Blɔ Tsɔɔmi Kɛ Ha Nihi Nɛ A Haa Mɛ Nítsumi Ngɛ Sɔmɔmi Kpe ɔ Mi

Kɛ je Wa Matsɛ Yemi Sɔmɔmi ɔ womi nɛ ɔ nɔ kɛ yaa a, a maa po munyuhi nɛ a kɛ tsuɔ ní ngɛ Sɔmɔmi Kpe ɔ he blɔ nya tomi ɔ mi ɔ a nɔ kpiti. Blɔ tsɔɔmihi kɛ kaimihi nɛ nyɛɛ se nɛ ɔ tsɔɔ tsakemihi kɛ níhi a mi tsɔɔmihi fitsofitso nɛ a pee ngɛ munyu nɛ e yi ji, “Bɔnɛ O Ma Dla O He Kɛ Ha Sɔmɔmi Kpe ɔ,” nɛ je kpo ngɛ May 2009 Wa Matsɛ Yemi Sɔmɔmi ɔ mi ɔ mi.

◼ Munyu Tumi: Enɛ ɔ ji munyu tɛ̃ɛ nɛ nɔ nɛ a ngɔ nítsumi ɔ kɛ wo e dɛ ɔ daa womi nɛ a tsɔɔ lɛ kaa e hyɛ mi ɔ nɔ kɛ tuɔ nɛ e bi we tue buli munyu ngɛ mi. E sa kaa munyu tulɔ ɔ nɛ e tu níhi nɛ maa ye bua asafo ɔ he munyu titli.

◼ Sane Bimi Kɛ Heto Hami: A maa pee enɛ ɔ kaa bɔnɛ a peeɔ Watchtower Nikasemi ɔ; nɔ nɛ a ngɔ nítsumi ɔ kɛ wo e dɛ ɔ maa tu munyu kpiti kɛ bli e munyu ɔ nya, lɔɔ se ɔ, e ma bi sane ngɛ kuku ɔmɛ tsuo a mi nɛ e kɛ munyu kpiti hu maa mwɔ nya. E sɛ nɛ nɔ nɛ maa hyɛ nɔ ɔ nɛ e tu munyu fuu. Ke be ngɛ ɔ, a ma nyɛ maa kane ngmamihi nɛ ma oti ɔmɛ a nɔ mi ɔ. Ke a kɛ blɔ tsɔɔmi ko ha we kaa a kane kuku ɔmɛ a mi ɔ, a kó kane.

◼ Ní Sɛɛmi: Enɛ ɔ ji munyu tumi nɛ a ma bi tue buli hu munyu ngɛ mi. E pi munyu tumi pɛ kɛkɛ, nɛ e pi sane bimi kɛ heto hami hu pɛ kɛkɛ.

◼ Peemi Kɛ Tsɔɔ Kɛ Munyu Bimi: Ke a de nɔ nɛ a ngɔ nítsumi ɔ kɛ wo e dɛ ɔ kaa peemi kɛ tsɔɔ piɛɛ e nítsumi ɔ he ɔ, e ji e blɔ nya nítsumi kaa e hyɛ nɛ a pee peemi kɛ tsɔɔ ngɛ e munyu ɔ mi; e hla nihi nɛ a pee peemi kɛ tsɔɔ ɔ kɛ ha lɛ. E sa kaa nihi nɛ e maa hla konɛ a ye bua lɛ ɔ nɛ a pee nihi nɛ a ma nyɛ ma tsu ní ɔ, nɛ a peeɔ nɔ hyɛmi nɔ́ kpakpa; ke e maa hi ɔ, e sa kaa e kɛ mɛ nɛ to blɔ nya kɛ fɔ si momoomo loko be ɔ nɛ su. E ngɛ mi kaa a ma nyɛ ma ha nɛ ni hehi kɛ nihi nɛ a be níhi a si kpami tsɔ ɔ nɛ a pee wetsɛmɛ ngɛ peemi kɛ tsɔɔ ɔ mi mohu lɛɛ, se e maa hi wawɛɛ kaa a kó ha nɛ a pee peemi kɛ tsɔɔ nɛ kɔɔ bɔnɛ e sa kaa a tsu sɔmɔmi nítsumi ɔ ha a he kɛ susumi kaa mɛ hu a ná nítsumi ngɛ munyu tumi kpoku ɔ nɔ kɛkɛ. E sa kaa fiɛɛli nɛ a maa pee peemi kɛ tsɔɔ ɔ nɛ a plɛ a hɛ mi kɛ tsɔɔ tue buli ɔmɛ, a kó plɛ a se kɛ wo mɛ. E sa nɛ nihi nɛ a ma bi mɛ munyu ɔ nɛ a ya munyu tumi kpoku ɔ nɔ konɛ a ya bi mɛ munyu ɔ ngɛ lejɛ ɔ, e sɛ nɛ a hi si ngɛ tue buli ɔmɛ a kpɛti. E sa kaa a nylɔ peemi kɛ tsɔɔ kɛ munyu bimihi a mi saminya. Ke e ba mi kaa be ngɛ bee nɛ lɔɔ heje ɔ, nɔ nɛ a ngɔ nítsumi ɔ kɛ wo e dɛ ɔ maa po e nítsumi ɔ nɔ ɔ, e kó je peemi kɛ tsɔɔ ɔ loo munyu bimi ɔ ngɛ mi. E sa kaa asafo mi sɔmɔli nɛ a na nikɔtɔmahi a kuu ɔ sanehi a he blɔ nya tolɔ ɔ loo asafo mi nɔkɔtɔma kpa ko loko a hla nihi nɛ a kɛ mɛ ma tsu ní ɔ.

Ke a kɛ blɔ tsɔɔmihi pɔtɛɛ ha ngɛ bɔnɛ e sa kaa a tsu nítsumi ko he ní ha a, e sa kaa nɔ nɛ ma tsu he ní ɔ nɛ e kɛ blɔ tsɔɔmi ɔmɛ nɛ tsu ní pɛpɛɛpɛ. Ke nyɛmimɛ kɛ blɔ tsɔɔmihi nɛ ngɛ yinɔ ɔ tsu ní ngɛ Sɔmɔmi Kpe ɔ mi ɔ, lɔɔ ma ha nɛ Sɔmɔmi Kpe ɔ maa ya nɔ “bɔnɛ sa ngɛ blɔ nya tomi nya.”—1 Kor. 14:40.