Ni Kasemi 5

Mini Ji Mawu Yi Mi Tomi kɛ ha Zugba Nɔ?

Mini he je nɛ Yehowa bɔ zugba? (1, 2)

Mini he je nɛ zugba pee we paradiso hu muɛnɔ? (3)

Mini lɛ maa ba nimli yayami peeli a nɔ? (4)

Mini Yesu maa pee kɛ ha hiɔ tsɛmɛ huɔse? nimli nɛ a bwɔ? nimli nɛ a gbo? (5, 6)

Be nɛ pee ha konɛ o na huɔse jɔɔmi nɔ e ko ɔ, mini e sa nɛ o pee? (7)

1. Yehowa bɔ zugba nɔ konɛ adesahi nɛ na buajɔ kɛ hi nɔ kɛ ya neneene. E suɔ nɛ dali, nɛ a ngɛ buajɔ hi zugba nɔ nɔ be fɛɛ be. (Lala 115:16; Yesaia 45:18) A be zugba hɛ mi kpatae; e ngɛ kɛ yaa neneene.—Lala 104:5; Jajelɔ 1:4.

2. Loko Mawu maa bɔ nɔmlɔ ɔ, E hla zugba he ko nyafii ko nɛ e pee lejɔ paradiso. E tsɛ lɛ kɛ Eden abɔɔ. Hiɛɔ ji he nɛ e kɛ kleklee nyumu kɛ yo, Adam kɛ Hawa wo. Mawu to kaa a fɔ bimɛ nɛ a he hiɛ nɛ zugba hi. Jinɛ a maa pee zugba tsuo paradiso bɔɔbɔɔ.—1 Mose 1:28; 2:8, 15.

3. Adam kɛ Hawa pee yayami ngɛ Mawu mla nɛ a bua nɛ a gbo nɔ tue ɔ he je. Lɔɔ he je ɔ, Yehowa je mɛ kɛ je Eden abɔɔ mi. Paradiso ɔ laa. (1 Mose 3:1-6, 23) Se Yehowa hɛ ji e yimi tomi kɛ ha zugba nɔ nɔ. E wo si kaa e maa pee lɛ paradiso ekohu, he nɛ adesahi maa hi si ngɛ kɛ ya neneene. Mini blɔ nɔ e maa gu kɛ pee enɔ?—Lala 37:29.

4. Loko zugba nɔ maa pee paradiso ɔ, e sa nɛ a je nimli yayami peeli ɔmɛ kɛ je nɔ. (Lala 37:38) E nɔ maa ba mi ngɛ Harmagedon, nɛ ji Mawu ta nɛ e kɛ maa po yayami peemi se kulaa ngɛ je ɔ mi. Ngɛ lɔɔ se ɔ, a maa wo Satan tsumi jeha 1,000. E nɔ tsɔɔ kaa nɔmlɔ yayami ko kulaa be piɛe nɛ maa puɛ zugba hu. Mawu webihi pɛ nɛ a maa he yi wami.—Kpojemi 16:14, 16; 20:1-3.

5. Yesu Kliisto maa ye zugba nɔ nɔ Matsɛ jeha 1,000. (Kpojemi 20:6) E maa je yayami peemi kɛ je wa juɛmi kɛ wa nɔmlɔ tsohi a he bɔɔbɔɔ. Wa maa pee adesahi nɛ a he su kɛ pi si kaa benɛ Adam kɛ Hawa ngɛ loko a pee yayami ɔ. Hiɔ, bwɔmi, kɛ gbenɔ bi si hie hu. A maa tsa hiɔ tsɛmɛ, nɛ nimli nɛ a bwɔ maa pee nihewi kɛ yihewi ekohu.—Hiob 33:25; Yesaia 33:24; Kpojemi 21:3-4.

6. Ngɛ Yesu Jeha Akpe Nɔyemi ɔ mi ɔ, adesahi anɔkuafohi maa tsu ni kɛ pee zugba nɔ tsuo paradiso. (Luka 23:43) A maa tle nimli akpekpei nɛ a gbo ɔ si kɛ ba adesa wami mi ekohu ngɛ zugba nɔ. (Bɔfoi Asane 24:15) Ke a pee nɔ nɛ Mawu ngɛ hlae ngɛ a dɛ ɔ, a maa ya nɔ nɛ a maa hi si ngɛ zugba a nɔ kɛ ya neneene. Ke pi ja, a maa kpata a hɛ mi kɛ ho neneene ya.—Yohane 5:28, 29; Kpojemi 20:11-15.

7. Lɔɔ he je ɔ, Mawu sisije yi mi tomi kɛ ha zugba maa ye omanye. O maa suɔ nɛ o na jɔɔmi nɛ maa ba huɔse ɔ eko lo? Ke ja, e he hia nɛ o ya nɔ nɛ o kase Yehowa he ni nɛ o bu nihi nɛ e ngɛ hlae ɔmɛ tue. He nya buami nɛ a peeɔ ngɛ Yehowa Odasefohi a Matsɛ yemi Asa nɔ nɛ o ma ya maa ye bua mo nɛ o pee ja.—Yesaia 11:9; Hebribi 10:24, 25.

[Foni ngɛ ba fa 10]

Paradiso nɛ la

[Fonihi ngɛ ba fa 11]

Ngɛ Harmagedon se ɔ, a maa pee zugba paradiso