NÍ KASEMI 56
Moo Baa Kake Peemi Nɛ Ngɛ Asafo ɔ Mi ɔ Yi
Ke wa ngɛ wa nyɛmimɛ Kristofohi a kpɛti ɔ, wa nuɔ he kaa bɔ nɛ Matsɛ David nu he ɔ. E de ke: ‘Hyɛ bɔ nɛ e hi, bɔ nɛ e ngɛ fɛu ha, ke nyɛmimɛ pee kake kɛ hi si!’ (La 133:1) Kake peemi nɛ ngɛ wa kpɛti ɔ bɛ kɛkɛ. Wa ti nɔ fɛɛ nɔ ngɛ e blɔ fa mi nɔ́ nɛ e sa kaa e tsu konɛ e kɛ baa kake peemi ɔ yi.
1. Mɛni lɛ sa kadimi ngɛ Mawu we bi a he?
Ke o ya asafo mi kpe ngɛ ma kpa nɔ ɔ, eko ɔ, o be gbi nɛ a ngɛ tue ɔ sisi nue, se o bua maa jɔ, nɛ o maa nu he kaa a suɔ mo. Mɛni he je? Ejakaa ní kake nɛ wɔ tsuo wa kaseɔ ngɛ je kɛ wɛ, nɛ wa bɔɔ mɔde kaa wa ma je suɔmi kpo kɛ tsɔɔ wa sibi. E ngɛ mi kaa wa ngɛ he slɔɔtoslɔɔtohi mohu lɛɛ, se wɔ tsuo wa ‘faa kue kɛ haa Yehowa, nɛ wa peeɔ kake kɛ sɔmɔɔ lɛ.’—Zefania 3:9.
2. Mɛni o ma nyɛ maa pee kɛ ye bua konɛ kake peemi nɛ hi asafo ɔ mi?
“Nyɛɛ suɔ nyɛ sibi wawɛɛ nitsɛ kɛ je nyɛ tsui mi.” (1 Petro 1:22) Kɛ o kɛ ga womi nɛ ɔ ma tsu ní ha kɛɛ? Koo ngɔ o juɛmi kɛ ma ni kpahi a gbɔjɔmi nɔ, mohu ɔ, moo ngɔ o juɛmi kɛ ma su kpakpahi nɛ a ngɛ ɔmɛ a nɔ. O kɛ nihi nɛ a suɔ níhi nɛ o bua jɔ he ɔ pɛ nɛ ko bɔ, mohu ɔ, moo bɔ mɔde nɛ o kɛ nyɛmimɛ nɛ a je he slɔɔtohi ɔ hu nɛ bɔ. Jehanɛ hu ɔ, ke wa hɛɛ ni komɛ a he juɛmi yayami ɔ, e sa nɛ waa bɔ mɔde nɛ wa je kɛ je wa tsui mi.—Kane 1 Petro 2:17.a
3. Mɛni o maa pee ke o kɛ o nyɛmi Kristofo no ko kpa we gbi ngɛ nɔ́ ko he?
Kake peemi ngɛ wa kpɛti, se kɛ̃ ɔ, wa tɔ̃ɔ wa nyɛmimɛ a nɔ be komɛ aloo wa peeɔ níhi nɛ e dɔɔ mɛ. Lɔ ɔ he ɔ, Mawu Munyu ɔ de ke: “Nyɛɛ ya nɔ nɛ . . . nyɛɛ ngɔ kɛ pa nyɛ sibi faa,” nɛ e de kɛ piɛɛ he ke: “Kaa bɔ nɛ Yehowa ngɔ kɛ pa nyɛ faa a, e sa nɛ nyɛ hu nyɛɛ pee jã nɔuu.” (Kane Kolose Bi 3:13.) Wa tɔ̃ɔ Yehowa nɔ si abɔ, se kɛ̃ ɔ, e kɛ keɔ wɔ. Lɔ ɔ he ɔ, e hyɛɔ blɔ kaa waa ngɔ wa nyɛmimɛ a tɔmi kɛ ke mɛ. Ke o yɔse kaa o tɔ̃ o nyɛmi ko nɔ ɔ, moo sɛ hlami nɛ o ya e ngɔ konɛ nyɛ ya dla nyɛ kpɛti.—Kane Mateo 5:23, 24.b
MOO KASE BABAUU
Moo hyɛ blɔ komɛ a nɔ nɛ o ma nyɛ maa gu kɛ ha nɛ kake peemi kɛ tue mi jɔmi nɛ hi asafo ɔ mi.
