Zugba a “Mii Pa a”

Ngɛ yi nɔ sanehi fuu a mi ɔ, ma nɔ yeli ye bua Yehowa sɔmɔli wawɛɛ. (Ezra 6:1-12; Est 8:10-13) Mwɔnɛ ɔ po ɔ, wa na bɔ nɛ “zugba a,” nɛ ji nihi nɛ a ngɛ je nɛ ɔ mi nɛ a nuɔ nɔ́ sisi ɔ mii si temi kɛ womi nɛ ngɛ kaa “pa a” nɛ Satan Abosiami nɛ ji “drako ɔ” kɛ baa Mawu sɔmɔli a nɔ ɔ ha. (Kpj 12:16) Be komɛ ɔ, Yehowa nɛ e ji “Mawu nɛ heɔ nɔ yi wami” ɔ haa nɛ ma nɔ yeli yeɔ bua e we bi.​—La 68:20; Abɛ 21:1.

Se ke a wo mo tsu ngɛ o hemi kɛ yemi ɔ he je hu nɛɛ? Mo ná nɔ mi mami kaa Yehowa maa ye bua mo. (1Mo 39:21-23; La 105:17-20) Mo ná nɔ mi mami kaa Yehowa maa jɔɔ mo ngɛ o hemi kɛ yemi ɔ he, nɛ anɔkuale nɛ o maa ye ɔ maa wo o nyɛmimɛ ngɛ je kɛ wɛ ɔ he wami.​—Flp 1:12-14; Kpj 2:10.

NYƐƐ HYƐ VIDEO NƐ JI A JE NYƐMIMƐ NYUMUHI NƐ A WO MƐ TSU NGƐ KOREA A, LƆ Ɔ SE Ɔ, NYƐ HA SANE BIMIHI NƐ NYƐƐ SE NƐ ƆMƐ A HETO:

• Mɛni he je nɛ a wo wa nyɛmimɛ nyumuhi akpehi abɔ tsu ngɛ South Korea jehahi babauu ji nɛ ɔ?

• Mɛni sanehi nɛ́ a ye ngɛ kojomi he ɔ lɛ ha nɛ a je wa nyɛmimɛ ɔmɛ ekomɛ nɛ a wo mɛ tsu ɔ?

• Kɛ wa ma plɛ kɛ ye bua wa nyɛmimɛ ngɛ je kɛ wɛ nɛ loloolo ɔ, a wo mɛ tsu ngɛ a hemi kɛ yemi ɔ he je ɔ ha kɛɛ?

• Kɛ e sa kaa waa ngɔ he yemi nɛ wa ngɛ amlɔ nɛ ɔ kɛ tsu ní ha kɛɛ?

• Mɛnɔ tutuutu lɛ haa nɛ wa yeɔ kunimi ngɛ kojomi hehi ɔ?