Fã 8 ɔ Nya Blimi Munyu

Yehowa ha Solomon nile babauu. E ha lɛ he blɔ kaa e ma sɔlemi we ɔ hulɔ. Se nyagbenyagbe ɔ, Solomon kpa Yehowa jami. Ke o ji fɔlɔ ɔ, moo tsɔɔ o bi ɔ konɛ e na bɔ nɛ lakpa mawu jali ha nɛ Solomon kpa Mawu jami ha. Matsɛ yemi ɔ mi gba, nɛ matsɛmɛ nɛ a peeɔ ní yayahi ha nɛ ma a tsuo kua Mawu, nɛ a ja amagahi. Jamɛ a be ɔ mi nɔuu ɔ, a wa Yehowa gbali fuu nɛ a yeɔ anɔkuale ɔ yi mi, nɛ a gbe mɛ. Manyɛ Jezebɛl ha nɛ matsɛ yemi ɔ fã nɛ ngɛ yiti je ɔ kua Yehowa kulaa pe kekle ɔ po. Nɔ́ ko kaa kikɛ bɛ Israel hyɛ. Se kɛ̃ ɔ, Israel bi fuu ye anɔkuale nɛ a sɔmɔ Yehowa. A kpɛti ni komɛ ji Matsɛ Yehoshafat kɛ gbalɔ Eliya.