NÍ KASEMI 37
Nɔ́ Nɛ Baiblo ɔ De Ngɛ Ní Tsumi Kɛ Sika He
Anɛ o hao ngɛ ní tsumi kɛ sika he hyɛ lo? E he ma nyɛ maa wa kaa wa ma tsu wa he lo nya hiami níhi a he ní, nɛ́ jamɛ a be ɔ mi nɔuu ɔ, waa kɛ wa tsui tsuo nɛ sɔmɔ Yehowa. Baiblo ɔ kɛ ga womi nɛ sa nɛ́ maa ye bua wɔ ɔ ha ngɛ ní tsumi kɛ sika he.
1. Mɛni Baiblo ɔ de ngɛ ní tsumi he?
Mawu suɔ kaa wa bua nɛ jɔ wa ní tsumi he. Baiblo ɔ de ke ‘nɔ́ nɛ sa adesa peemi ji kaa . . . e ná bua jɔmi kɛ je e dengme gbomi aloo ní nɛ e tsuɔ wawɛɛ ɔ mi.’ (Fiɛlɔ 2:24) Yehowa kɛ e ní tsumi fiɛ we kulaa. Ke wa kase lɛ nɛ wɔ hu waa kɛ wa ní tsumi fiɛ we ɔ, e saa e hɛ mi, nɛ lɔ ɔ ma ha wa bua maa jɔ.
Ní tsumi he hia. Se e sɛ nɛ wa ha nɛ ní tsumi he nɛ hia wɔ pe Yehowa nɛ wa ma sɔmɔ. (Yohane 6:27) Yehowa wo si kaa ke waa kɛ e sɔmɔmi ye kekleekle blɔ he ngɛ wa si himi mi ɔ, e ma ha wɔ wa he lo nya hiami níhi.
2. Mɛni wa maa pee konɛ wa ná juɛmi nɛ da ngɛ sika he?
Baiblo ɔ de ke sika “faa nɔ he” mohu lɛɛ, se e bɔ wɔ kɔkɔ hu kaa sika pɛ be nyɛe ma ha nɛ wa ná bua jɔmi. (Fiɛlɔ 7:12) Enɛ ɔ he ɔ, Baiblo ɔ wo wɔ he wami kaa wa ko suɔ sika, mohu ɔ, ‘wa ha nɛ níhi nɛ wa ngɛ amlɔ nɛ ɔ nɛ hiɛ ha wɔ.’ (Kane Hebri Bi 13:5.) Ke wa bua jɔ níhi nɛ wa ngɛ ɔ he ɔ, lɔ ɔ be hae nɛ waa hao wa he kaa be fɛɛ be ɔ, wa ná ní fuu, nɛ e be hae nɛ waa ye hiɔ hulɔ. (Abɛ 22:7) Jehanɛ se hu ɔ, lɔ ɔ ma ha nɛ waa yu wa he ngɛ asɔ fiɛmi, kɛ níhi nɛ nihi peeɔ kɛ susumi kaa e ma ha nɛ a ná ní mla a he.
3. Mɛni wa ma nyɛ maa pee konɛ wa ko pee sika he kpɛle?
Yehowa Mawu haa nɔ nɔ́ faa. Ke wɔ hu wa ‘haa nɔ nɔ́ faa’ a, lɔ ɔ tsɔɔ kaa wa ngɛ lɛ kasee. (1 Timoteo 6:18) Waa kɛ wa sika ma nyɛ maa ye bua asafo ɔ, kɛ nihi nɛ a hia yemi kɛ buami ɔ, titli ɔ, wa nyɛmimɛ Kristofohi. Jã nɛ wa maa pee ɔ tsɔɔ kaa wa fo we wɔ pɛ wa nɔ mi. Tsa pi sika abɔ nɛ waa kɛ ma ha a nɛ Yehowa ngɛ hyɛe, mohu ɔ, yi mi tomi he je nɛ wa ngɛ hae ɔ. Ke wa je wa tsui mi nɛ wa ha nɔ nɔ́ faa a, wa bua maa jɔ, nɛ Yehowa bua maa jɔ wa he.—Kane Ní Tsumi 20:35.
MOO KASE BABAUU
Moo hyɛ bɔ nɛ ke wa ná juɛmi nɛ da ngɛ ní tsumi he, nɛ wa bua jɔ níhi nɛ wa ngɛ ɔ he ɔ, wa náa he se ha.
4. Moo wo Yehowa hɛ mi nyami kɛ gu bɔ nɛ o ma tsu ní ha a nɔ
E sa nɛ huɛ bɔmi nɛ ngɛ waa kɛ Yehowa wa kpɛti ɔ nɛ ná bɔ nɛ wa tsuɔ ní ha a nɔ he wami. Mo je VIDEO ɔ, nɛ nyɛ susu sane bimihi nɛ nyɛɛ se nɛ ɔmɛ a he.
Ngɛ video ɔ mi ɔ, mɛni lɛ o bua jɔ he ngɛ su nɛ Jason je kpo, kɛ bɔ nɛ e pee e ní ha ngɛ e ní tsumi he ɔ he?
Mɛni e pee kɛ tsɔɔ kaa e hɛɛ juɛmi nɛ da ngɛ ní tsumi he?
Nyɛɛ kane Kolose Bi 3:23, 24, nɛ nyɛ susu sane bimi nɛ ɔ he:
Mɛni he je nɛ bɔ nɛ wa peeɔ wa ní ha ngɛ ní tsumi he ɔ he hia a?
