Ba Pee Ye Se Nyɛɛlɔ​—Mɛni E Sa Kaa O Pee?

9:62

Loko ngmɔ hulɔ ko ma nyɛ ma dla ngmɔ nɔ saminya konɛ e ko kpɛ̃, nɛ e ko pee gɔdɔgɔdɔ ɔ, e sɛ nɛ e ha nɛ nɔ́ ko nɛ gbla e juɛmi nɛ e hyɛ e se. Jã kɛ̃ nɛ e sɛ nɛ Kristofo no ko haa nɛ níhi nɛ e si ngɛ je ɔ mi ɔ nɛ gbla e juɛmi.​—Flp 3:13.

Ke waa kɛ haomihi ngɛ kpee ɔ, e wɛ kulaa kaa wa hɛ ma ja ngɛ wa sa si himi nɛ eko ɔ, wa naa lɛ kaa níhi a mi hi ha wɔ loko wa ba asafo ɔ mi ɔ he. Behi fuu ke e ba lɛ jã a, wa ngɔɔ wa hɛ kɛ maa bua jɔmi nɛ wa ná be ko nɛ be ɔmɛ a nɔ pe nyagbahi nɛ waa kɛ kpe ɔ. Jã pɛpɛɛpɛ nɛ benɛ Israel bi ɔmɛ je Ijipt ɔ a pee. (4Mo 11:5, 6) Ke wa hɛɛ jamɛ a susumi ɔ mi ɔ, e ma nyɛ maa pee ka kɛ ha wɔ, nɛ wa maa kpale kɛ ya di níhi nɛ wa si ngɛ se ɔmɛ a se ekohu. E maa hi wawɛɛ kaa wa maa susu jɔɔmihi nɛ wa ngɛ nae amlɔ nɛ ɔmɛ a he, nɛ́ waa ngɔ wa juɛmi kɛ ma bua jɔmihi nɛ wa ma ná hwɔɔ se ngɛ Matsɛ Yemi ɔ sisi ɔmɛ a nɔ.​—2Ko 4:16-18.