FÃ ETƐ
Ke Nɔ Ko Pee Mo Nɔdɔ Nɔ́—“Ke Nɔ Ko Kɛ E Nyɛmi Ngɛ Sane Ko”
“Nyɛmiyo ko nɛ e ngɛ ye asafo ɔ mi ɔ po munyu fɔ ye nɔ kaa i ju e sika. Nyɛmimɛ ngɛ asafo ɔ mi ɔ nu sane ɔ nɛ a ya fĩ nyɛmiyo ɔ se. Pee se ɔ, nyɛmiyo ɔ ba de mi ke e ba ná le kaa pi imi nɛ i ju e sika a. E ngɛ mi kaa e kpa mi pɛɛ mohu lɛɛ, se i nu he ngɛ ye tsui mi kaa i be nyɛe nɛ ma kɛ pa lɛ ngɛ ye hɛ mi si nɛ e pue ɔ he je.”—Linda.
ANƐ o nyɛmi Kristofo no ko pee mo nɔdɔ nɔ́ ko hyɛ kaa bɔ nɛ e ba ngɛ Linda blɔ fa mi ɔ lo? Aywilɛho sane ji kaa nihi fuu ha nɛ ni kpahi a ní peepee hao mɛ wawɛɛ nɛ a kpa Mawu jami. Anɛ jã e ji ngɛ o blɔ fa mi lo?
Anɛ Nɔ Ko Ma Nyɛ Ma ‘Gba Wɔ Kɛ Je Mawu Suɔmi ɔ He’ Lo?
Ngɛ anɔkuale mi ɔ, ke wa nyɛmi Kristofo no ko pee wɔ nɔdɔ nɔ́ ɔ, e he ma nyɛ maa wa ha wɔ kaa waa kɛ maa pa lɛ. Se kɛ̃ ɔ, e sa nɛ Kristofohi nɛ a suɔ a sibi. (Yohane 13:34, 35) Ke wa nyɛmi Kristofo no ko pee wɔ yayami ɔ, e dɔɔ wɔ wawɛɛ nɛ wa kɔni mi woɔ nyu.—La 55:12.
Anɔkuale mi ɔ, Baiblo ɔ tsɔɔ kaa e suu be nɛ Kristofohi kɛ a sibi ‘náa sane.’ (Kolose Bi 3:13) Ngɛ enɛ ɔ tsuo se ɔ, ke nyɛmi ko pee wɔ nɔdɔ nɔ́ ko ɔ, e he ma nyɛ maa wa ha wɔ kaa waa kɛ maa pa lɛ. Anɛ nɔ́ ko ngɛ nɛ ma nyɛ maa ye bua wɔ lo? Mo susu Ngmami ɔ mi sisi tomi mlaa etɛ nɛ nyɛɛ se nɛ ɔmɛ a he nɛ o hyɛ:
Wa hiɔwe Tsɛ ɔ le nɔ́ tsuaa nɔ́. Yehowa naa nɔ́ tsuaa nɔ́ nɛ yaa nɔ ɔ, enɛ ɔ he ɔ, ke nihi kɛ wɔ yi ngɛ blɔ nɛ da nɔ nɛ lɔ ɔ ha nɛ wa ngɛ nɔ́ nae ɔ, e le. (Hebri Bi 4:13) Jehanɛ se hu ɔ, ke wa ngɛ nɔ́ nae ɔ, e haoɔ Yehowa. (Yesaya 63:9) E ha we nɛ ‘haomi, loo nɔ́ nami,’ loo e sɔmɔlɔ ko ní peepee nɛ ‘gba wɔ kɛ je Mawu suɔmi ɔ mi’ kɔkɔɔkɔ. (Roma Bi 8:35, 38, 39) Enɛ ɔ he ɔ, anɛ e sa kaa wa ha nɛ nɔ́ ko loo nɔ ko nɛ gbla wɔ kɛ je Yehowa he lo?
