Gibeonbi Ní Leli Ɔmɛ

KANAAN ma ngua amɛ babauu dla a he konɛ a kɛ Israel nɛ ba hwu ta. A susu kaa a maa ye Israel nɔ kunimi. Se nihi nɛ́ ngɛ ma ngua a kake nɛ a tsɛɛ lɛ Gibeon mi ɔ, mɛɛ a susuu we jã kulaa. A he ye kaa Mawu ngɛ Israel ma a se, nɛ lɔɔ he ɔ, a sume kaa a kɛ Mawu maa hwu ta. Enɛ ɔ he ɔ, o le nɔ́ nɛ Gibeonbi nɛ ɔmɛ pee lo?

A pee a juɛmi kaa a maa pee a he kaa nihi nɛ je tsitsaa he ko. Enɛ ɔ he ɔ, a ti ni komɛ wo tade gbagbɛhi kɛ tokota momohi. A muɔɔ kotoku gbagbɛhi ngɔ pue a teji ɔmɛ a nɔ, nɛ a hɛɛ blodoo gbigbli nɛ́ fu ja. Kɛkɛ nɛ a ba Yoshua ngɔ nɛ a ba de lɛ ke: ‘Wa je ma se tsitsaa he ko kɛ ba, ejakaa wa nu nyɛ Mawu Ope, nɛ ji Yehowa a he. Wa nu níhi tsuo nɛ e pee ha nyɛ ngɛ Mizraim ɔ he. Enɛ ɔ he ɔ, wa ma nikɔtɔma amɛ de wɔ kaa wa hla niye ní kɛ to wa dɛ, konɛ waa ba nyɛ ngɔ nɛ́ wa ba de nyɛ ke: “Nyɛ sɔmɔli ji wɔ. Nyɛ kã wɔ kita kaa nyɛɛ kɛ wɔ be ta hwue.” Nyɛɛ hyɛ bɔnɛ wa tade ɔmɛ gba ngɛ wa he, nɛ wa blodoo ɔmɛ hu gbli nɛ́ a fu ja ha, ejakaa wa je he kɛ nitsɛ.’

Yoshua kɛ nikɔtɔma kpa amɛ he Gibeonbi ɔmɛ a munyu ɔ ye. Lɔɔ he ɔ, a kã mɛ kita kaa a kɛ mɛ be ta hwue. Se ligbi etɛ se ɔ, Yoshua ba le kaa Gibeonbi ɔmɛ je a kasa nya haa.

Yoshua bi mɛ ke, ‘Mɛni heje nyɛ de wɔ ke nyɛ je ma se tsitsaa a?’

Gibeonbi ɔmɛ ha heto ke: ‘Wa pee jã ejakaa wa ná le kaa nyɛ Mawu, nɛ ji Yehowa wo nyɛ si kaa e maa ngɔ Kanaan zugba a tsuo kɛ ha nyɛ. Enɛ ɔ he ɔ, wa ye gbeye kaa nyɛ maa gbe wɔ.’ Se Israelbi ɔmɛ ye kita nɛ a kã Gibeonbi ɔmɛ ɔ nɔ, nɛ a gbi mɛ. Mohu ɔ, a pee mɛ a sɔmɔli.

Yerusalem matsɛ ɔ mi mi fu wawɛɛ kaa Gibeonbi ɔmɛ kɛ Israel ya pee huɛ. Lɔɔ he ɔ, e de matsɛmɛ kpahi eywiɛ ke: ‘Nyɛɛ ba nɛ nyɛ ba piɛɛ ye he nɛ waa kɛ Gibeon nɛ hwu ta.’ Kɛkɛ nɛ matsɛmɛ enuɔ ɔmɛ je ta kɛ wo Gibeon. Se huɛ nɛ́ Gibeonbi kɛ Israel ya pee, nɛ́ lɔɔ ha matsɛmɛ nɛ ɔmɛ kɛ mɛ ma ta hwumi ɔ, anɛ níle ngɛ mi lo? Wa maa na nya.