Mɛni He Je Nɛ Yehowa Odasefohi Yaa Nihi Nɛ A Ngɛ Jami Ko Mi Momo ɔ A Ngɔ ɔ?

Wa na kaa nihi nɛ ngɛ jami ko mi momo ɔ a kpɛti nihi babauu suɔ nɛ a kɛ mɛ nɛ susu Baiblo ɔ mi munyu ɔmɛ a he. Ngɛ anɔkuale mi ɔ, wa kplɛɛ nɔ kaa nɔ tsuaa nɔ ngɛ he blɔ nɛ e hlaa jami nɛ e suɔ, lɔ ɔ he ɔ, wa nyɛ we nihi a nɔ kaa a bu wa sɛ gbi ɔ tue.

Ke waa kɛ nihi ngɛ jami he munyu tue ɔ, wa bɔɔ mɔde nɛ waa kɛ Baiblo ɔ ga womi kaa wa je ‘mi mi jɔmi’ kɛ ‘bu’ kpo kɛ tsɔɔ nihi ɔ tsuɔ ní. (1 Petro 3:15) Wa le kaa ni komɛ a bua jɔɛ sɛ gbi nɛ wa ngɛ fiɛɛe ɔ he. (Mateo 10:14) Se kɛ̃ ɔ, wa be nyɛe maa le bɔ nɛ nihi maa pee a ní ha ngɛ sɛ gbi ɔ he, ja waa kɛ mɛ tu munyu. Wa le hu kaa nihi a si himi tsakeɔ.

Kaa nɔ hyɛmi nɔ́ ɔ, eko ɔ, nɔ ko be deka náe kulaa nɛ e kɛ wɔ maa sɛɛ ní, se e maa suɔ nɛ e kɛ wɔ nɛ sɛɛ ní be kpa. Nɛ ni komɛ hu ngɛ nɛ eko ɔ, a kɛ nyagbahi ngɛ kpee loo a ya je si fɔfɔɛ ko mi nɛ ma ha nɛ a maa suɔ nɛ a kɛ wɔ nɛ susu Baiblo ɔ sɛ gbi ɔ he. Lɔ ɔ he ɔ, wa bɔɔ mɔde kaa waa kɛ nihi maa sɛɛ ní si abɔ.