Moo Ngɔ Kɛ Tsu Ní Saminya
1. Mɛni wa ma nyɛ maa ngɔ dɛ womi nɛ ji Anɛ O Suɔ Kaa O Le Anɔkuale ɔ Lo? ɔ kɛ pee?
1 E ngɛ mi kaa a pee dɛ womi nɛ ji Anɛ O Suɔ Kaa O Le Anɔkuale ɔ Lo? ɔ konɛ a kɛ je Baiblo mi nikasemi sisi mohu lɛɛ, se e ji womi nɛ hi saminya nɛ wa ma nyɛ maa da nɔ kɛ gbɛ anɔkuale ɔ kɛ fĩa. (Fiɛlɔ 11:6) Ga womihi nɛ nyɛɛ se nɛ ɔ maa ye bua wɔ konɛ waa ngɔ dɛ womi ɔ kɛ tsu ní saminya.
2. Mɛni blɔ nɔ wa maa da dɛ womi ɔ nɔ kɛ je ní sɛɛmi sisi ngɛ?
2 Moo Da Nɔ Kɛ Je Ní Sɛɛmi Sisi: O ma nyɛ maa ngɔ dɛ womi ɔ kɛ ha wetsɛ ɔ nɛ́ o ngɔ sane bimihi ekpa nɛ ngɛ womi ɔ se ɔ kɛ tsɔɔ lɛ nɛ o bi lɛ ke: “Sane bimi nɛ ɔmɛ a kpɛti te nɛ lɛ o susu he hyɛ?” Ke e ha mo heto ɔ, o kɛ lɛ nɛ susu sane bimi kake nɛ e bua jɔ he ngɛ womi ɔ mi ɔ he nɛ o kane ngmamihi nɛ a tsɛ se ɔ kake kɛ tsɔɔ lɛ. O ma nyɛ maa kane munyu nɛ ngɛ dɛ womi ɔ se ɔ kɛ tsɔɔ lɛ loo o maa po lɛ kpiti konɛ lɔɔ se ɔ, o ngɔ Baiblo Tsɔɔmi womi ɔ kɛ ha lɛ. Ke e ngɔɛ Baiblo Tsɔɔmi womi ɔ po ɔ, e ngɔ dɛ womi ɔ momo, nɛ enɛ ɔ maa ye bua lɛ nɛ anɔkuale ɔ maa sɛ e tsui mi.—Mat. 13:23.
3. Ke wetsɛ ɔ be deka a, mɛni wa ma nyɛ maa pee?
3 Ke Wetsɛ ɔ Be Deka: O ma nyɛ ma de ke: “Akɛnɛ o be deka heje ɔ, ma suɔ nɛ ma si dɛ womi nɛ ɔ ha mo. A ngma sane bimihi ekpa nɛ a he hia nɛ wa ti nihi babauu bi hyɛ ngɛ dɛ womi nɛ ɔ mi, nɛ a da Baiblo ɔ nɔ kɛ ha sane bimi nɛ ɔ eko tsuaa eko heto ngɛ mi. I kpa mo pɛɛ, ke i kpale kɛ ba slaa mo ekohu ɔ, ma suɔ nɛ ma le bɔnɛ o susu ngɛ sane bimi nɛ ɔmɛ a he ha.”
4. Ke wa ngɛ fiɛɛe ngɛ gbɛjegbɛ he nɛ wa ma ha nɔ ko dɛ womi ɔ eko ɔ, mɛni wa ma nyɛ ma de?
4 Ke Wa Ngɛ Fiɛɛe Ngɛ Gbɛjegbɛ He: O ma nyɛ ma de ke: “I kpa mo pɛɛ, anɛ o bi sane nɛ ɔmɛ eko hyɛ lo? [Ngmɛɛ lɛ blɔ nɛ e ha heto.] Womi nɛ ɔ ngɔ hetohi nɛ a mi tɛ̃ nɛ a maa na ngɛ Baiblo ɔ mi kɛ ha.” Ke nɔ ɔ yi oya a, o kɛ lɛ ma nyɛ ma susu heto ɔmɛ a kpɛti kake he ngɛ dɛ womi ɔ mi, nɛ o ma nyɛ ma ha lɛ Baiblo Tsɔɔmi womi ɔ po.
5. Be komɛ ɔ, ke waa kɛ dɛ womi ɔ ya nihi a wehi a mi nɛ wa ya nɛ́ mɛ ngɛ we ɔmɛ a mi ɔ, mɛni wa ma nyɛ maa pee?
5 Ke Wa Ya Ná We Nihi Ngɛ We Mi: Ngɛ zugba kpɔ komɛ a mi ɔ, ke fiɛɛli ya wehi a mi nɛ a ya nɛ́ nɔ ko ngɛ we ɔmɛ a mi ɔ, a pɔɔ womi simi ngɛ he nɛ wetsɛ ɔmɛ pɛ maa na ngɛ. Ke nyɛ we asafo ɔ hu peeɔ jã a, lɛɛ be komɛ ɔ, o ma nyɛ ma si dɛ womi nɛ ji, Anɛ O Suɔ Kaa O Le Anɔkuale ɔ Lo? ɔ ngɛ wehi nɛ o ya nɛ́ nihi ngɛ a mi ɔ mi. Ke o kpale o se kɛ ya a, o ma nyɛ ma de ke: “Wa ba hiɛ ɔ lingmi se wa ba nɛ́ mo ngɛ we ɔ mi nɛ wa ngɔ womi nɛ ɔ eko kɛ wo o sinya a sisi. Sane bimi nɛ ɔmɛ a kpɛti te nɛ lɛ o maa suɔ nɛ a ha mo e heto?”
6. Mɛni ha nɛ dɛ womi nɛ ji, Anɛ O Suɔ Kaa O Le Anɔkuale ɔ Lo? ɔ hi saminya kɛ ha fiɛɛmi nítsumi ɔ?
6 A tsɔɔ anɔkuale ɔ mi ngɛ dɛ womi nɛ ji, Anɛ O Suɔ Kaa O Le Anɔkuale ɔ Lo? ɔ mi ngɛ blɔ nɛ e sisi numi yi nɛ ngɛ tɛ̃ɛ nɔ. Nihi tsuo nɛ a ngɛ jami slɔɔtoslɔɔtohi a mi nɛ a peeɔ a ní ngɛ blɔ ekpaekpahi a nɔ ɔ bua maa jɔ he. E kɛ hami yi; jokuɛwi kɛ fiɛɛli hehi po ma nyɛ maa ngɔ kɛ ha nihi. Anɛ o ngɔɔ kɛ tsuɔ ní ngɛ be nɛ sa mi lo?