Bɔnɛ Wa Maa Ngɔ “Mawu Suɔmi” Womi ɔ Kɛ Pee Baiblo Mi Nikasemi Ha
1. Mɛni yi mi tomi heje nɛ a pee “Mawu Suɔmi” womi ɔ?
1 Wa bua jɔ saminya benɛ wa nine su “Nyɛɛ To Nyɛ He ngɛ Mawu Suɔmi ɔ Mi” womi ɔ nɔ ngɛ “Mawu Mumi ɔ Tsɔɔ Wɔ Blɔ” Kpe Ngua a nɛ a pee ɔ! Kaa bɔnɛ a fia he adafi ɔ, a pee womi nɛ ɔ konɛ e ye bua wɔ nɛ waa le jemiba he tɛhi nɛ Yehowa po fɔ si ɔ nɛ wa kɛ tsu ní, se pi kaa a kɛ tsɔɔ Baiblo sisije tsɔɔmi ɔmɛ. Wa be womi nɛ ɔ ngɔe kɛ ha nihi ngɛ fiɛɛmi mi.
2. Mɛni blɔ nɔ a kɛ womi nɛ ɔ ma tsu ní ngɛ, nɛ mɛnɔmɛ a kɛ mɛ maa kase?
2 Womi nɛ ɔ ji womi nɛ waa kɛ wa Baiblo kaseli maa kase ke a gbe Baiblo Tsɔɔmi womi ɔ nya. E sa kaa wa hɛ nɛ hi nɔ kaa nihi a nɔ yami ngɛ anɔkuale ɔ mi ngɛ ekpaekpa. E sa nɛ waa pee nikasemi ɔ eko tsuaa eko bɔnɛ maa hi ha nikaselɔ ɔ. E sa nɛ nikaselɔ ɔ nɛ nu nɔ́ nɛ e maa kase ɔ sisi saminya. E sɛ kaa waa kɛ nihi nɛ kase womihi fuu kɛ be se a bɛ nikasemi, nɛ a sume kaa a ba a je mi ngɛ Baiblo anɔkuale ɔ nya nɛ kase womi nɛ ɔ.
3. Ke waa kɛ nɔ ko ngɛ Worship God womi ɔ kasee amlɔ nɛ ɔ, mɛni e sa kaa waa pee?
3 Ke o kɛ nɔ ko ngɛ Worship God womi ɔ kasee amlɔ nɛ ɔ, nɛ e piɛ bɔɔ nɛ nyɛ maa gbe nya a, o kɛ lɛ ma nyɛ ma tsa nɔ nɛ nyɛɛ gbe nya, nɛ o wo nikaselɔ ɔ he wami nɛ e kane “Mawu Suɔmi” womi ɔ ngɛ e dɛhe. Se ke pi jã a, lɛɛ e hi kaa o ma tsake nikasemi ɔ kɛ ba womi ehe ɔ mi nɛ o kɛ lɛ nɛ je sisi. Nyɛ ma nyɛ ma susu mitsɔɔmi munyu ɔmɛ a he ke e he hia kaa bɔnɛ e ji ngɛ Baiblo Tsɔɔmi womi ɔ blɔ fa mi ɔ.
4. Mɛni e sa kaa waa pee ke a baptisi nikaselɔ benɛ e gbi Baiblo Tsɔɔmi womi ɔ loo “Mawu Suɔmi” womi ɔ nya lolo?
4 Ke a baptisi nikaselɔ ɔ benɛ e gbi Baiblo Tsɔɔmi womi ɔ loo “Mawu Suɔmi” womi ɔ nya lolo ɔ, nyɛ tsa nikasemi ɔ nɔ kɛ ya si nyɛ maa gbe “Mawu Suɔmi” womi ɔ kasemi nya. E ngɛ mi kaa a baptisi nikaselɔ ɔ mohu, se o ma nyɛ maa bu be nɛ o kɛ lɛ maa pee nikasemi, se slaami, kɛ Baiblo mi nikasemi ɔ he akɔtaa. Ke fiɛɛlɔ ko piɛɛ o he kɛ ya pee nikasemi ɔ, nɛ e kɛ e he wo mi ɔ, lɛ hu e ma nyɛ maa bu be ɔ he akɔtaa.
5. Mɛni blɔ nɔ wa ma nyɛ maa ngɔ “Mawu Suɔmi” womi ɔ kɛ ye bua fiɛɛli nɛ kpa fiɛɛmi yami?
5 Ke Asafo Sɔmɔmi Ajlafo ɔmɛ a ti nɔ ko ha mo nɔ ko nɛ kpa fiɛɛmi yami kaa o kɛ lɛ nɛ kase ní ɔ, eko ɔ, e maa tsɔɔ mo yi pɔtɛɛ komɛ ngɛ “Mawu Suɔmi” womi ɔ mi nɛ o kɛ nɔ ɔ maa kase. E he hia we kaa nyɛ maa pee nikasemi ɔ be kɛkɛɛ. A to womi ehe nɛ ɔ he blɔ nya ha wɔ nɛ e ye bua wɔ konɛ waa ‘hi Mawu suɔmi ɔ mi’!—Yuda 21.