Mo Kɛ Ma O Hɛ Mi Kaa O Maa Pee Nihi Kaseli
1. Mɛni nɛ e sa nɛ waa pee konɛ nihi a yi nɛ ná wami?
1 Jeha 2014 fiɛɛmi ní tsumi ɔ he akɔtaa bumi ɔ tsɔɔ kaa Mawu we bi ngɛ Matsɛ Yemi ɔ he sane kpakpa a fiɛɛe kɛ kã. (Mat. 24:14) Kɛ gu wehi a mi fiɛɛmi, kɛ ma nɔ odase yemi, kɛ nine fɔmi womihi, kɛ dɛ womihi nɛ wa gbaa ngɛ be pɔtɛɛ komɛ a mi ɔ nɔ ɔ, wa ngɛ sane kpakpa a fiɛɛe ha nihi babauu pe be ko nɛ be ɔ. Se loko nihi a yi ma ná wami ɔ, ja waa kɛ mɛ kase Baiblo ɔ nɛ a ba pee Yesu kaseli.—1 Tim. 2:4.
2. Mɛni sanehi nɛ ke wa bi wa he ɔ, e maa ye bua wɔ konɛ waa pee Baiblo mi ní kasemi?
2 Pee Klaalo Kaa O Kɛ Nihi Maa Kase Baiblo ɔ: Ke o na kaa nɔ ko bua jɔ munyu ɔ he ɔ, anɛ o bɔɔ mɔde nɛ o ngɔɔ e tɛlifoo nɔma, kɛ e adrɛs, nɛ o ya slaa lɛ konɛ o kɛ lɛ nɛ je Baiblo mi ní kasemi sisi lo? Mɛni be nɛ o tsɔɔ wetsɛ ko bɔ nɛ waa kɛ nihi kaseɔ Baiblo ɔ ha kekleekle ligbi nɛ o na lɛ ɔ? Anɛ o de nɔ ko nɛ o haa lɛ wa womi tɛtlɛɛ ɔmɛ daa nyɔhiɔ ɔ kaa o suɔ nɛ o kɛ lɛ nɛ kase Baiblo ɔ lo? Anɛ o je Mɛni He Je Nɛ E Sa Kaa Waa Kase Baiblo ɔ? kɛ Kɛ Wa Peeɔ Baiblo Mi Ní Kasemi Ha Kɛɛ? video ɔmɛ kɛ tsɔɔ nihi nɛ o kɛ mɛ tsuɔ ní, o sukuu bi, o weku li, kɛ ni kpahi nɛ o le mɛ ɔ lo? Ke o ngɛ odase yee ngɛ ma nɔ, nɛ nɔ ko ba ngɔ womihi nɛ o to ngɛ atsɛ̃se ɔ nɔ ɔ eko ɔ, anɛ o bɔɔ mɔde nɛ o deɔ nɔ ɔ kaa waa kɛ nihi kaseɔ Baiblo ɔ nɛ wa he we sika lo?
3. Mɛni nɛ wa hia konɛ wa nyɛ nɛ waa tsɔɔ nihi anɔkuale ɔ saminya?
3 Yehowa Kɛ Yesu Maa Ye Bua Mo: Loko Yesu ma de ke, “nyɛɛ pee mɛ ye kaseli” ɔ, e sɛ hlami nɛ e fa ke, “nyɛɛ ya.” Yesu ngɛ tsɔɔe kaa e sa nɛ waa bɔ mɔde nɛ waa ya nihi a ngɔ, nɛ wa hla blɔ slɔɔtohi nɛ wa ma nyɛ maa gu nɔ kɛ ye nihi odase. Se e si we ní tsumi ɔ kɛ fɔɛ wa nɔ, ejakaa e wo wɔ si kaa e maa piɛɛ wa he. (Mat. 28:19, 20) Jehanɛ se hu ɔ, Yehowa tsɔse wɔ, nɛ e ha wɔ e mumi klɔuklɔu ɔ, kɛ ní kpahi nɛ maa ye bua wɔ konɛ waa tsɔɔ nihi anɔkuale ɔ. (Zak. 4:6; 2 Kor. 4:7) Wa ma nyɛ maa sɔle konɛ wa ‘ná bua jɔmi, kɛ he wami’ nɛ wa kɛ tsu ní tsumi nɛ he hia nɛ ɔ.—Filip. 2:13.
4. Mɛni he je nɛ e sa nɛ wa kɛ ma wa hɛ mi kaa wa maa pee nihi kaseli ɔ?
4 E ngɛ mi kaa sane kpakpa a nɛ wa fiɛɛ ɔ haa nɛ wa bua jɔɔ mohu lɛɛ, se ke wa tsɔɔ nɔ ko anɔkuale ɔ, nɛ e ba piɛɛ wa he ngɛ ‘blɔ nɛ kɛ nɔ yaa wami mi ɔ’ nɔ ɔ, wa bua jɔɔ wawɛɛ. (Mat. 7:14; 1 Tes. 2:19, 20) Akɛnɛ ‘Yehowa sume nɛ nɔ ko hɛ mi nɛ kpata, se mohu nɔ tsuaa nɔ nɛ tsake e tsui’ he je ɔ, ke waa kɛ nihi kase Baiblo ɔ, nɛ wa bɔ mɔde kaa wa maa ye bua mɛ konɛ a ba pee kaseli ɔ, Yehowa bua maa jɔ wa he.—2 Pet. 3:9.