Ní tsumi he hia. Se e sɛ nɛ wa ha nɛ ní tsumi he nɛ hia wɔ pe Yehowa nɛ wa ma sɔmɔ
5. Ke wa bua jɔ níhi nɛ wa ngɛ ɔ he ɔ, wa náa he se
Ni komɛ bɔɔ mɔde kaa a ma bua sika fuu nya. Se pi jã nɛ Baiblo ɔ wo wɔ he wami kaa waa pee. Nyɛɛ kane 1 Timoteo 6:6-8, nɛ nyɛ susu sane bimi nɛ ɔ he:
Mɛni nɛ Baiblo ɔ woɔ wɔ he wami kaa waa pee?
Ke nɔ́ ko bɔɔ pɛ lɛ ngɛ wa dɛ po ɔ, wa bua ma nyɛ maa jɔ. Mo je VIDEO ɔ, nɛ nyɛ susu sane bimi nɛ nyɛɛ se ɔ he.
E ngɛ mi kaa weku nɛ ɔmɛ be sika fuu mohu lɛɛ, se mɛni lɛ haa nɛ a bua jɔɔ?
Ke wa ngɛ ní fuu, se loloolo ɔ, wa ngɛ hlae nɛ wa ná fuu kɛ piɛɛ he ɔ hu nɛɛ? Yesu kɛ nɔ hyɛmi nɔ́ ko tsu ní kɛ tsɔɔ oslaa nɛ ngɛ jã nɛ wa maa pee ɔ he. Nyɛɛ kane Luka 12:15-21, nɛ nyɛ susu sane bimi nɛ ɔ he:
Mɛni o kase ngɛ nɔ hyɛmi nɔ́ nɛ Yesu kɛ tsu ní ɔ mi?—Hyɛ kuku 15.
Nyɛɛ kane Abɛ 10:22, nɛ nyɛ kɛ to 1 Timoteo 6:10 he. Lɔ ɔ se ɔ, nyɛ susu sane bimihi nɛ nyɛɛ se nɛ ɔmɛ a he:
Huɛ bɔmi nɛ e maa hi waa kɛ Yehowa wa kpɛti, kɛ sika fuu nɛ wa ma ná a, te nɛɛ lɛ o susu kaa e he hia wawɛɛ? Mɛni he je?
Mɛni ji nyagba komɛ nɛ́ sika se dimi ngɔɔ kɛ baa?
6. Yehowa ma ha wɔ wa hiami níhi
Ní tsumi kɛ sika he nyagbahi ma nyɛ maa ka hemi kɛ yemi nɛ wa ngɛ ngɛ Yehowa mi ɔ. Mo je VIDEO ɔ, nɛ o na bɔ nɛ wa maa pee ha kɛ da hemi kɛ yemi he ka nɛ ɔ nya. Lɔ ɔ se ɔ, nyɛ susu sane bimihi nɛ nyɛɛ se nɛ ɔmɛ a he.
Mɛni nyagbahi nɛ nyɛminyumu ɔ nɛ e ngɛ video ɔ mi ɔ kɛ kpe?
Mɛni e pee kɛ ye nyagba nɛ ɔmɛ a nɔ?
Nyɛɛ kane Mateo 6:25-34, nɛ nyɛ susu sane bimi nɛ ɔ he:
Mɛni nɛ Yehowa wo si kaa e maa pee kɛ ha nihi nɛ́ a kɛ lɛ yeɔ kekle blɔ he ngɛ a si himi mi ɔ?
NI KOMƐ DEƆ KE: “E sa nɛ ma tsu ní wawɛɛ kɛ hyɛ ye weku ɔ. Enɛ ɔ he ɔ, i be nyɛe nɛ ma ya asafo mi kpe daa otsi.”
Mɛni ngmami lɛ haa nɛ o náa nɔ mi mami kaa Yehowa sɔmɔmi nɛ o kɛ maa ye kekle blɔ he ngɛ o si himi mi ɔ ji nɔ́ nɛ hi pe kulaa?
NYA MWƆMI
Ní tsumi, kɛ sika he hia. Se e sɛ nɛ a je wa juɛmi kɛ je Yehowa nɛ wa ma sɔmɔ ɔ nɔ.
Mi Nylɔmi
Mɛni maa ye bua mo konɛ o ná juɛmi nɛ da ngɛ ní tsumi he?
Ke o bua jɔ níhi nɛ o ngɛ ɔ he ɔ, kɛ o ma ná he se ha kɛɛ?
Mɛni o maa pee kɛ tsɔɔ kaa o he Yehowa si womi kaa e ma ha e we bi a he lo nya hiami ní ɔ ye?
NÍ KPAHI NƐ MAA YE BUA MO
Moo kane munyu nɛ ɔ nɛ o hyɛ ke ji Baiblo ɔ tsɔɔ kaa sika ji nɔ́ yayami lo.
“Anɛ Sika Ji Ní Yayamihi Tsuo A Sipoku Lo?” (Munyu nɛ ɔ ngɛ Intanɛti ɔ nɔ)
Moo kane nɔ́ hami nɛ saa Mawu hɛ mi ɔ he ní.
“Mɛni Baiblo ɔ De Ngɛ Nɔ́ Hami He?” (Munyu nɛ ɔ ngɛ Intanɛti ɔ nɔ)
Anɛ asɔ fiɛmi ji nɔ́ ko nɛ yi nɔ awi lo?
“Nɔ́ Nɛ Baiblo ɔ De Ngɛ Asɔ Fiɛmi He” (O Hɛ Nɛ Tsɛ̃!, March 2015)
Moo hyɛ nɔ́ nɛ wo nyumu ko nɛ e fiɛɔ asɔ, nɛ e ji julɔ ɔ he wami nɛ e tsake e je mi bami.
“Ye Bua Jɔ Okpɔngɔhi Nɛ A Hii Nɔ Kɛ Kaa Fo ɔ He Wawɛɛ” (Hwɔɔmi Mɔ, November 1, 2011)