Mawu Ji Huɛ Nɛ Se Be Nɛ O Ma Nyɛ Ma Ná

Mawu huɛ nɛ o maa pee ɔ hi pe nɔ́ fɛɛ nɔ́ nɛ o ma nyɛ ma ná. Mawu maa tsɔɔ mo bɔnɛ o maa pee ha kɛ ná bua jɔmi kɛ he bumi; e ma ha nɛ́ o ye o he ngɛ hemi kɛ yemihi nɛ dɛ kɛ ní peepeehi fuu nɛ yeɔ nɔ awi ɔ he. E maa bu o sɔlemi tue. E maa ye bua mo nɛ o ma ná tue mi jɔmi kɛ he kɛ nɔ fɔmi. (La 71:5; 73:28) Mawu maa ye bua mo ngɛ haomi behi a mi. (La 18:18) Nɛ Mawu ma ha mo e nike ní nɛ ji neneene wami ɔ.—Romabi 6:23.

Ke o hɛ kɛ su Mawu he ɔ, o maa hɛ kɛ su Mawu huɛmɛ hu a he. Mɛ hu a maa pee o huɛmɛ. Ngɛ anɔkuale mi ɔ, a maa pee kaa nyɛmimɛ nyumuhi kɛ yihi kɛ ha mo. A bua maa jɔ he kaa a maa tsɔɔ mo Mawu he ní, nɛ a maa ye bua mo nɛ a maa wo mo he wami.

Waa kɛ Mawu sɔɛ. Benɛ o ngɛ hlae nɛ o kɛ Mawu nɛ́ bɔ huɛ ɔ, e sa kaa o nu anɔkuale munyu ko sisi. Mawu huɛ bɔmi be kaa juami bi a kpɛti huɛ bɔmi. E wa nɛ e le ní, nɛ e ngɛ he wami kulaa pe wɔ. Lɛ ji wa Nɔyelɔ nɛ sa. Lɔɔ heje ɔ, ke wa suɔ kaa wa plɛ e huɛmɛ ɔ, lɛɛ e sa nɛ waa bu lɛ tue konɛ waa pee nɔ́ nɛ́ e deɔ wɔ kaa waa pee ɔ. Enɛ ɔ he maa ba se nami ha wɔ daa.—Yesaya 48:18.