Wa Peeɔ Kake Kɛ Fiɛɛɔ Ngɛ Zugba Kpɔ Nɛ A Tuɔ Gbi Slɔɔtohi Ngɛ Mi ɔ Mi

Nihi pɔɔ Matsɛ Yemi ɔ he sane kpakpa a tue bumi ke ji kaa a nu ngɛ mɛ nitsɛmɛ a je gbi mi. Eko ɔ, enɛ ɔ he je nɛ ngɛ jeha 33 ɔ mi ngɛ Pentekoste ligbi ɔ nɔ ɔ, Yehowa to blɔ nya konɛ ‘Yuda bi nɛ a yeɔ lɛ gbeye nɛ a je je ma fɛɛ je ma nɛ e ngɛ hiɔwe sisi ɔ mi ɔ’ nɛ a bu sane kpakpa a tue ngɛ ‘mɛ nitsɛmɛ a je gbi mi,’ e ngɛ mi kaa eko ɔ, a tuɔ Hebri loo Hela gbi nɛ pɔ he ɔ mohu lɛɛ. (Nít 2:5, 8) Ngɛ hehi nɛ a tuɔ gbi slɔɔtohi ngɛ mwɔnɛ ɔ, eko ɔ, asafohi nɛ a kpeɔ ngɛ gbi slɔɔtohi a mi ɔ ma tsu zugba kpɔ kake mi ní. Mɛni blɔ nɔ nɛ fiɛɛli nɛ a ngɛ asafo nɛ ɔmɛ a mi ɔ maa gu kɛ pee kake kɛ ye nɔ fɛɛ nɔ odase ngɛ zugba kpɔ ɔ mi konɛ a ko ya wetsɛ kake ngɔ si abɔ nɛ e mi mi ko fu?

• 

  Nyɛ susu níhi a he (Abɛ 15:22): E sa nɛ sɔmɔmi ní tsumi nɔ hyɛli ɔmɛ nɛ a pee kake kɛ susu níhi a he nɛ a hla blɔhi a nɔ nɛ asafo ɔmɛ tsuo nɛ a ngɛ zugba kpɔ ɔ mi ɔ maa gu nɔ kɛ fiɛɛ sane kpakpa a ngɛ blɔ nɛ da nɔ. Asafohi nɛ a fiɛɛɔ ɔ ngɛ gbi kpahi a mi ɔ maa suɔ kaa nyɛɛ po wehi nɛ a tuɔ gbi kpa ngɛ mi ɔ kɛ fɔ si. Se e ma nyɛ maa ba kaa a zugba kpɔ ɔ kle, enɛ ɔ he ɔ, a be nyɛe ma tsu mi ní kpamisaa. Ke e ba lɛ jã a, a ma nyɛ maa ngmɛ nyɛ blɔ konɛ nyɛɛ slaa wehi nɛ ngɛ a zugba kpɔ ɔ mi ɔ, konɛ ke ni komɛ ngɛ munyu ɔ he bua jɔmi ɔ, nyɛ ha mɛ lemi. (od-E 93 ¶37) Aloo eko ɔ, a ma bi nɛ nyɛ we asafo ɔ nɛ ye bua mɛ konɛ a nine nɛ su nihi nɛ a tuɔ gbi nɛ a we asafo ɔ tuɔ a nɔ. Mo kadi kaa we komɛ ngɛ nɛ a tuɔ gbi slɔɔtohi ngɛ mi. E sa nɛ blɔ nya tomi kɛ ha zugba kpɔ ɔ mi ní tsumi ɔ kɛ ma a mlaa nɛ kɔ.

• 

  Ngɔɔ blɔ tsɔɔmi kɛ tsu ní (Efe 4:16): Ngɔɔ blɔ tsɔɔmi fɛɛ blɔ tsɔɔmi nɛ sɔmɔmi ní tsumi nɔ hyɛlɔ ɔ kɛ ma ha a kɛ tsu ní saminya. Anɛ o kɛ nɔ ko ngɛ Baiblo ɔ kasee, se gbi nɛ e suɔ ɔ, pi lɔ ɔ nɛ nyɛ we asafo ɔ tuɔ lo? Ke o to blɔ nya nɛ nɔ ko nɛ ngɛ asafo aloo kuu nɛ a tuɔ gbi nɛ e suɔ ɔ mi kɛ lɛ ba kase ní ɔ, eko ɔ, ní kaselɔ ɔ maa ya e hɛ mi mlamlaamla.

• 

  Dla o he (Abɛ 15:28; 16:1): Ke wetsɛ ko nɛ́ e tuɔ gbi kpa ngɛ o zugba kpɔ ɔ mi ɔ, moo bɔ mɔde kaa o maa fiɛɛ sane kpakpa a kɛ tsɔɔ lɛ. Loko o ma nyɛ ma dla o he saminya a, e biɔ nɛ o le gbi slɔɔtohi nɛ nihi tuɔ ngɛ o kpɔ ɔ mi. Moo sɛ hlami nɛ o gbla Baiblo sisi tsɔɔmihi kɛ videohi ngɛ gbi nɛ ɔmɛ a mi kɛ pue o mobile fon aloo o dɛ mi kɔmpiuta a nɔ. O ma nyɛ maa ngɔ JW Language app ɔ kɛ kase bɔ nɛ a ngaa nɔ ha ngɛ gbi nɛ ɔmɛ a mi.