O fɔli tue nɛ o maa bu ɔ ngɛ kaa hiɔ ko nɛ o ngɛ woe. Ke o nyɛɔ nɛ o woɔ mɛ hiɔ nɛ ɔ, jã nɔuu kɛ̃ nɛ mɛ hu a ma ha mo he yemi fuu
KƐ HA NIHEWI KƐ YIHEWI
10 Ha Nɛ A He Moo Ye
NƆ́ NƐ E TSƆƆ
Fɔli, huɛmɛ, kɛ nitsumitsɛmɛ ngɔɔ a hɛ kɛ fɔɔ nɔ ko nɛ a he lɛ ye ɔ nɔ. Nɔ ko kaa jãa yeɔ mlaahi a nɔ, e yeɔ e si womihi a nɔ, nɛ e tuɔ anɔkuale be fɛɛ be.
NƆ́ HE JE NƐ E HE HIA
Behi fuu ɔ, loko a ma ha mo he yemi fuu ɔ, e daa si ngɛ bɔ nɛ a he mo ye ha a nɔ.
“Blɔ nɛ hi pe kulaa nɔ nɛ o maa gu kɛ ha nɛ o fɔli nɛ a ná o mi hemi kɛ yemi ji nɛ o maa ngɔ o ní peepee kɛ tsɔɔ kaa o hɛ kã si. Pi be nɛ o ngɛ a kasa mi pɛ nɛ e biɔ nɛ o pee jã, se mohu ke o be a kasa mi po.”—Sarahi.
BAIBLO SISI TOMI MLAA: “Nyɛɛ ya nɔ nɛ nyɛɛ hi nyɛ mi kpae konɛ nyɛ kɛ tsɔɔ nimli nɛ nyɛ nitsɛmɛ nyɛ ji.”—2 Korinto Bi 13:5.
NƆ́ NƐ O MA NYƐ MAA PEE
Moo pee níhi nɛ nyɛɛ se nɛ ɔmɛ ke o suɔ nɛ a he moo ye, aloo o suɔ nɛ a kpale he moo ye akɛnɛ o pee nɔ́ ko kɛ puɛ hɛ kɛ nɔ fɔmi nɛ a ngɛ ngɛ o mi be ko nɛ e be ɔ he je.
Moo ye anɔkuale. Ke o yeɔ lakpa a, nihi be mo hee maa ye hu. Se ke o yeɔ anɔkuale nɛ o laa we o tɔmihi a nɔ ɔ, nihi ma he moo ye wawɛɛ.
“Ke níhi ngɛ nɔ yae saminya a, e yi kulaa kaa wa maa ye anɔkuale. Se ke o tu anɔkuale ngɛ nɔ́ yayami ko nɛ o pee ɔ mi ɔ, lɔ ɔ haa nɛ nihi heɔ mo yeɔ.”—Caiman.
BAIBLO SISI TOMI MLAA: “Wa suɔ kaa wa maa ba wa je mi ngɛ anɔkuale yemi mi ngɛ nɔ́ fɛɛ nɔ́ mi.”—Hebri Bi 13:18.
Ha nɛ a ná hɛ kɛ nɔ fɔmi ngɛ o mi. Benɛ a bi nihi nɛ a ngɔɔ nihi ngɛ ní tsumi mi ngɛ U.S. munyu ɔ, a kpɛti nihi lafa mi 78 tsɔɔ kaa hɛ kɛ nɔ fɔmi nɛ a ma ná ngɛ nɔ ko mi ɔ “piɛɛ níhi titli etɛ” nɛ a hlaa ngɛ nihi a he loko a haa mɛ ní tsumi ɔ he. Ke o haa nɛ a náa o mi hɛ kɛ nɔ fɔmi amlɔ nɛ ɔ, e maa ye bua mo ke o wa.
“Ye fɔli ɔmɛ náa ye mi hɛ kɛ nɔ fɔmi ke a yɔse kaa i tsuɔ ye we mi ní tsumihi nɛ́ pi nɛ a kaiɔ mi kpamisaa. Ke i yaa nɔ nɛ i peeɔ jã a, mɛ hu a heɔ mi yeɔ wawɛɛ.”—Sarah.
BAIBLO SISI TOMI MLAA: “I ngɛ nɔ mi mami kaa o maa pee jã, . . . ejakaa i le kaa o maa pee po pe nɔ́ nɛ i de ɔ.”—Filemon 21.
Moo to o tsui si. Ke nɔ ko ngɛ wae ngɛ nɔmlɔ tso mi ɔ, e yi kaa nihi ma yɔse, se e heɔ be loko nihi ma yɔse kaa nɔ ko juɛmi mi ngɛ kuɔe.
“Pi nɔ́ pɔtɛɛ ko peemi nɛ ma ha nɛ o fɔli kɛ ni kpahi nɛ a he moo ye. Se ke o yaa nɔ nɛ o tsuɔ o blɔ nya ní tsumihi ɔ, a ma ba he moo ye.”—Brandon.
BAIBLO SISI TOMI MLAA: “Nyɛɛ wo . . . tsui si tomi.”—Kolose Bi 3:12.