Nihewi Kɛ Yihewi​—Nyɛ ‘Hɛ Nɛ Dɔ Ngɛ Ní Tsumi Kpakpahi A He’

Bɔfo Paulo tsɔɔ ngɛ sɛ womi nɛ e ngma kɛ ya ha Tito ɔ mi kaa, e sa nɛ lɛ Tito kɛ nihewi ɔmɛ nɛ a bɔ mɔde nɛ a hi “nɔ hyɛmi nɔ́ pee ngɛ ní tsumi kpakpahi a mi ngɛ blɔ fɛɛ blɔ nɔ.” (Tit 2:6, 7) Ngɛ jamɛ a sɛ womi ɔ nɔuu mi ɔ, Paulo tsɔɔ kaa a maa tsu Yehowa we bi a he bɔ nɛ pee nɛ a ‘hɛ nɛ dɔ ngɛ ní tsumi kpakpahi a he.’ (Tit 2:14) Ní tsumi kpakpa nɛ ɔmɛ a kpɛti kake ji kaa a fiɛɛ, nɛ́ a tsɔɔ nihi Mawu Matsɛ Yemi ɔ he ní. Ke o ji niheyo aloo yiheyo ɔ, anɛ o ma nyɛ maa ngɔ he wami nɛ o ngɛ ɔ kɛ sɔmɔ kaa blɔ gbali a walɔ loo daa blɔ gbalɔ lo?​—Abɛ 20:29.

Ke o suɔ nɛ o sɔmɔ kaa blɔ gbalɔ ɔ, bɔɔ mɔde nɛ o to níhi a he blɔ nya saminya konɛ o nyɛ nɛ o je sisi. (Luk 14:28-30) Kaa nɔ hyɛmi nɔ́ ɔ, ke o kɛ o he wo be tsuo sɔmɔmi ní tsumi ɔ mi ɔ, kɛ o ma plɛ kɛ hyɛ o he ha kɛɛ? Kɛ o ma plɛ kɛ su ngmlɛfia nɛ a hlaa ngɛ blɔ gbali a dɛ ɔ he ha kɛɛ? Moo sɔle ha Yehowa konɛ e ye bua mo. (La 37:5) O kɛ o fɔli kɛ blɔ gbali nɛ a ngɛ níhi a si kpami ɔ nɛ susu blɔ nya nɛ o to ɔ he. Lɔ ɔ se ɔ, bɔɔ mɔde nɛ o tsu oti nɛ o kɛ ma o hɛ mi ɔ he ní. Yehowa maa jɔɔ kã kɛ mɔde nɛ o ngɛ bɔe ngɛ e sɔmɔmi mi ɔ nɔ!

NYƐƐ HYƐ VIDEO NƐ JI NIHEWI KƐ YIHEWI NƐ A NGƐ YEHOWA HƐ MI NYAMI WOE, LƆ Ɔ SE Ɔ, NYƐ HA SANE BIMIHI NƐ NYƐƐ SE NƐ ƆMƐ A HETO:

• Mɛni nyagbahi nɛ ni komɛ tsu he ní konɛ a nyɛ nɛ a sɔmɔ kaa blɔ gbali, nɛ mɛni blɔ nɔ a gu kɛ pee jã?

• Mɛni blɔ nɔ fɔli ma nyɛ maa gu kɛ ye bua a bimɛ konɛ a sɔmɔ kaa daa blɔ gbali?

• Mɛni he je nɛ e he hia kaa waa to blɔ nya kɛ ha fiɛɛmi yami ɔ?

• Mɛni nɛ nihi nɛ a ngɛ asafo ɔ mi ɔ ma nyɛ maa pee kɛ wo blɔ gbalɔ ko he wami nɛ a ye bua lɛ?

• Mɛni jɔɔmihi nɛ nihi nɛ a sɔmɔɔ kaa blɔ gbali ɔ náa?