FA 8
Ke Oslaa Ko Ba Weku ɔ Mi
‘Nyɛ bua nɛ jɔ ngɛ enɛ ɔ he, pohu e maa hia kaa nyɛ maa ye kɔmɔ bɔɔ ko amlɔ nɛ ɔ ngɛ kahi slɔɔtohi a mi.’—1 Petro 1:6
E ngɛ mi kaa nyɛ ngɛ mɔde bɔe nɛ nyɛ ná bua jɔmi ngɛ nyɛ gba si himi ɔ kɛ weku ɔ mi mohu lɛɛ, se nɔ́ ko ma nyɛ maa ba tlukaa nɛ maa je bua jɔmi nɛ ɔ kɛ je. (Fiɛlɔ 9:11) Mawu jeɔ suɔmi mi nɛ e yeɔ bua wɔ ngɛ haomi behi a mi. Ke nyɛɛ kɛ Baiblo mi sisi tomi mlaa nɛ ɔmɛ tsuɔ ní ɔ, o kɛ o weku ɔ ma nyɛ maa da haomihi a nya ke si fɔfɔɛ ɔ mi wa po.
1 NGƆƆ O HƐ KƐ FƆ YEHOWA NƆ
NƆ́ NƐ BAIBLO Ɔ DE: “Nyɛɛ ngɔ nyɛ haomi ɔmɛ tsuo ngɔ fɔ e nɔ; ejakaa lɛ nɛ e hyɛɛ nyɛ nɔ.” (1 Petro 5:7) Mo kai be tsuaa be kaa pi Mawu nɛ ha nɛ kahi baa wa nɔ. (Yakobo 1:13) Ke o hɛ mo kɛ su e he ɔ, e maa ye bua mo ngɛ blɔ nɛ hi pe kulaa nɔ. (Yesaya 41:10) “Nyɛɛ ngɔ nyɛ hɛ kɛ fɔ Mawu nɔ kɛ nyɛ tsui tsuo.”—La 62:8.
O ma na bua womi kɛ je Baiblo ɔ nɛ o maa kane daa a mi. Enɛ ɔ maa ye bua mo nɛ o maa na bɔ nɛ Yehowa “woɔ wa bua ngɛ haomihi tsuo a mi” ha. (2 Korinto Bi 1:3, 4; Roma Bi 15:4) E wo si kaa e ma ha mo “Mawu he jɔmi nɛ pã adesa juɛmi tsuo ɔ.”—Filipi Bi 4:6, 7, 13.
NƆ́ NƐ O MA NYƐ MAA PEE:
Moo sɔle ha Yehowa nɛ e ye bua mo konɛ o nyɛ nɛ o to o tsui si nɛ o susu níhi a he ngɛ blɔ nɛ da nɔ
Mo susu níhi nɛ o ma nyɛ maa pee ɔ he, nɛ o hla blɔ kpakpa nɔ nɛ o maa gu kɛ tsu a he ní
2 MOO HYƐ O KƐ O WEKU Ɔ NƆ SAMINYA
NƆ́ NƐ BAIBLO Ɔ DE: ‘Ní lelɔ ɔ, daa nɛ ɔ, e pee e juɛmi, kɛ e tue klaalo kɛ ngɛ ní kasee.’ (Abɛ 18:15) Mo hla sanehi a mi saminya. Moo le níhi nɛ hia nɔ tsuaa nɔ ngɛ o weku ɔ mi ɔ. O kɛ mɛ nɛ sɛɛ ní. Bu mɛ tue ke a ngɛ munyu tue.—Abɛ 20:5.
Ke e ba kaa suɔlɔ ko gbo hu nɛɛ? Ko susu kaa e sɛ nɛ o fo ya. Mo kai kaa Yesu po “fo ya.” (Yohane 11:35; Fiɛlɔ 3:4) O he mi nɛ o maa jɔɔ nɛ o maa hwɔ si bɔ nɛ sa a he hia. (Marko 6:31) Enɛ ɔ maa ye bua mo nɛ o da haomi nɛ ba a nya.
NƆ́ NƐ O MA NYƐ MAA PEE:
Moo bɔ mɔde kaa o kɛ o weku ɔ maa pɔ ní sɛɛmi loko oslaa ko nɛ ba. Ke haomi ko ba a, e he be wae ha mɛ kaa a kɛ mo maa sɛɛ ní
O kɛ nihi nɛ haomi nɛ ɔ eko ba a nɔ ɔ nɛ sɛɛ he ní
3 HA NƐ A YE BUA MO
NƆ́ NƐ BAIBLO Ɔ DE: ‘Huɛmɛ suɔ a he be tsuaa be, haomi be mi tete po a si we a sibi.’ (Abɛ 17:17) O huɛmɛ ɔmɛ suɔ nɛ a ye bua mo, se eko ɔ, a be nɔ́ nɛ e sa kaa a pee kɛ ha mo ɔ lee. Enɛ ɔ he ɔ, e sa nɛ o de mɛ nɔ́ nɛ hia kaa a pee ha mo ɔ. (Abɛ 12:25) Jehanɛ se hu, mo ha nɛ nihi nɛ a nu Baiblo ɔ sisi ɔ nɛ a ye bua mo. Blɔ tsɔɔmi nɛ a ma ha mo kɛ je Baiblo ɔ mi ɔ maa ye bua mo.—Yakobo 5:14.
Ke o kɛ nihi nɛ a ngɛ hemi kɛ yemi ngɛ Mawu mi, nɛ a ngɛ he kɛ nɔ fɔmi ngɛ e si womi ɔmɛ a mi pɔɔ bɔmi ɔ, a maa wo mo he wami. Ke o woɔ nihi nɛ a ngɛ kɔmɔ yee he wami ɔ, o maa wo mo nitsɛ hu o bua. Moo sɛɛ hemi kɛ yemi nɛ o ná ngɛ Yehowa kɛ e si womi ɔmɛ a mi ɔ kɛ ha mɛ. Moo ye bua nihi nɛ e fi mɛ ɔ, nɛ ko je o he ngɛ nihi nɛ a suɔ mo nɛ a susuɔ o he ɔ a he.—Abɛ 18:1; 1 Korinto Bi 15:58.
NƆ́ NƐ O MA NYƐ MAA PEE:
Mo de o huɛ kpakpa ko nɛ e ye bua mo
Moo je o tsui mi nɛ o de lɛ nɔ́ pɔtɛɛ nɛ e hia mo