Tsɔsemi Nɛ Matsɛ Yemi Ɔ Kɛ Haa​—Matsɛ ɔ Sɔmɔli A Tsɔsemi

O MUƆ hɛlii ngɛ o nya he benɛ munyu tulɔ ko ngɛ munyu tue ngɛ kpoku ɔ nɔ ɔ. E ji niheyo nɛ o kɛ lɛ ngɛ asafo mi, nɛ enɛ ɔ ji kekle be nɛ e ngɛ munyu tue ngɛ kpe sisi. Benɛ o ngɛ e munyu ɔ tue bue ɔ, o bua jɔ tsɔsemi nɛ Mawu we bi ná a he. O kai kekle be nɛ e tu munyu ngɛ munyu tumi kpoku ɔ nɔ ngɛ nyɛ asafo ɔ mi​—kɛ bɔ nɛ amlɔ nɛ ɔ, e ya e hɛ mi ha a! Blɔ Gbali A Tsɔsemi Sukuu ɔ ha nɛ e ya e hɛ mi wawɛɛ. Lingmi nɛ ɔ, e kɛ e yo ná he blɔ nɛ a ya Sukuu Kɛ Ha Matsɛ Yemi Sane Kpakpa Fiɛɛli ɔ eko. Be mi nɛ o ngɛ o dɛ gbɔe ngɛ munyu ngɔngɔɛ nɛ nyɛminyumu ɔ tu ɔ he ɔ, o hyɛ o he kɛ kpe, nɛ o susu ­tsɔsemi nɛ Mawu we bi tsuo ná a he.

Baiblo ɔ gba kɛ fɔ si kaa be maa ba nɛ ‘Yehowa maa tsɔɔ e we bi ní.’ (Yes. 54:13) Wa ngɛ jamɛ a be ɔ mi. Wa náa tsɔsemi ngɛ asafo mi kpehi, kpokpa nɔ kpehi, kpɔ mi kpehi, kɛ asafo ɔ sukuu slɔɔtohi nɛ a to blɔ nya konɛ e dla wɔ kɛ ha ní tsumi pɔtɛɛ komɛ ngɛ Yehowa asafo ɔ mi ɔ sisi, se pi kɛ gu wa womi ɔmɛ a nɔ pɛ. Ngɛ fã nɛ ɔ mi ɔ, wa ma susu bɔ nɛ tsɔsemi nɛ ɔmɛ ji odase nɛ tsɔɔ kaa Mawu Matsɛ Yemi ɔ ngɛ nɔ yee mwɔnɛ ɔ he.