Nyɛ Hla Nihi Nɛ Sa Amɛ
1. Mɛni blɔ nɔ wa maa gu kɛ tsɔɔ kaa wa ngɛ hɛsa ha he blɔ nɛ wa ná kaa wa maa fiɛɛ ha nihi ɔ?
1 Benɛ Yesu ngɛ sɔmɔmi nítsumi ɔ tsue ɔ, e bɔ mɔde wawɛɛ nɛ e ngɔ sane kpakpa a kɛ wo nihi nɛ baa a he si ɔ a bua. (Yes. 61:1, 2) Akɛnɛ wa ji Kristo nane mi dali kɛ tsɔli heje ɔ, wɔ hu wa ngɛ he blɔ agbo mwɔnɛ ɔ kaa wa maa kase lɛ nɛ wa hla nihi nɛ sa amɛ fitsofitso ngɛ wa zugba a kpɔ ɔ mi, nɛ pɔ ko tɔ wɔ.—Mat. 10:11; 2 Kor. 5:20.
2. Mɛni blɔ nɔ Paulo tsake e fiɛɛmi ɔ mi ngɛ, nɛ mɛni je mi kɛ ba?
2 Mo Tsake O Fiɛɛmi ɔ Mi: Bɔfo Paulo pɔɔ fiɛɛmi ha Yudabi kɛ ma jeli nɛ a tsake kɛ ba Yuda jami ɔ mi ngɛ kpe he ɔ. (Níts. 14:1) Benɛ e ya Filipi ɔ, e kɛ Sila ya ‘he nɛ a susu kaa nihi ya sɔleɔ ngɛ.’ A fiɛɛ ha yi komɛ, nɛ a kpɛti nɔ kake nɛ a tsɛɛ lɛ ke Lidia kplɛɛ anɔkuale ɔ nɔ amlɔ.—Níts. 16:12-15.
3. Ngɛ wehi a mi fiɛɛmi se ɔ, jije hu wa ma nyɛ maa fiɛɛ ha nihi ngɛ?
3 Ngɛ he nɛ o yaa wehi a mi fiɛɛmi ngɛ se ɔ, anɛ o ma nyɛ maa fiɛɛ ngɛ he kpahi nɛ o maa na nihi ngɛ, kaa lɔle sɛmi he, he nɛ nihi pɔɔ a he jɔɔmi ngɛ, nítsumi hehi, gbɛjegbɛhi nɛ nihi pɔɔ bemi ngɛ nɔ ɔ a he, juahi a nɔ, kɛ tsuapohi a nya ngɛ o zugba kpɔ ɔ mi lo? Eko ɔ, o ma nyɛ maa ngma nihi nɛ ngɛ wehi kɛ a nya agbohi nɛ buli hii a nya sɛ womi loo o fia mɛ tɛlifoo nɛ o kɛ ye mɛ odase. Ke wa toɔ níhi a he hɛ, nɛ wa tsakeɔ wa fiɛɛmi ɔ mi ɔ, e ma ha nɛ wa ma tsu “Nyɔmtsɛ ɔ nítsumi ɔ babauu.”—1 Kor. 15:58, NW.
4. Mɛni he blɔ kpahi wa ngɛ ke wa asafo ɔ zugba kpɔ ɔ klee we?
4 Fiɛɛli fuu ná he blɔ kaa a maa je asafo mi nɛ a ngɛ ɔ kɛ ya asafo kpahi a mi ngɛ mɛ nitsɛmɛ a ma mi loo ma se konɛ a ya tsu fiɛɛmi nítsumi ɔ babauu. Ni komɛ hu kase gbi kpa konɛ a nyɛ nɛ a ye bua nibwɔhi nɛ ba a kpɔ ɔ mi ɔ.
5. Mɛni juɛmi e sa kaa wa ná ngɛ be nɛ wa ngɛ mi ɔ he, nɛ mɛni e sa kaa waa ma wa juɛmi nya si kaa wa maa pee?
5 E sa nɛ e hi wɔ tsuo wa juɛmi mi kaa “ngmɔ ɔ ji je ɔ” nɛ. (Mat. 9:37; 13:38) Nɛ akɛnɛ je yaya nɛ ɔ nyagbe ɔ su haa heje ɔ, e sa nɛ wa ti nɔ tsuaa nɔ nɛ́ susu lɛ nitsɛ e si fɔfɔɛ, e nyɛmi, kɛ he blɔhi nɛ e ngɛ ɔ a he wawɛɛ, konɛ e hyɛ ha kaa e ma nyɛ ma bli e fiɛɛmi nítsumi ɔ mi lo. Yehowa wo wɔ si kaa ke wa ngɔ Matsɛ Yemi ɔ kɛ pee oti ngɛ wa si himi mi ɔ, e maa jɔɔ mɔde nɛ wa maa bɔ kaa wa ma bli wa fiɛɛmi nítsumi ɔ mi ɔ nɔ.—Mat. 6:33.