Mɛni o maa pee konɛ tue mi jɔmi nɛ hi o kɛ nihi nyɛ kpɛti?
4. Moo hwu kɛ si nihi a he juɛmi yayami nami
Wa suɔ kaa wa ma je suɔmi kpo kɛ tsɔɔ wa nyɛmimɛ tsuo. Se be komɛ ɔ, e ma nyɛ maa ye kaa wa ma je suɔmi kpo kɛ tsɔɔ nihi nɛ e slo he nɛ a je ɔ. Mɛni ma nyɛ maa ye bua? Nyɛɛ kane Ní Tsumi 10:34, 35, nɛ́ nyɛ susu sane bimi nɛ ɔmɛ a he:
Yehowa kplɛɛɔ nimli slɔɔtohi a nɔ, nɛ a ba peeɔ e we Odasefohi. Kɛ e sa nɛ enɛ ɔ nɛ e ha nɛ o na nihi nɛ a je he slɔɔtohi ɔ ha kɛɛ?
Mɛni susumi nɛ dɛ nɛ nihi fuu hɛɛ ngɛ ni kpahi a he ngɛ o kpɔ ɔ mi nɛ́ o suɔ kaa o ma kua?
Nyɛɛ kane 2 Korinto Bi 6:11-13, nɛ́ nyɛ susu sane bimi nɛ ɔ he:
Mɛni blɔ nɔ o ma nyɛ maa gu kɛ hɛ kɛ su nyɛmimɛ nyumuhi kɛ yihi nɛ́ a je he slɔɔtohi ɔ a he?
5. Moo ngɔ tɔmi kɛ ke faa, nɛ o ha nɛ tue mi jɔmi nɛ hi o kɛ nihi nyɛ kpɛti
E ngɛ mi kaa Yehowa tɔ̃ we wa nɔ hyɛ mohu lɛɛ, se kɛ̃ ɔ, e ngɔɔ wa tɔmihi kɛ keɔ wɔ faa. Nyɛɛ kane La 86:5, nɛ́ nyɛ susu sane bimi nɛ ɔmɛ a he:
Mɛni wa kaseɔ ngɛ bɔ nɛ Yehowa kɛ tɔmi keɔ ha a mi ngɛ ngmami nɛ ɔ mi?
Mɛni he je nɛ o bua jɔ bɔ nɛ Yehowa kɛ tɔmi keɔ ha a he ɔ?
Mɛni si fɔfɔɛhi lɛ ma nyɛ ma ha nɛ e he nɛ wa ha wɔ kaa waa kɛ ni kpahi maa hi si ngɛ tue mi jɔmi mi?
Mɛni blɔ nɔ wa maa gu kɛ kase Yehowa nɛ́ wa ha nɛ kake peemi nɛ hi waa kɛ wa nyɛmimɛ wa kpɛti? Nyɛɛ kane Abɛ 19:11, nɛ́ nyɛ susu sane bimi nɛ ɔ he:
Ke nɔ ko wo o mi mi la aloo e tɔ̃ o nɔ ɔ, mɛni o ma nyɛ maa pee kɛ dla sane ɔ?
Wa tɔ̃ɔ nihi a nɔ be komɛ. Ke e ba jã a, mɛni e sa nɛ waa pee? Mo je VIDEO ɔ, nɛ́ nyɛ susu sane bimi nɛ nyɛɛ se ɔ he.
Ngɛ video ɔ mi ɔ, mɛni nyɛmiyo ɔ pee konɛ tue mi jɔmi nɛ ba?
