Nyɛɛ Kase Gbali Ɔmɛ A Nɔ Hyɛmi Nɔ́ ɔ—Yoel
1. Mɛni blɔ nɔ wa ma nyɛ maa gu kɛ kase Yoel he si bami ɔ ngɛ wa fiɛɛmi nítsumi ɔ mi?
1 Mɛnɔ ji gbalɔ Yoel? Nɔ́ nɛ e de ngɛ e he pɛ ji kaa e ji “Petuel bi nyumu.” (Yoel 1:1) Gbalɔ nɛ ngɛ he si bami nɛ ɔ gbla juɛmi kɛ ya Yehowa sɛ gbi ɔ nɔ, se pi e nítsumi kaa tsɔlɔ ɔ nɔ. Jã kɛ̃ nɛ ngɛ wa fiɛɛmi nítsumi ɔ mi ɔ, wa gblaa nihi a juɛmi kɛ yaa Yehowa kɛ Baiblo ɔ nɔ mohu pe nɛ wa maa gbla nihi a juɛmi kɛ ba wɔ nitsɛmɛ wa nɔ. (1 Kor. 9:16; 2 Kor. 3:5) Jehanɛ hu, sɛ gbi nɛ wa fiɛɛɔ ɔ woɔ wɔ he wami. Mɛni ji Yoel gbami ɔ mi munyu komɛ nɛ ma nyɛ ma ha nɛ wa ná kã kɛ hɛ kɛ nɔ fɔmi mwɔnɛ ɔ?
2. Mɛni nɛ e sa kaa Yehowa ligbi ɔ nɛ su si ta a nɛ e wo wɔ he wami nɛ waa pee?
2 ‘Yehowa Ligbi ɔ Su Ta.’ (Yoel 1:15): E ngɛ mi kaa a ngma munyu nɛ ɔ jeha ayɔhi ji nɛ ɔ mohu lɛɛ, se wa ngɛ e nyagbe mi bami be ɔ mi. Je ɔ mi si himi nɛ mi ngɛ wae, nihi a bua nɛ jɔɛ wa munyu ɔ he, kɛ wa he fɛu nɛ́ nihi yeɔ ɔ ji odase yemi nɛ tsɔɔ kaa wa ngɛ je ɔ nyagbe ligbi ɔmɛ a mi. (2 Tim. 3:1-5; 2 Pet. 3:3, 4) Ke wa susu bɔnɛ nyagbe ɔ su si ta ha a he ɔ, e haa nɛ wa naa kaa e sa nɛ waa kɛ fiɛɛmi nítsumi ɔ nɛ pee oti ngɛ wa si himi mi.—2 Pet. 3:11, 12.
3. Be mi nɛ amanehlu ngua a ma nɛ ɔ, mɛni heje nɛ fiɛɛmi nítsumi ɔ he hia wawɛɛ ɔ?
3 ‘Yehowa Ji Wesa He Kɛ Ha E Webi.’ (Yoel 3:16): Mimiɛmi nɛ a tu he munyu ngɛ kuku nɛ ɔ mi ɔ ma nyɛ ma kɔ kojomi nɛ Yehowa kɛ maa ba ngɛ amanehlu ngua a mi ɔ pɛ he. Lemi nɛ wa le kaa Yehowa ma he e sɔmɔli anɔkualetsɛmɛ a yi wami ngɛ jamɛ a be ɔ mi ɔ woɔ wa bua. (Kpoj. 7:9, 14) Be mi nɛ waa kɛ wa he woɔ fiɛɛmi nítsumi ɔ mi, nɛ wa naa bɔnɛ Yehowa yeɔ bua wɔ nɛ e woɔ wɔ he wami ha a, e haa nɛ wa náa hemi kɛ yemi kɛ tsui si tomi nɛ maa ye bua wɔ ngɛ amanehlu ngua nɛ ma a mi.
4. Mɛni heje nɛ e sa kaa wa bua nɛ jɔ, nɛ waa kɛ hemi kɛ yemi nɛ hyɛ hwɔɔ se be nɛ ma a blɔ ɔ?
4 E ngɛ mi kaa ni komɛ tsɔɔ kaa Yoel sɛ gbi ɔ woɔ nɔ he gbeye mohu lɛɛ, se e haa nɛ Mawu webi náa hɛ kɛ nɔ fɔmi kaa a ma he a yi wami. (Yoel 2:32) Lɛɛ nyɛ ha nɛ waa kɛ hemi kɛ yemi nɛ hyɛ hwɔɔ se be nɛ ma a blɔ, nɛ waa kɛ kã nɛ fiɛɛ Matsɛ Yemi he sane kpakpa a, konɛ waa kɛ munyu nɛ ngɛ Yoel 2:23 ɔ nɛ tsu ní. Lejɛ ɔ ke: ‘Nyɛ nya nɛ nyɛ bua nɛ jɔ ngɛ nɔ́ nɛ Yehowa, nyɛ Mawu ɔ pee ha nyɛ ɔ he.’