Wa Jɔɔ We Nítsumi Gblee
1. Kɛ wa plɛ kɛ le kaa sane kpakpa fiɛɛli nɛ a hi si blema a jɔɔ we nítsumi gblee kɛɛ?
1 Sane kpakpa fiɛɛli nɛ a ngɛ kã nɛ a hi si blema a fiɛɛ sane kpakpa a ngɛ he tsuaa he nɛ nihi ngɛ nɛ́ a kpa we. (Níts. 5:42) Enɛ ɔ tsɔɔ we kaa ke a yaa fiɛɛ ngɛ wehi a mi nɛ a kɛ nihi kpe ngɛ blɔ ɔ nɔ ɔ, a beɔ a he nɛ a fiɛɛ we ha mɛ. Jã nɔuu kɛ̃ nɛ e tsɔɔ we kaa ke a be fiɛɛmi tso mi nɛ a yaa he ní ngɛ jua mi nɛ a ná he blɔ ɔ, a yi nihi odase. Kaa bɔnɛ Yesu pee ɔ, mɛ hu a jɔɔ we nítsumi gblee.—Mar. 6:31-34.
2. Biɛ nɛ a kɛ tsɛɛɔ wɔ ɔ tsɔɔ kaa waa pee mɛni?
2 Moo Pee Klaalo Be Tsuaa Be: Biɛ nɛ a kɛ tsɛɛɔ wɔ nɛ ji Yehowa Odasefoli ɔ kɔ we nítsumi nɛ wa tsuɔ ɔ pɛ he, mohu ɔ, e tsɔɔ nimli nɛ wa ji. (Yes. 43:10-12) Enɛ ɔ he ɔ, ke wa fiɛɛ we ngɛ wehi a mi po ɔ, wa peeɔ klaalo kaa be tsuaa be ɔ, wa ma fã wa hemi kɛ yemi ɔ he. (1 Pet. 3:15) Ke o be fiɛɛmi tso mi ɔ, anɛ o susuɔ si himi komɛ nɛ ma nyɛ ma ha nɛ o ye nihi odase, kɛ eko ɔ, nɔ́ nɛ o ma de ɔ he lo? Anɛ o hɛɛɔ asafo ɔ womi ɔ eko konɛ o kɛ nihi nɛ a bua jɔ munyu ɔ he ɔ nɛ susu he lo? (Abɛ 21:5) Anɛ wehi a mi pɛ nɛ o fiɛɛɔ ngɛ lo, aloo o fiɛɛɔ sane kpakpa a kɛ haa nihi ngɛ si fɔfɔɛ slɔɔtoslɔɔtohi a mi ke a si himi ngmɛ mɛ blɔ lo?
3. Mɛni heje nɛ e he hia wawɛɛ kaa waa fiɛɛ ngɛ gbɛjegbɛhi a he, lɔle mami hehi, pakihi a nɔ, nítsumi hehi, kɛ he kpahi ɔ?
3 Odase Nɛ A Yeɔ Ngɛ He Tsuaa He: Wa fiɛɛɔ ngɛ gbɛjegbɛhi a he, lɔle mami hehi, pakihi a nɔ, nítsumi hehi, kɛ he kpahi. Anɛ ke nɔ ko suɔ loko e sa nɛ e fiɛɛ ngɛ hehi kaa kikɛ ɔ lo? Bɔfo Paulo de ke e fiɛɛ ngɛ “ma nɔ” kɛ wehi a mi. (Níts. 20:20) Wehi a mi fiɛɛmi nítsumi ɔ ji blɔ nɛ pi si nɛ wa guu nɔ kɛ naa nihi nɛ wa fiɛɛ Matsɛ Yemi sɛgbi ɔ kɛ haa mɛ. Se sane kpakpa fiɛɛli nɛ a hi si blema a kɛ a juɛmi ma nimli a nɔ mohu pe wehi. A kɛ he blɔ tsuaa he blɔ nɛ a náa a tuɔ anɔkuale ɔ he munyu—ngɛ ma mi, be mi nɛ a be fiɛɛmi tso mi, kɛ wehi a mi. Nyɛ ha nɛ wɔ hu waa kɛ wa juɛmi nɛ ma nimli a nɔ konɛ waa gbe wa sɔmɔmi nítsumi ɔ nya kɛ pi si.—2 Tim. 4:5.