Mo Kua Lakpa Jami!

Satan kɛ e daimonio ɔmɛ sume kaa o sɔmɔ Mawu. A suɔ kaa ke e maa hi ɔ, a plɛ nɔ tsuaa nɔ juɛmi kɛ je Mawu he. Mɛni blɔ nɔ a guu kɛ peeɔ enɛ ɔ? Lakpa jami ji blɔ kake nɛ a guu nɔ. (2 Korintobi 11:13-15) Ke jami ko tsɔɔ we anɔkuale nɛ ngɛ Baiblo ɔ mi ɔ, e ji lakpa jami. Lakpa jami ngɛ kaa abisinia sika—e ngɛ kaa sika nitsɛ mohu, se e he be se nami. E ma nyɛ maa ngɔ haomihi fuu ba ha mo.

Lakpa jami be nyɛe maa sa Yehowa, nɛ ji anɔkuale Mawu ɔ hɛ mi kɔkɔɔkɔ. Benɛ Yesu ngɛ zugba a nɔ ɔ, jami kuu ko hla kaa a maa gbe lɛ. A susu kaa blɔ nɛ a guu nɔ kɛ jaa Mawu ɔ ji blɔ dadɛ ɔ. A de ke: “Tsɛ kake wa ngɛ, lɛ ji Mawu.” Anɛ Yesu kplɛɛ nɔ ja lo? Dɛbi! E de mɛ ke: “Nyɛɛ lɛɛ, nyɛ tsɛ nɛ nyɛ je e mi ji Abosiami.” (Yohane 8:41, 44, Somi He Ɔ) Mwɔnɛ ɔ hu nihi fuu susuɔ kaa a ngɛ Mawu jae, se ngɛ anɔkuale mi ɔ, Satan kɛ e daimonio ɔmɛ lɛ a ngɛ sɔmɔe!—1 Korintobi 10:20.

Kaa bɔnɛ tso yaya woɔ yiblii yayahi ɔ, jã kɛ̃ lakpa jami haa nɛ nihi peeɔ ní yayamihi. Haomihi fuu ngɛ je ɔ mi ejakaa nihi peeɔ ní yayamihi. Jemiba yayami, ta hwumi, jumi, yi mi wami, nɔ gbe mi kɛ abonua tuami ngɛ je ɔ mi. Nihi nɛ peeɔ yayami nɛ ɔmɛ fuu ngɛ jami slɔɔtohi a mi, se a jami ɔ wui mɛ he wami nɛ a pee ní kpakpahi. A be nyɛe maa pee Mawu huɛmɛ, ja a kpa ní yayami ɔmɛ peemi.—Mateo 7:17, 18.

Lakpa jami tsɔɔ nihi kaa a sɔle kɛ ha amagahi. Se Mawu de kaa wa ko sɔle kɛ ha amagahi. Sisi numi ngɛ enɛ ɔ he. Ke nɔ ko kɛ mo tui munyu, se e tuɔ munyu kɛ haa o foni ɔ, anɛ o maa suɔ lo? Anɛ jamɛatsɛ ɔ ma nyɛ maa pee o huɛ nitsɛ lo? Dɛbi, e be nyɛe maa pee o huɛ. Yehowa suɔ kaa nimli kɛ lɛ nɛ́ tu munyu, se pi amaga loo foni nɛ wami be mi.—2 Mose 20:4, 5.

Lakpa jami tsɔɔ kaa tɔmi ko be he kaa a maa gbe ni kpahi ngɛ ta hwumi mi. Yesu de ke Mawu huɛmɛ maa suɔ a sibi. Wa be nimli nɛ wa suɔ ɔ gbee. (Yohane 13:35) E ji tɔmi po kaa wa maa gbe nimli yayamihi. Benɛ Yesu henyɛli ɔmɛ ba konɛ a ba nu lɛ ɔ, e ngmɛ́ blɔ kaa e kaseli ɔmɛ nɛ́ nɔ kunɔ kɛ fã e he.—Mateo 26:51, 52.

Lakpa jami tsɔɔ kaa a maa pii yayami peeli ngɛ hɛl la mi. Se kɛ̃ ɔ, Baiblo ɔ tsɔɔ kaa nɔ́ nɛ jee yayami mi kɛ baa ji gbenɔ. (Romabi 6:23) Yehowa ji Mawu nɛ ngɛ suɔmi. Anɛ Mawu nɛ ngɛ suɔmi maa pii nimli kɛ ya neneene lo? E be ja pee kɔkɔɔkɔ! Ngɛ Paradeiso ɔ mi ɔ, jami kake nɛ Yehowa kplɛɛ nɔ pɛ lɛ maa hi si. (Kpojemi 15:4) Jamihi tsuo nɛ fiɔ Satan lakpa amɛ a se be si hie hu.