Anɛ O Dla O He Kɛ Ha Sukuu Lo?
1. Mɛni he blɔ bli ha mo ngɛ sukuu?
1 Ke kpaako nyɛ yaa je sukuu ko sisi jio, nyɛ yaa je jeha kpa sisi ngɛ sukuu ɔ jio ɔ, nyɛ nihewi kɛ yihewi nɛ nyɛ ji Kristofoli, nyɛɛ kɛ ka kɛ haomi hehi maa kpe. Se, e ji he blɔ ehe nɛ́ nyɛ ná hulɔ nɛ nyɛɛ kɛ maa ‘ye anɔkuale ɔ he odase.’ (Yoh. 18:37) Anɛ nyɛ dla nyɛ he saminya nɛ nyɛ pee klaalo kaa nyɛ maa ye odase lo?
2. Mɛni blɔhi a nɔ o dla o he kɛ ha sukuu ngɛ?
2 Bɔnɛ pee nɛ nyɛɛ ye manye ngɛ si fɔfɔɛhi tsuo nɛ nyɛɛ kɛ maa kpe ngɛ nyɛ si himi mi ɔ, Yehowa, nyɛ fɔli, kɛ tsɔlɔ anɔkualetsɛ kɛ ní lelɔ ɔ tsɔse nyɛ bɔnɛ sa. (Abɛ 1:8; 6:20; 23:23-25; Efe. 6:1-4; 2 Tim. 3:16, 17) Amlɔ nɛ ɔ, atsinyɛ jemi ko be he kaa nyɛ le haomihi nɛ nyɛɛ kɛ maa kpe ngɛ sukuu. Akɛnɛ a tsɔse nyɛ nɛ nyɛ le Mawu suɔmi nya ní nɛ e sa kaa nyɛɛ pee, kɛ si fɔfɔɛ nɛ́ nyɛɛ kɛ maa kpe ngɛ sukuu ɔ heje ɔ, e sa nɛ nyɛ dla nyɛ he kɛ to kaa nyɛ maa ye nihi odase. (Abɛ 22:3) Nyɛ susu blɔ tsɔɔmi kɛ Ngmami ɔ mi ga womi kpakpahi nɛ ngɛ Young People Ask kpo kake kɛ enyɔ ɔ mi kɛ Awake! mi munyuhi nɛ kɔɔ nihewi kɛ yihewi a he nɛ baa daa he.
3. Mɛni blɔhi a nɔ o ma nyɛ maa ye odase ngɛ?
3 O zugba kpɔ nɛ ɔ ma ha mo he blɔ nɛ o ye odase ngɛ blɔhi fuu a nɔ. Ke nihi na bɔnɛ o dlaa o he ha, bɔnɛ o jemiba kɛ o munyu tutui ngɛ slɔɔto ha, bɔnɛ o buɔ sukuubi kpahi kɛ tsɔɔli ha, o mɔde bɔmi ngɛ nikasemi mi, kɛ sisi tomi kpakpa nɛ o ná ngɛ si himi mi ɔ, eko ɔ, a ma bi mo ke, “Mɛni heje nɛ o je ekpa a?” (Mal. 3:18; Yoh. 15:19; 1 Tim. 2:9, 10) Enɛ ɔ ma bli blɔ ha mo konɛ o ye mɛ odase nɛ o tsɔɔ mɛ níhi nɛ o heɔ yeɔ a nya. Eko ɔ, ngɛ jeha a tsuo mi ɔ, o kɛ ma he suɔmi ní peepeehi kɛ gbijlɔ yemi he kahi maa kpe. Ke a bi mo ke mɛni heje nɛ o kɛ o he wui mi ɔ, anɛ o ma de kɛkɛ ke, “Ye jami ɔ kplɛɛ we nɔ; Yehowa Odasefono ji mi,” aloo o maa ngɔ he blɔ ɔ nɛ o kɛ ye Yehowa, o Tsɛ nɛ ngɛ suɔmi ɔ he odase? Ke o dla o he saminya ngɛ Yehowa blɔ tsɔɔmi nya a, lɔɔ ma ha nɛ o pee klaalo kɛ ye o tsɔɔli, o sukuubi, kɛ ni kpahi odase saminya.—1 Pet. 3:15.
4. Mɛni ha o he ye kaa o ma nyɛ maa gblee sukuu mi slɔkee ɔ?
4 E ngɛ mi kaa eko ɔ, o maa ye gbeye kaa o maa ya sukuu lɛɛ, se ná nɛ o le kaa o ngɛ nihi fuu nɛ fi o se nɛ suɔ kaa o gblee sukuu mi slɔkee. Jehanɛ hu ɔ, wa bua jɔ kaa o ná he blɔ nɛ o kɛ maa ye odase ngɛ o zugba kpɔ nɛ́ ngɛ slɔɔto nɛ ɔ mi. Enɛ ɔ he ɔ, moo pee kã nɛ o dla o he kɛ ha sukuu!