Baiblo ɔ Ji Womi Nɛ Gbami Nɛ Ngɛ Mi ɔ Da, Fã 1

[Daka]

ABRAHAM JI NƆ KO NƐ E HI SI HYƐ

● A na tɛ tɛtlɛɛ ko nɛ a kɛ zu pee nɛ ye maa pee jeha 4000 nɛ a ngma ma komɛ a biɛ ngɛ nɔ. Biɛ nɛ ɔmɛ kɛ Abraham wekuli komɛ a biɛ ɔ sɔ. Ma nɛ ɔmɛ ji Peleg, Serug, Nahor, Tera, kɛ Haran.​—1 Mose 11:17-32.

● Ngɛ 1 Mose 11:31 ɔ, wa kane kaa Abraham kɛ e weku ɔ hia kɛ je “Kaldeabi ɔmɛ a ma nɛ ji Ur ɔ mi.” Ma nɛ ɔ pee ma doku ngɛ Iraq woyi je ngɛ puje he blɔ. Baiblo ɔ hu tsɔɔ kaa Abraham papaa nɛ ji Tera a gbo ngɛ Haran ma a mi. Eko ɔ, amlɔ nɛ ɔ, ma nɛ ɔ ngɛ Turkey. Abraham yo Sara hu gbo ngɛ ma nɛ ji Hebron ɔ mi. Ma nɛ ɔ ji ma ko nɛ e sɛ kɛ wawɛɛ ngɛ Middle East, nɛ loloolo ɔ nihi ngɛ lejɛ ɔ.​—1 Mose 11:32; 23:2.