Ke waa kɛ nihi a tɔmihi pa mɛ ɔ, lɔ ɔ tsɔɔ we kaa wa bua jɔ nɔ́ nɛ a pee ɔ he. Ke nihi tɔ̃ wa nɔ nɛ waa kɛ pa mɛ ɔ, lɔ ɔ tsɔɔ we kaa hɛdɔ be nɔ́ nɛ a pee ɔ he, nɛ lɔ ɔ hu tsɔɔ we kaa nɔ́ nɛ a pee ɔ da, aloo wa bua jɔ he. Mo kai kaa Yehowa sume yayami kɔkɔɔkɔ, se ke nɔ ko pee yayami nɛ e pia e he kɛ je e tsui mi ɔ, e kɛ paa lɛ. (La 103:12, 13; Habakuk 1:13) Enɛ ɔ he ɔ, ke Yehowa ngɛ wɔ he wami woe kaa waa kɛ nihi a tɔmi nɛ pa mɛ ɔ, e ngɛ wɔ dee ke waa kase lɛ. “Ke e mi mi fu ɔ, e kɛ we kulaa kɛkɛ e tsui he jɔ ekohu.”—La 103:9; Mateo 6:14.
Ke wa ná we nihi a he abofu ɔ, wa náa he se. Ngɛ mɛni blɔ nɔ? Ha nɛ wa susu si fɔfɔɛ nɛ nyɛɛ se nɛ ɔ he nɛ waa hyɛ. Ngɔɔ lɛ kaa o hɛɛ tɛ ko nɛ jiɔ we ngɛ o dɛ mi. O wo o nine ɔ nɔ kɛ ya hiɔwe bɔɔ. Eko ɔ, pɔ be mo tɔe ke o hɛɛ tɛ ɔ be kpiti ko kɛkɛ. Se ke o bɔ mɔde kaa o maa hɛɛ tɛ ɔ ngɛ o dɛ mi be kɛkɛɛ hu nɛɛ? Anɛ o ma nyɛ maa hɛɛ tɛ nɛ ɔ hɛngmɛfia bɔɔ ko, loo ngmlɛfia kake, loo be kɛkɛɛ lo? Atsinyɛ jemi ko be he kaa o kɔni ma gbo! Ngɛ anɔkuale mi ɔ, tɛ ɔ mi jiɔmi ɔ tsakee we. Se ke o hɛɛ tɛ ɔ be kɛkɛɛ ɔ, e maa pee mo kaa e mi ba jiɔ wawɛɛ. Jã kɛ nɛ e ji ke wa ná nihi a he abofu. Ke wa ná nihi a he abofu bɔɔ po be kɛkɛɛ ɔ, e ma nyɛ maa ye wɔ awi. Enɛ ɔ he ɔ, e be nyakpɛ kaa Yehowa woɔ wɔ he wami kaa wa ko ná nihi a he abofu. Anɔkuale mi ɔ, ke wa ná we nihi a he abofu ɔ, wɔ nitsɛmɛ nɛ wa ma ná he se.—Abɛ 11:17.
Ke wa ná we nihi a he abofu ɔ, wa náa he se
“E Pee Mi Kaa Nɔ́ Nɛ Yehowa Nitsɛ Kɛ Mi Ngɛ Munyu Tue”
Mɛni ye bua Linda nɛ e hɛɛ we abofu ɔ mi be mi nɛ e nyɛmi Kristofo no ɔ pue e hɛ mi si ɔ? E susu yi mi tomi he je nɛ Ngmami ɔ tsɔɔ kaa waa ngɔ nihi a tɔmihi kɛ pa mɛ ɔ he. (La 130:3, 4) Nɔ́ nɛ wo Linda he wami titli ji, lemi nɛ e le kaa ja wa ngɔ nihi a tɔmihi ngɔ pa mɛ loko Yehowa maa ngɔ wa yayamihi kɛ pa wɔ ɔ. (Efeso Bi 4:32–5:2) E de kɛ kɔ bɔ nɛ Ngmami ɔ ye bua lɛ ɔ he ke: “E pee mi kaa nɔ́ nɛ Yehowa nitsɛ kɛ mi ngɛ munyu tue.”
Bɔɔbɔɔbɔɔ ɔ, Linda ba ngmɛɛ sane ɔ he. E je e tsui mi nɛ e kɛ nyɛmiyo ɔ tɔmi ɔ pa lɛ, nɛ amlɔ nɛ ɔ, e ba pee e huɛ nɛ e fiɛ we e he. Linda ya nɔ nɛ e ngɛ Yehowa sɔmɔe. Mo ná nɔ mi mami kaa Yehowa suɔ kaa e maa ye bua mo konɛ mo hu o pee jã.