Yehowa Suɔ Nihi Nɛ A He Tsɔ

“Fɔ o dɛ. Dla o tsu ɔ mi. Bɛɛ kpo ɔ nɔ. Mwɔɔ dwɔmi ɔ.” Fɔli babauu tsɔɔ a bimɛ bɔ nɛ e sa kaa a nɔmlɔ tso ɔ kɛ hehi nɛ a ngɛ ɔ he nɛ tsɔ ha. Se ngɛ anɔkuale mi ɔ, sisi tomi mlaahi nɛ kɔɔ he tsɔmi he ɔ je Mawu nɛ ngɛ klɔuklɔu ɔ ngɔ. (2Mo 30:18-20; 5Mo 23:14; 2Ko 7:1) Wa buɔ Yehowa tue ke wa ha nɛ wa nɔmlɔ tso ɔ kɛ wa níhi a he tsɔ. (1Pe 1:14-16) Wa we ɔ mi kɛ wa kpɔ ɔ mi hu nɛɛ? Nihi ngmɛɛɔ dwɔmihi a he kɛ pueɔ si ngɛ he fɛɛ he nɛ a suɔ, se Kristofohi lɛɛ a bɔɔ mɔde kaa a ma ha nɛ a we nɛ ji zugba a nɔ he nɛ tsɔ. (La 115:16; Kpj 11:18) Hehi nɛ wa ngmɛɛɔ ní nyafinyafihi kaa tɔfi totohi, hlɔba, chewing gum, loo tɔhi a he kɛ fɔɔ ma nyɛ maa tsɔɔ bɔ nɛ wa naa he tsɔmi ha. Ngɛ nɔ́ fɛɛ nɔ́ mi ɔ, wa suɔ nɛ wa ní peepee nɛ ‘je wɔ nitsɛmɛ wa yi kaa Mawu sɔmɔli.’—2Ko 6:3, 4.

NYƐƐ HYƐ VIDEO NƐ JI MAWU SUƆ NIHI NƐ A HE TSƆ, LƆ Ɔ SE Ɔ, NYƐ HA SANE BIMIHI NƐ NYƐƐ SE NƐ ƆMƐ A HETO:

• Mɛni nɛ ni komɛ nɛ a ha we nɛ a níhi a he nɛ tsɔ ɔ kɛ pɔɔ a nya jemi?

• Ngɛ mɛni blɔ nɔ nɛ Mose Mlaa a haa nɛ wa naa Yehowa juɛmi ngɛ he tsɔmi he?

• Mɛni blɔ nɔ nɛ wa ma nyɛ maa gu kɛ wo Yehowa hɛ mi nyami be mi nɛ wa tu we munyu po?