɛ pee nɛ wa ye bua mɛ ngɛ Mawu jami mi ɔ, e sa nɛ waa kpale ya slaa mɛ nɛ waa kɛ mɛ nɛ je Baiblo mi ní kasemi sisi. (1Ko 3:6-9) Se kɛ̃ ɔ, ke wa ngɛ mɔde bɔe kaa wa maa tsɔɔ nɔ ko matsɛ yemi ɔ he anɔkuale ɔ, nɛ e wui yiblii hu nɛɛ? (Mat 13:19-22) E sa nɛ wa ya nɔ nɛ wa hla nihi nɛ a tsui ngɛ kaa “zugba kpakpa” a se blɔ.​—Mat 13:23; Nít 13:48.

NYƐƐ HYƐ VIDEO NƐ JI YAA NƆ NƐ O FIƐƐ ‘NƐ O KO KPA’​—NGƐ MA NƆ KƐ PEE NIHI KASELI, LƆ SE Ɔ, NYƐ HA SANE BIMIHI NƐ NYƐƐ SE Ɔ A HETO:

• Ngɛ mɛni blɔ nɔ nɛ Solomon kɛ Mary pue anɔkuale wuhi nɛ a du kɛ wo Ezekiel kɛ Abigail a tsui mi ɔ nɔ nyu?

• Kɛ piɛɛ ma nɔ odase yemi he ɔ, mɛni ji oti nɛ e sa kaa wa kɛ ma wa hɛ mi ngɛ wa fiɛɛmi ní tsumi ɔ fã slɔɔto ɔmɛ tsuo a mi?

• Mɛni wa maa pee kɛ ya wa hɛ mi ngɛ anɔkuale ɔ nɛ wa ngɛ nihi tsɔɔe ɔ mi?