Sɛ Gbi Enyɔ Nɛ Je Mawu Ngɔ

Baiblo mluku ɔ tsuo ji sɛ gbi nɛ je Mawu ngɔ. Wa Tsɛ nɛ ngɛ hiɔwe ɔ ngɔ kɛ ha wɔ konɛ e kɛ tsɔɔ wɔ ní. Se mo ha nɛ wa susu sɛ gbi titli enyɔ komɛ nɛ Mawu ha nɛ a ba de ni komɛ maa pee jeha 2,000 kɛ se ji nɛ ɔ he nɛ waa hyɛ. Bɔfo ko nɛ a tsɛɛ lɛ ke Gabriel nɛ e “daa si ngɛ Mawu hɛ mi” ɔ lɛ e ba de sɛ ɔ nɛ. (Luka 1:19) Mɛnɔmɛ a ngɔ nɛ a tsɔ bɔfo ɔ kɛ ya, nɛ mɛni be nɛ e ya?

Nɔ́ nɛ ɔ ya nɔ ngɛ jeha 3 L.F.K. (Loko a fɔ Kristo). Jije nɛ Gabriel ya de kekle sɛ ɔ ngɛ? Yehowa osɔfo ko nɛ a tsɛɛ lɛ Zakaria a hi Yudea yoku ɔmɛ a nɔ. Lejɛ ɔ kɛ Yerusalem he kɛ we. Zakaria kɛ e yo Elizabet fɔ we, nɛ jehanɛ ɔ hu ɔ, a wa ngɛ jeha mi. Be ko ɔ, e su Zakaria nɔ nɛ e ma sɔmɔ ngɛ Mawu sɔlemi we nɛ ngɛ Yerusalem ɔ. Benɛ Zakaria ngɛ sɔlemi we ɔ, tlukaa a, bɔfo Gabriel ba da si ngɛ tsopa kɛ e he via bɔ sami la tɛ ɔ he.

Enɛ ɔ ha nɛ Zakaria tsui po. Se bɔfo ɔ wo e bua, nɛ e de lɛ ke: “Zakaria, koo ye gbeye! Mawu nu o kue fami ɔ. O yo Elizabet ma fɔ binyumu ha mo, nɛ o maa wo lɛ biɛ ke Yohane.” Gabriel de lɛ hu kaa Yohane ‘ma ba pee nɔmlɔ ngua ngɛ Yehowa hɛ mi,’ nɛ e ‘ma ha nɛ Israel bi babauu maa kpale kɛ ba Yehowa, a Mawu ɔ ngɔ.’​​—Luka 1:13-17.

Zakaria he we nɔ́ nɛ bɔfo ɔ de lɛ ɔ yí. Mɛni he je? Ejakaa e kɛ e yo Elizabet tsuo a bwɔ. Enɛ ɔ he ɔ, Gabriel de lɛ ke: “O nya ma ma, nɛ o be nyɛe maa tu munyu hu kɛ yaa su ligbi ɔ nɛ si nɛ i wo mo ɔ maa ba mi.”​​—Luka 1:20.

Jamɛ a be ɔ mi tsuo ɔ, ma a li nɔ́ nɛ ha nɛ Zakaria se ya kɛ jã a. Nyagbenyagbe ɔ, e je kpo, se e nyɛ we munyu tumi. E ngɔ e nine kɛ bɔni níhi kalemi kaa mumui. Nɔuu nɛ ni ɔmɛ kɔ se kaa Mawu je e he kpo kɛ tsɔɔ lɛ ngɛ sɔlemi we ɔ.

Benɛ Zakaria gbe e sɔmɔmi ɔ nya a, e kpale kɛ ho we mi ya. Lɔ ɔ se ɔ, e kɛ we kulaa nɛ Elizabet ngɔ hɔ! Elizabet laa e he nyɔhiɔ enuɔ.

Kɛkɛ nɛ Gabriel kpale ya je e he kpo ekohu. Mɛnɔ ngɔ nɛ e ya jehanɛ ɔ? E ya yomiyo ko nɛ a tsɛɛ lɛ Maria nɛ e je Nazaret ngɛ Galilea kpɔ ɔ mi ɔ ngɔ. Mɛni bɔfo ɔ de lɛ? Bɔfo ɔ de lɛ ke: “Mawu ná o he bua jɔmi.” Gabriel tsa nɔ ke: ‘Hyɛ, o ma ná mi, nɛ o ma fɔ binyumu, nɛ o maa wo lɛ biɛ ke Yesu. E ma ba pee nɔmlɔ ngua, nɛ a ma tsɛ lɛ ke Hiɔwe No ɔ Bi. E maa ye matsɛ ngɛ Israel ma a nɔ kɛ maa ya neneene; e matsɛ yemi ɔ se be poe gblegbleegble!’​​—Luka 1:30-33.

Moo hyɛ bɔ nɛ Gabriel bua maa jɔ ha kaa a tsɔ lɛ nɛ e ba de sɛ nɛ ɔmɛ. Wa maa kase Yohane kɛ Yesu a he ní babauu ngɛ womi nɛ ɔ mi, nɛ wa maa na nɔ́ he je nɛ sɛ gbi enyɔ nɛ ɔmɛ nɛ je Mawu ngɔ ɔ he hia.