Anɛ O Suɔ Kaa O Maa Pee Tsakemi Lo?
1. Akɛnɛ je ɔ ngɛ tsakee heje ɔ, mɛni tsakemi nɛ e sa kaa wa pee?
1 Ngɛ 1 Korintobi 7:31, (NW) ɔ, Baiblo ɔ tsɔɔ kaa je ɔ ngɛ tsakee. Akɛnɛ je ɔ ngɛ tsakee heje ɔ, ke e ngɛ mi hluu ɔ, e biɔ nɛ waa pee tsakemi ngɛ blɔhi a nɔ nɛ wa guɔ kɛ fiɛɛ ɔ, be nɛ waa kɛ yaa fiɛɛmi, kɛ bɔnɛ wa fiɛɛɔ ha a he. Anɛ o suɔ kaa o maa pee tsakemi lo?
2. Mɛni heje nɛ e sa nɛ waa pee tsakemi konɛ waa kɛ asafo ɔ nɛ nyɛɛ pɛpɛɛpɛ ɔ?
2 Blɔhi A Nɔ Nɛ O Guɔ Kɛ Fiɛɛɔ: Kristofoli asafo ɔ pee tsakemi babauu. Sisije benɛ Yesu tsɔ e kaseli ɔmɛ ɔ, e de mɛ ke a ko hɛɛ ní balɔ kotoku loo sika. (Mat. 10:9, 10) Se pee se ɔ, e pee tsakemi ngɛ blɔ tsɔɔmi nɛ ɔ he, ejakaa e le kaa be maa su nɛ e kaseli ɔmɛ kɛ si temi kɛ womi maa kpe, nɛ a ma tsu fiɛɛmi nítsumi ɔ hu ngɛ zugba kpɔ kpahi a mi. (Luka 22:36) Ngɛ jeha lafa nɛ be ɔ mi ɔ, Yehowa asafo ɔ gu blɔ slɔɔtohi a nɔ nɛ a kɛ fiɛɛ—ekomɛ ji, womi nyafinyafihi nɛ a kɛ yeɔ odase, fiɛɛmi ngɛ radio nɔ, kɛ lɔle nɛ a kɛ fiɛɛɔ—kaa bɔnɛ hiami ɔ ji ha ngɛ jamɛ a be ɔ mi ɔ. Amlɔ nɛ ɔ, akɛnɛ nihi puɛ we mi himi heje ɔ, a ma nɔ mi si abɔ kaa waa ngɔ magbɛ nɔ fiɛɛmi kɛ odase nɛ a yeɔ be mi nɛ a be fiɛɛmi tso mi kɛ piɛɛ fiɛɛmi ngɛ wehi a mi ɔ he. Jehanɛ hu, a wo wɔ he wami kaa waa ya wehi a mi fiɛɛmi gbɔkuɛ nya si ke nihi yaa nítsumi mɔtu ɔ. Ke Yehowa asafo ɔ pee tsakemi ɔ, anɛ wa nyɛɛɔ ngɛ tsakemi ɔ nya lo?—Eze. 1:20, 21.
3. Mɛni blɔ nɔ nɛ ke wa tsake wa munyu ɔ mi ɔ, e maa ye bua wɔ nɛ wa fiɛɛmi nítsumi ɔ maa wo yiblii ngɛ wa zugba kpɔ ɔ mi?
3 Munyu Nɛ O Fiɛɛɔ: Mɛni lɛ ngɛ nihi nɛ a ngɛ o kpɔ ɔ mi ɔ haoe amlɔ nɛ ɔ? Je ɔ sika he blɔ nya tomi lo? Weku si himi lo? Ta lo? E he hia nɛ waa le nyagbahi kɛ nihi nɛ a ngɛ wa zugba kpɔ ɔ mi ɔ a sifɔfɔɛhi konɛ wa dla munyuhi nɛ a bua maa jɔ he. (1 Kor. 9:20-23) Ke wetsɛ ɔmɛ wo sane ko nɔ ɔ, e sɛ nɛ waa je nya eko kɛ eko nɛ́ wa de mɛ munyu nɛ wa hɛɛ ɔ, mohu ɔ, e maa hi wawɛɛ kaa wa maa tsake wa munyu ɔ konɛ e kɔ a sane ɔ he.
4. Mɛni heje nɛ e sa nɛ waa pee tsakemi oya a?
4 E piɛ bɔɔ nɛ amanehlu ngua a maa je sisi. “Be ɔ pi hu.” (1 Kor. 7:29) Enɛ ɔ he ɔ, e he hia kaa waa maa pee tsakemi mlamlaamla, konɛ wa nyɛ nɛ waa pee babauu ngɛ be bɔɔ nɛ piɛ nɛ ɔ mi!