Fiɛɛmi Haa Nɛ Wa He Waa Ngɛ Mawu Jami Mi
1. Mɛni se wa náa kɛ jee fiɛɛmi nítsumi ɔ mi?
1 Wa he nɛ waa kɛ woɔ fiɛɛmi nítsumi ɔ mi ɔ haa nɛ wa he waa ngɛ Mawu jami mi nɛ wa náa bua jɔmi babauu. Ngɛ anɔkuale mi ɔ, yi mi tomi titli heje nɛ wa fiɛɛɔ ngɛ ji kaa nɛ́ waa sa Yehowa hɛ mi. Se, fami kaa waa “fiɛɛ sɛgbi ɔ” tue nɛ wa buɔ ɔ haa wa náa Yehowa dɛ mi jɔɔmi babauu, nɛ wa náa he se ngɛ blɔ kpahi a nɔ. (2 Tim. 4:2; Yes. 48:17, 18) Se mɛni blɔ nɔ fiɛɛmi ma ha wa he maa wa, nɛ e ma ha wɔ bua jɔmi?
2. Mɛni blɔhi a nɔ fiɛɛmi haa nɛ wa nane pii si ngɛ Mawu jami mi?
2 Wa Nane Pii Si Nɛ Wa Náa Jɔɔmi: Fiɛɛmi yeɔ bua wɔ nɛ wa jeɔ wa juɛmi kɛ jee mwɔnɛ ɔ haomi ɔmɛ a nɔ, nɛ wa juɛmi hii Matsɛ Yemi ɔ jɔɔmi ɔmɛ mohu a nɔ. (2 Kor. 4:18) Baiblo tsɔɔmihi a mi nɛ wa gbaa kɛ tsɔɔ nihi ɔ haa nɛ wa hemi kɛ yemi ngɛ Yehowa siwo ɔmɛ a mi ɔ mi waa, nɛ wa náa hɛsa babauu kɛ haa anɔkuale ɔ. (Yes. 65:13, 14) Benɛ wa yeɔ bua nihi nɛ a kɛ Yehowa nɛ ná huɛ bɔmi kpakpa konɛ a ‘je a he kɛ je je ɔ he’ ɔ, lɔɔ haa wɔ hu wa yi mi kpɔ mwɔmi kaa waa kɛ je ɔ be bɔe ɔ mi waa.—Yoh. 17:14, 16; Rom. 12:2.
3. Mɛni blɔ nɔ fiɛɛmi yeɔ bua wɔ nɛ wa kaseɔ Kristofoli a su kpakpahi?
3 Fiɛɛmi yeɔ bua wɔ nɛ wa kaseɔ Kristofoli a su kpakpahi. Nɔhyɛ nɔ́ ji, mɔde nɛ wa bɔɔ kaa wa ma ‘plɛ nɔ́ tsuaa nɔ́ kɛ ha nihi kulaa’ a, yeɔ bua wɔ nɛ wa kaseɔ he si bami. (1 Kor. 9:19-23) Ke waa kɛ “nihi nɛ pɔtɔ mɛ, nɛ a dɛ yaa kaa tohi nɛ be hyɛlɔ” sɛɛ ní ɔ, wa kaseɔ mi mi sami kɛ mɔbɔ nami. (Mat. 9:36) Benɛ wa yaa nɔ nɛ wa fiɛɛɔ ngɛ munyu ɔ tue nɛ a bui kɛ si temi kɛ womi tsuo se ɔ, lɔɔ haa wa kaseɔ tsui si tomi. Wa he nɛ waa kɛ haa nɛ wa yeɔ bua nihi ɔ haa wɔ bua jɔmi fuu.—Níts. 20:35.
4. Kɛ o naa o fiɛɛmi nítsumi ɔ kɛɛ?
4 E ji jɔɔmi kaa wa fiɛɛmi ɔ ngɔɔ yi jemi agbo kɛ haa Nɔ pɛ nɛ sa kaa wa ja lɛ ɔ! Fiɛɛmi nítsumi ɔ haa nɛ wa he waa ngɛ Mawu jami mi. Ke wa ngɔ wa he kɛ wo mi vii nɛ wa ‘ye sane kpakpa a he odase kɛ pi si’ ɔ, wa ma ná jɔɔmihi babauu.—Níts. 20:24.