Bɔ Nɛ Bimwɔwi Tsakeɔ Gba Si Himi Ha

Ke a fɔ bi ɔ, bua jɔmi baa, se kɛ̃ ɔ, enɛ ɔ kɛ haomi komɛ hu baa gba si himi mi ɔ mi. Akɛnɛ kpaako nyɛ kase fɔmi he je ɔ, e maa pee nyɛ nyakpɛ kaa e sa nɛ nyɛɛ ngɔ nyɛ be kɛ nyɛ he wami tsuo kɛ hyɛ bimwɔyo ɔ. Nyɔ fɔmi kɛ tsakemi nɛ baa ngɛ he numi mi ɔ kɛ haomi ma nyɛ maa ba gba si himi ɔ mi. E sa nɛ o kɛ o he piɛɛlɔ ɔ nɛ pee tsakemi komɛ konɛ nyɛ nyɛ nɛ nyɛɛ hyɛ bimwɔyo ɔ, bɔ nɛ pee nɛ nyɛ gba si himi ɔ nɛ ya nɔ. Mɛni blɔ nɔ Baiblo mi ga womi ma nyɛ maa ye bua nyɛ konɛ nyɛ nyɛ nɛ nyɛ tsu haomi nɛ ɔmɛ a he ní?

1 NYƐƐ NU BƆ NƐ BI MA TSAKE NYƐ SI HIMI HA A SISI

NƆ́ NƐ BAIBLO Ɔ DE: “Suɔmi toɔ e tsui si, nɛ e mi mi hi.” Jehanɛ se hu, suɔmi “fo we lɛ nɔ kake too e nɔ́ mi; e mi mi wui la.” (1 Korinto Bi 13:4, 5) Akɛnɛ kpaako o kase fɔmi he je ɔ, bimwɔyo ɔ he pɛ nɛ o ma bɔni susumi. Enɛ ɔ he ɔ, o huno ɔ ma bɔni he numi kaa pi o kɔmɔ ji lɛ hu. Lɔ ɔ he ɔ, o hɛ nɛ ko je e hiami níhi a nɔ. Ke o toɔ o tsui si nɛ o jeɔ mi mi himi kpo kɛ tsɔɔ lɛ ɔ, e maa ye bua lɛ nɛ e maa na kaa e sa nɛ e piɛɛ o he nɛ nyɛ kɛ hyɛ jokuɛ ɔ.

“Nyɛ hunomɛ ɔmɛ hu, ke nyɛɛ kɛ nyɛ yi ɔmɛ ngɛ ɔ, nyɛɛ na nya ha mɛ saminya.” (1 Petro 3:7) E sa nɛ o nu sisi kaa o yo ɔ maa ngɔ e he wami tsuo kɛ hyɛ bimwɔyo ɔ. Ní tsumi nɛ ɔ ma nyɛ ma ha nɛ e maa pee yeyeeye, nɛ e maa nu pɔtɔtɔɛ he, nɛ e maa ye tsui po. Be komɛ ngɛ nɛ o yo ɔ ma ná o he abofu, se e sa nɛ o ná tsui ha lɛ, ejakaa “nɔ nɛ mi mi fu we mla a, e hi pe katsɛ.” (Abɛ 16:32) O kɛ nɔ́ se kɔmi nɛ tsu ni, konɛ o ye bua lɛ.​—Abɛ 14:29.

NƆ́ NƐ O MA NYƐ MAA PEE:

• Tsɛmɛ: Nyɛɛ ye bua nyɛ yi ɔmɛ kɛ hyɛ bimwɔyo ɔ nyɔ mi tsuo. Mo gbɔ be nɛ o puɛɔ ngɛ ní kpahi a he ɔ nɔ konɛ o ná be kɛ ha o yo ɔ kɛ bimwɔyo ɔ

• Nyɛmɛ: Ke nyɛ huno ɔmɛ suɔ nɛ a maa ye bua nyɛ kɛ hyɛ bimwɔyo ɔ, nyɛ ko kua. Ke o de lɛ ke e pee nɔ́ ko ha bimwɔyo ɔ, nɛ e nyɛ we peemi pɛpɛɛpɛ ɔ, koo tu munyu kɛ si lɛ. Mohu ɔ, moo je mi mi himi mi nɛ o tsɔɔ lɛ

2 NYƐ HA HUƐ BƆMI NƐ NGƐ NYƐ KPƐTI Ɔ MI NƐ WA

NƆ́ NƐ BAIBLO Ɔ DE: “A peeɔ nɔ kake.” (1 Mose 2:24) E ngɛ mi kaa bi ngɛ nyɛ kpɛti mohu lɛɛ, se mo kai kaa o kɛ o he piɛɛlɔ ɔ ji ‘he lo kake.’ Nyɛɛ bɔ mɔde nɛ nyɛ ha nɛ huɛ bɔmi nɛ ngɛ nyɛ kpɛti ɔ mi nɛ wa.

