Blɔ Nɔ Nɛ Wa Maa Gu Kɛ Hi Si Kɛ Ya Neneene

ANƐ o ma nyɛ maa tsɔɔ nɔ́ nɛ jokuɛ yoyo ɔ kɛ e huɛmɛ ɔmɛ ngɛ kane ɔ lo? A hɛɛ womi nɛ o ngɛ kane ɔ nɛ ji Ye Womi Nɛ Sɛɛɔ Baiblo Mi Sanehi ɔ eko. Nɛ a ngɛ “Blɔ nɔ nɛ Wa Maa Gu kɛ Hi Si kɛ Ya Neneene” mi munyu nɛ o ngɛ kane ɔ pɛpɛɛpɛ kanee.

O le nɔ́ nɛ a ngɛ kasee lo? Kekleekle ɔ, e sa nɛ waa le Yehowa kɛ e bi Yesu loko wa ma nyɛ maa hi si kɛ ya neneene. Baiblo ɔ de ke: ‘Blɔ nɛ o maa gu nɔ kɛ hi si kɛ ya neneene ji kaa, o maa kase anɔkuale Mawu kake ɔ kɛ e Bi Yesu nɛ e tsɔ kɛ ba zugba a nɔ ɔ he ní.’

Mɛni blɔ nɔ wa maa gu kɛ kase Yehowa Mawu kɛ e Bi Yesu he ní? Blɔ kake ji kaa, wa maa kane Ye Womi Nɛ Sɛɛɔ Baiblo Mi Sanehi kɛ je sisije kɛ ya si nyagbe. E tu Yehowa kɛ Yesu he munyuhi fuu, aloo pi ja? Nɛ e tu níhi fuu nɛ a pee kɛ níhi nɛ kpaako a maa pee ɔ hu he munyu. Se e sa kaa waa pee ní kpa komɛ hu kɛ piɛɛ womi nɛ ɔ kanemi ɔ he.

O na womi kaketsɛ ɔ nɛ fɔɔ si ngɛ zugba a lo? Lɔɔ ji Baiblo. Ha nɛ́ nɔ ko nɛ e kane ngmamihi nɛ ní kasemi ɔmɛ daa si ngɛ nɔ ɔ ha mo. Baiblo ɔ deɔ wɔ nɔ́ tsuaa nɔ́ nɛ e sa kaa waa le bɔnɛ pee nɛ wa sɔmɔ Yehowa ngɛ blɔ nɛ da nɔ, konɛ wa ná neneene wami. Lɔɔ he ɔ, e sa kaa wa ha nɛ e pee wa su kaa wa maa kase Baiblo ɔ daa.

Se Yehowa Mawu kɛ Yesu Kristo he ní kasemi ɔ kɛkɛ pi. Wa ma nyɛ ma ná a he ní lemi fuu, se kɛ̃ ɔ, e ma nyɛ maa ba kaa wa be neneene wami náe. O le nɔ́ kpa nɛ he hia lo?

E sa nɛ waa ngɔ níhi nɛ wa kase ɔ hu kɛ tsu ní. O kai Yuda Iskariot lo? E ji bɔfo 12 nɛ Yesu hla amɛ a kpɛti nɔ kake. Yuda kase níhi fuu ngɛ Yehowa kɛ Yesu he. Se mɛni e pee? E ba plɛ kpɛletsɛ, nɛ e tsɔɔ Yesu se blɔ ngɛ sika hiɔ 30 heje. Lɔɔ he ɔ, Yuda be neneene wami náe.

O kai Gehazi nɛ wa kase e he ní ngɛ Ní kasemi 69 mi ɔ lo? E hɛ ya kɔ̃ tadehi kɛ sika nɛ pi e nɔ́ ɔ nɔ. Lɔɔ he ɔ, e ye lakpa nɛ e kɛ ngɔ ní ɔmɛ. Se Yehowa gbla e tue. Wɔ hu ke wa yi e mlaa amɛ a nɔ ɔ, e maa gbla wa tue.

Se nimli kpakpahi nɛ a ja Yehowa ngɛ anɔkuale yemi mi babauu hu hi si. Wa suɔ kaa waa pee kaa mɛ, aloo wa sume? Jokuɛ Samuel pee nɔhyɛ nɔ́ kpakpa nɛ e sa kaa waa kase lɛ. Mo kai kaa ngɛ Ní kasemi 55 mi ɔ, wa kase kaa jeha eywiɛ loo enuɔ pɛ lɛ e ye nɛ e bɔni sɔmɔmi ngɛ Yehowa kpe he bo tsu ɔ mi. Lɔɔ he ɔ, ke o wɛ kulaa po ɔ, o ma nyɛ ma sɔmɔ Yehowa.

E fɔɔ si faii kaa Yesu Kristo ji nɔ nɛ wɔ tsuo wa suɔ kaa waa kase lɛ. Kaa bɔnɛ e ngɛ Ní kasemi 87 mi ɔ, benɛ e ji jokuɛ po ɔ, e ya sɔlemi we ɔ nɛ e kɛ nihi ya sɛɛ e hiɔwe Tsɛ ɔ he ní. Ha nɛ waa kase lɛ. Ha nɛ waa sɛɛ Yehowa, wa Mawu nɛ he ngɛ nyakpɛ ɔ, kɛ e Bi Yesu Kristo he ní kɛ ha nihi abɔ nɛ wa ma nyɛ. Ke wa pee ja a, wa ma nyɛ maa hi si kɛ ya neneene ngɛ Mawu paradeiso ehe ɔ mi ngɛ zugba a nɔ.