Mɛnɔ Ji Mawu Matsɛ Yemi ɔ Nya Matsɛ?

• Nɔ nɛ Mawu hla. ‘Imi Yehowa nitsɛ lɛ i ngɔ ye matsɛ ɔ ngɔ to Zion, . . . Ma ha mo je ma amɛ tsuo; zugba a tsuo ma ba pee o weto ní.’​—La 2:6, 8.

• Nɔ nɛ ma ba hi David matsɛ sɛ ɔ nɔ. “A fɔ bi ha wɔ! A ha wɔ binyumuyo! . . . E nɔ yemi ɔ ma he si, nɛ e maa bɔ; ma a ma na tue mi jɔmi daa, ejakaa e maa ye tsɛ kaa Matsɛ David nitsɛ se yelɔ.”​—Yesaya 9:6, 7.

• Nɔ nɛ a ma fɔ lɛ ngɛ Betlehem. “Mo Betlehem . . .  ma ha nɔ ko maa je o mi ba ye matsɛ . . . A maa bu lɛ ngɛ je ɔ mi he tsuaa he.”​—Mika 5:2, 4.

• Nɔ nɛ adesahi ma kua lɛ nɛ a maa gbe lɛ. “Wa gbe e he guɛ, nɛ wa bui lɛ saasaa. . . . A plaa lɛ ngɛ wa yayami ɔmɛ a he, a fiaa lɛ ní ngɛ wa tɔmi ɔmɛ a he.”​—Yesaya 53:3, 5.

• Nɔ nɛ a ma tle lɛ si kɛ je gbeje nɛ a maa wo e hɛ mi nyami. “A si we lɛ ngɛ Gbeje, nɛ jã kɛ̃ nɛ e he lo ɔ hu puɛ we. . . . A wo e nɔ kɛ ya Mawu hiɔ nɔ.”​—Ní Tsumi 2:31, 33.

Yesu Kristo Ji Nɔ Nɛ E Sa Kaa E Ye Adesahi A Nɔ

Ngɛ adesa yi nɔ sane mi tsuo ɔ, Yesu Kristo pɛ ji nɔ nɛ ní nɛ ɔmɛ nɛ a ngma a kɔ e he ɔ nɛ. Ngɛ anɔkuale mi ɔ, hiɔwe bɔfo ko de Maria nɛ e ji Yesu yayo ke: “Mawu maa ngɔ e tsɛ David matsɛ sɛ ɔ kɛ ha lɛ, . . . nɛ e Matsɛ Yemi ɔ se be poe.”​—Luka 1:31-33.

Pi zugba a nɔ nɛ a wo Yesu matsɛ ngɛ. Mohu ɔ, a wo lɛ matsɛ ngɛ hiɔwe kaa Mawu Matsɛ Yemi ɔ nya Matsɛ, nɛ e maa hi hiɔwe kɛ ye adesahi a nɔ. Mɛni he je nɛ e ji Nɔ Yelɔ nɛ sa a? Mo ha nɛ waa hyɛ nɔ́ nɛ Yesu pee benɛ e ba zugba a nɔ ɔ.

• Yesu susu nihi a he. Yesu ye bua nyumuhi, yihi, jokuɛwi kɛ nikɔtɔmahi, nɛ e hyɛ we he nɛ a je loo blɔ nya nɛ a ngɛ. (Mateo 9:36; Maako 10:16) Benɛ kpititsɛ ko kpa lɛ pɛɛ ke: “Ke o suɔ ɔ, o ma nyɛ ma ha nɛ ye he nɛ tsɔ” ɔ, Yesu mi mi sã lɛ nɛ e tsa lɛ.​—Maako 1:40-42.

• Yesu tsɔɔ wɔ nɔ́ nɛ wa maa pee konɛ waa sa Mawu hɛ mi. E de ke: “Nyɛ be nyɛe maa pee nyɔguɛhi kɛ ha Mawu, kɛ Ní Nami tsuo.” Jehanɛ hu ɔ, e de kaa e sa nɛ waa kɛ ni kpahi nɛ hi si saminya kaa bɔ nɛ wa suɔ kaa mɛ hu a kɛ wɔ nɛ hi si ɔ. Nɛ e tsɔɔ hu kaa pi nɔ́ nɛ wa peeɔ ngɛ wa si himi mi ɔ pɛ nɛ Mawu naa, se e naa bɔ nɛ wa susuɔ níhi a he ha kɛ bɔ nɛ wa nuɔ níhi a he ha a hulɔ. Enɛ ɔ he ɔ, loko Mawu bua maa jɔ wa he ɔ, lɛɛ e sa nɛ waa hyɛ níhi nɛ wa susuɔ ngɛ wa tsui mi ɔ saminya. (Mateo 5:28; 6:24; 7:12) Yesu tsɔɔ kaa loko wa ma ná bua jɔmi nitsɛnitsɛ ɔ, ja wa kase nɔ́ nɛ Mawu suɔ kaa waa pee ɔ nɛ wa pee jã.​—Luka 11:28.

• Yesu tsɔɔ wɔ bɔ nɛ wa ma je suɔmi kpo kɛ tsɔɔ ni kpahi ha. Munyuhi nɛ Yesu tu, kɛ níhi nɛ e pee ɔ ná nihi nɛ a bu lɛ tue ɔmɛ a nɔ he wami wawɛɛ, nɛ lɔ ɔ ta a tsui he. “Asafo kuu ɔmɛ a nya kpɛ a he ngɛ bɔ nɛ e plɛ kɛ tsɔɔ ní ha a he, ejakaa e tsɔɔ mɛ ní kaa nɔ ko nɛ e hɛɛ blɔ nya.” (Mateo 7:28, 29) E tsɔɔ nihi kaa ‘a suɔ a he nyɛli.’ Benɛ e ngɛ sɛumi tso ɔ nɔ po ɔ, e sɔle kɛ ha nihi nɛ a ha nɛ a gbe lɛ ɔ. E sɔle ke: “Tsaatsɛ, moo ngɔ kɛ pa mɛ, ejakaa a li nɔ́ nɛ a ngɛ pee ɔ.”​—Mateo 5:44; Luka 23:34.

Yesu ji Nɔ Yelɔ nɛ sa kaa e ye je ɔ nɔ, ejakaa e mi mi jɔ, nɛ e yeɔ bua nɔ. Se mɛni be nɛ e bɔni nɔ yemi?