Mɛnɔ Lɛ To Yehowa Odasefohi A Jami ɔ Sisi?

Yehowa Odasefohi asafo nɛ ngɛ mwɔnɛ ɔ je sisi ngɛ jeha 1800 jeha amɛ a nyagbe. Ngɛ jamɛ a be ɔ mi ɔ, Baiblo kaseli bɔɔ ko nɛ a ngɛ Pittsburgh ngɛ Pennsylvania nɛ ngɛ United States ɔ bɔni Baiblo ɔ kasemi fitsofitso. A ngɔ níhi nɛ sɔlemi ɔmɛ tsɔɔ ɔ kɛ to níhi nɛ Baiblo ɔ tsɔɔ tutuutu ɔ he. A ngma níhi nɛ a kase ɔ kɛ wo womihi, kɛ adafi fiami womihi a mi, kɛ womi tɛtlɛɛ nɛ amlɔ nɛ ɔ, a tsɛɛ ke Hwɔɔmi Mɔ​—E Ngɛ Yehowa Matsɛ Yemi ɔ He Gɔgɔ Fiae ɔ mi.

A tsɛɛ Baiblo Kaseli anɔkualetsɛmɛ nɛ ɔmɛ a kpɛti nɔ kake ke Charles Taze Russell. E ngɛ mi kaa Russell nyɛɛ Baiblo tsɔsemi ní tsumi ɔ hɛ mi ngɛ jamɛ a be ɔ mi, nɛ e ji kekleekle nɔ nɛ hyɛ Hwɔɔmi Mɔ ɔ ngmami nɔ mohu lɛɛ, se pi kaa e to jami ehe ko sisi. Jamɛ a be ɔ mi ɔ, a tsɛɛ mɛ ke Baiblo Kaseli. Oti nɛ Russell kɛ nihi nɛ a piɛɛ e he ɔ kɛ ma a hɛ mi ji kaa a maa ye bua nihi konɛ a le Yesu Kristo tsɔɔmi ɔmɛ. Jehanɛ hu, a suɔ nɛ a nyɛɛ nɔ hyɛmi níhi nɛ kekle Kristofo ɔmɛ pee ɔ se. Akɛnɛ Yesu ji nɔ nɛ to Kristofohi a jami ɔ sisi he je ɔ, wa naa Yesu kaa lɛ ji nɔ nɛ to wa asafo ɔ sisi.​—Kolose Bi 1:18-20.