Yigbayi, nyɛ bua nɛ jɔ yemi kɛ buami nɛ nyɛ huno ɔmɛ kɛ haa nyɛ ɔ he. A yi nɛ nyɛ ma je ɔ maa wo mɛ ‘he wami.’ (Abɛ 12:18) Hunomɛ, nyɛ de nyɛ yi ɔmɛ bɔ nɛ nyɛ suɔ mɛ wawɛɛ ha. Nyɛ je a yi ngɛ bɔ nɛ a hyɛɛ weku ɔ nɔ ha a he.​—Abɛ 31:10, 28.

“Nɔ ko nɔ ko nɛ kó hla kaa e hi ha lɛ nɔ kake too; nɔ tsuaa nɔ nɛ susu e nyɛmi hu he.” (1 Korinto Bi 10:24) Be saa be ɔ, moo pee o he piɛɛlɔ ɔ kpakpa. Kaa nɔ kɛ e yo ɔ, nyɛ ná be kɛ sɛɛ ní, nyɛ je nyɛ sibi a yi, nɛ nyɛɛ bu nyɛ sibi tue. Nyɛ ko ngɔ bɔmi nami kɛ pee nyɛ sibi kpɛle. Nyɛ susu nyɛ sibi hiami níhi a he. Baiblo ɔ deɔ ke: “Nyumu kɛ yo kó tsi a he nya kaa a kɛ a sibi be bɔmi nae. Lɛɛ ja eko ɔ, mɛ ni enyɔ ɔmɛ tsuo kplɛɛ kaa a maa pee jã.” (1 Korinto Bi 7:3-5) Enɛ ɔ he ɔ, nyɛɛ kɛ anɔkuale yemi nɛ sɛɛ he ní. Nyɛ tsui si nɛ nyɛ maa to nɛ́ nyɛ maa nu nyɛ sibi a sisi ɔ ma ha nɛ nyɛ gba si himi ɔ maa ngɔ.

NƆ́ NƐ O MA NYƐ MAA PEE:

• Nyɛ hɛ ko je nɔ kaa nyɛ ma ná be kɛ ha nyɛ sibi

• Moo pee ní nyafinyafihi nɛ ma ha nɛ o he piɛɛlɔ ɔ maa nu he kaa o suɔ lɛ ɔ kɛ ha lɛ. Kaa nɔ hyɛmi nɔ́ ɔ, o ma nyɛ maa mane lɛ sɛ gbi loo o he nike ní nyafii ko kɛ ha lɛ

3 BƆ NƐ O MA TSƆSE O BI Ɔ HA

NƆ́ NƐ BAIBLO Ɔ DE: “Kɛ je o jokuɛ mi tɔɔ nɛ o le ngmami klɔuklɔu ɔ. Ngmami klɔuklɔu ɔ ma ha nɛ o maa le ní, nɛ Kristo Yesu nɛ o heɔ yeɔ ɔ ma he o yi wami.” (2 Timoteo 3:15) Nyɛɛ to blɔ nya nɛ nyɛɛ tsɔɔ bimwɔyo ɔ ní. E ngɛ nyɛmi nɛ a kɛ kaseɔ ní loko a fɔ lɛ po. Benɛ bimwɔyo ɔ ngɛ fɔmi kotoku ɔ mi ɔ, e nyɛɔ nɛ e leɔ nyɛ gbi mi tso nɛ ke nyɛ hao loo nyɛ bua jɔ ɔ, e nuɔ he jã. Nyɛɛ kane ní kɛ tsɔɔ lɛ be mi nɛ e ji bimwɔyo. E ngɛ mi kaa e be nɔ́ nɛ o ngɛ kanee ɔ sisi nue mohu lɛɛ, se e maa ye bua lɛ nɛ e bua maa jɔ ní kanemi he ke e wa.

Ko de ke o bi ɔ wɛ tsɔ nɛ e maa bu Mawu munyu ɔ tue. Ke o ngɛ sɔlee ha Yehowa a, mo ha nɛ sɔlemi ɔ nɛ je kpo nɛ e nu. (5 Mose 11:19) Ke nyɛ ngɛ nyɛ hɛja jee po ɔ, nyɛɛ tu níhi nɛ Mawu bɔ ɔmɛ a he munyu. (La 78:3, 4) Be mi nɛ o bi ɔ ngɛ wae ɔ, e maa yɔse suɔmi nɛ o ngɛ kɛ ha Yehowa a, nɛ lɛ hu e maa suɔ lɛ.

NƆ́ NƐ O MA NYƐ MAA PEE:

• Moo sɔle kɛ bi nile nɛ o kɛ ma tsɔse o bimwɔyo ɔ

• Moo ti munyunguhi kɛ sane otihi a mi kɛ ha bimwɔyo ɔ konɛ e nyɛ nɛ e je ni kasemi sisi mla