Kaimi ɔ He Nine Fɔmi Klɛdɛɛ!
1. Mɛni Matsɛ Yemi fiɛɛli maa pee ngɛ je ɔ mi tsuo kɛ je March 21, 2009, nɛ mɛni heje?
1 Ngɛ So, April 9, 2009, Yehowa Mawu jali nɛ ngɛ je ɔ mi tsuo ma bua a he nya kɛ kai suɔmi nɛ kle pe kulaa nɛ Mawu je kpo kɛ tsɔɔ adesahi ɔ. (Rom. 5:6-8) Wa ngɛ blɔ hyɛe wawɛɛ kaa tsui kpakpatsɛmɛ ayɔhi abɔ ma ba piɛɛ wa he kɛ kai Yesu gbenɔ ɔ. Wa ma gba Kaimi ɔ he nine fɔmi womi klɛdɛɛ ngɛ je ɔ mi tsuo kɛ je March 21.
2. Mɛni ji otihi nɛ sa kaa e hi wa juɛmi mi ke wa ngɔ nine fɔmi womi ɔ kɛ ngɛ nihi hae?
2 Otihi Nɛ Sa Kaa E Hi Wa Juɛmi Mi: Ngɔɔ foni ɔmɛ, kɛ sane bimi ɔmɛ, kɛ ngmami nɛ a tsɛ nɛ ngɛ womi ɔ nɔ kɛ tsu ní saminya. Kaa nɔhyɛ nɔ́ ɔ, o ma nyɛ maa ngɔ foni nɛ ngɛ womi ɔ hɛ mi ɔ kɛ tsɔɔ nɔ ɔ, konɛ o de ke: “I suɔ kaa ma fɔ mo nine nɛ o ba piɛɛ wa he kɛ kai Yesu gbenɔ ɔ ngɛ So, April 9, 2009.” Lɔɔ se ɔ, moo kane womi ɔ yi ɔ, kɛ sane bimi ɔmɛ kɛ tsɔɔ lɛ. O hɛ nɛ hi nɔ nɛ o de lɛ ke e ma nyɛ ma tsɛ e weku mi bi kɛ ni kpahi hu kɛ piɛɛ e he kɛ ba.
3. Ke wa ya fɔ nihi nine sisije ɔ, mɛni e sa kaa waa pee ngɛ lɔɔ se?
3 Ke zugba kpɔ nɛ nyɛ asafo ɔ fiɛɛɔ ngɛ mi ɔ kle ɔ, asafo mi nikɔtɔma amɛ ma nyɛ ma de nyɛ konɛ nyɛ si womi ɔ eko ngɛ nihi nɛ be we mi ɔ a sinyahi a nya. Ke e su Hɔ kɛ Hɔgba a, nyɛɛ ngɔ womi tɛtlɛɛ ɔmɛ kɛ piɛɛ nine fɔmi womi ɔ he kɛ ha. Ngɔɔ kɛ ma o hɛ mi kaa o maa fɔ nihi nɛ o ya slaa mɛ, o Baiblo kaseli, wekuli, sukuubi, nítsuli, nihi nɛ o kɛ mɛ ngɛ he kake, kɛ ni kpahi hu nɛ o le nine. Jeha nɛ be ɔ, nyɛmiyo ko fɔ e wekuli 30 nine, nɛ lɔɔ se ɔ, e kai mɛ si abɔ ngɛ bɔnɛ Kaimi ɔ he hia ha a he. E ná bua jɔmi kaa a kpɛti nihi 25 ba Kaimi ɔ, nɛ nihi 4 kplɛɛ nɛ a kɛ mɛ ngɛ Baiblo ɔ kasee!
4. Mɛni blɔ nya e sa kaa wa bɔni tomi kɛ je piɔ, nɛ mɛni heje?
4 Mo Bɔni Blɔ Nya Tomi: Fiɛɛli fuu ma nyɛ maa ngɔ ngmlɛfia fuu kɛ tsu ní ngɛ March kɛ April mi. Ke o ngɛ bimɛ, loo Baiblo kaseli nɛ ngɛ mɔde bɔe ɔ, eko ɔ, be nɛ sa nɛ a kɛ maa pee fiɛɛli nɛ kpaako a maa baptisi mɛ ji nɛ ɔ nɛ. Mo bɔni blɔ nya tomi amlɔ kaa o maa ngɔ o he kɛ wo nine fɔmi womi nɛ ɔ gbami mi kɛ pi si, konɛ o kɛ tsɛ nihi nɛ a ba piɛɛ wa he kɛ kai suɔmi nɛ kle pe kulaa enyɔ nɛ a je kpo kɛ tsɔɔ adesahi ɔ.—Yoh. 3:16; 15:13.