6. Moo ngɔ o juɛmi kɛ ma su kpakpahi nɛ nyɛmimɛ ngɛ ɔ nɔ
Ke wa hɛ kɛ su wa nyɛmimɛ nyumuhi kɛ yihi a he wawɛɛ ɔ, wa ma ba le a nyɛmihi kɛ a gbɔjɔmihi. Mɛni blɔ nɔ wa maa gu konɛ waa kɛ wa juɛmi nɛ ma a su kpakpa amɛ a nɔ? Mo je VIDEO ɔ, nɛ́ nyɛ susu sane bimi nɛ nyɛɛ se ɔ he.
Mɛni lɛ ma nyɛ maa ye bua mo konɛ o na su kpakpahi nɛ nyɛmimɛ ngɛ ɔ?
Yehowa ngɔɔ e juɛmi kɛ maa wa su kpakpa amɛ a nɔ. Nyɛɛ kane 2 Kronika 16:9a, nɛ́ nyɛ susu sane bimi nɛ ɔ he:
Kɛ lemi nɛ o le kaa Yehowa ngɔɔ e juɛmi kɛ maa o su kpakpa amɛ a nɔ ɔ haa nɛ o nuɔ he ha kɛɛ?
Diamond nɛ he ngɛ fɛu po ngɛ fã tɔmihi, se kɛ̃ ɔ, e he jua wa. Jã nɔuu nɛ wa nyɛmimɛ nyumuhi kɛ yihi yi mluku, se kɛ̃ ɔ, a he jua wa ngɛ Yehowa hɛ mi
NI KOMƐ DEƆ KE: “Loko i kɛ nɔ ko tɔmi maa ke lɛ ɔ, ja e ba kpa mi pɛɛ kekle.”
Mɛni he je nɛ e sa nɛ waa kɛ nihi a nɔ tɔmi nɛ ke mɛ faa a?
NYA MWƆMI
O ma nyɛ maa ye bua kɛ baa kake peemi nɛ ngɛ asafo ɔ mi ɔ yi kɛ gu nihi a tɔmi nɛ o kɛ maa ke mɛ, kɛ suɔmi kpo nɛ o ma je kɛ tsɔɔ mɛ ɔ nɔ.
Mi Nylɔmi
Mɛni o ma nyɛ maa pee konɛ o ko ná ni kpahi a he juɛmi yayami?
Ke o kɛ o nyɛmi Kristofo no ko kpa we gbi ngɛ nɔ́ ko he ɔ, mɛni o maa pee?
Mɛni he je nɛ o suɔ kaa o maa kase bɔ nɛ Yehowa kɛ nihi a tɔmi keɔ mɛ ha a?
NÍ KPAHI NƐ MAA YE BUA MO
Moo hyɛ bɔ nɛ nɔ́ he tomi nɔ́ ko nɛ Yesu tu he munyu ɔ maa ye bua wɔ ha konɛ wa ko kojo ni kpahi.
Ke e peeɔ wɔ kaa wa tɔ̃ we nɔ ko nɔ ɔ, anɛ e he hia nɛ wa kpa lɛ pɛɛ lo?
“Pɛɛ Kpami—Nɔ́ Titli Nɛ Ngɔɔ Tue Mi Jɔmi Kɛ Baa” (Hwɔɔmi Mɔ, November 1, 2002)
Hyɛ bɔ nɛ ni komɛ kase bɔ nɛ a kɛ ni kpahi maa hi si ha nɛ a be nɔ mi hlae.
Moo hyɛ blɔ nɔ nɛ o maa gu kɛ dla pɛ nɛ ngɛ o kɛ o nyɛmi ko nyɛ kpɛti ɔ konɛ e ko puɛ tue mi jɔmi nɛ ngɛ asafo ɔ mi ɔ.
“Nyɛɛ Je Suɔmi Mi Kɛ Dla Nyɛ Kpɛti Sanehi” (Hwɔɔmi Mɔ, May 2016)
a Nyagbe Ningma 6 tsɔɔ bɔ nɛ suɔmi yeɔ bua Kristofohi ha konɛ a ko gbɛ hiɔhi nɛ sãa nɔ kɛ fĩa.
b Nyagbe Ningma 7 ɔ tsɔɔ blɔ nɔ nɛ nɔ ko maa gu kɛ tsu sanehi nɛ kɔɔ ní tsumi kɛ mlaa he ɔ he ní ha.