Fiɛɛmi Klɛdɛɛ Nɛ A Kɛ Maa Je Baiblo Mi Ní Kasemi Sisi Ngɛ September Nyɔhiɔ ɔ Mi

Ngɛ September nyɔhiɔ ɔ mi ɔ, wa maa ngɔ O Ma Nyɛ Ma Ná Bua Jɔmi Kɛ Ya Neneene! womiyo ɔ kɛ je Baiblo mi ní kasemi sisi ngɛ we fɛɛ we mi. Fiɛɛli ma nyɛ maa ngɔ a he kɛ wo blɔ gbali a wami ní tsumi ɔ mi nɛ a kɛ ngmlɛfia 30 ma tsu ní. Kɛ wa ma tsu fiɛɛmi klɛdɛɛ nɛ ɔ ha kɛɛ?

• Ngɛ Kekle Ligbi Nɛ O Ya Na Nɔ Ko ɔ Nɔ: Moo ngɔ sane bimi nɛ ngɛ womiyo ɔ se ɔ kɛ tle wetsɛ ɔ bua jɔmi si, nɛ o tsɔɔ lɛ bɔ nɛ waa kɛ nihi kaseɔ Baiblo ɔ ha. O hɛ nɛ hi nihi nɛ a bua jɔ sɛ gbi ɔ he, nɛ́ o ya ngɛ mɛ slaae ɔ a nɔ. Ke a ji nihi nɛ be ko nɛ be ɔ, a buɔ jɔɛ Baiblo ɔ kasemi he po ɔ, eko ɔ, a bua maa jɔ womiyo ehe kɛ blɔ ehe nɛ wa guɔ nɔ nɛ waa kɛ nihi kaseɔ Baiblo ɔ he. E sɛ nɛ wa si womiyo ɔ ngɛ nihi nɛ a be we mi ɔ a sinya nya loo wa kɛ piɛɛ sɛ womi he kɛ mane nihi nɛ be ko nɛ be ɔ, a bua jɔɛ munyu ɔ he ɔ. Eko ɔ, nyɛ we Asafo Mi Sɔmɔmi Ajla Toli ɔmɛ maa to fiɛɛmi yami kpe kpa he blɔ nya kɛ piɛɛ fiɛɛmi yami blɔ nya tomi nɛ nyɛ ngɛ momo ɔ he ngɛ jamɛ a nyɔhiɔ ɔ mi.

• Ní Kpahi Nɛ Wa Ma Nyɛ Maa Pee: Ke nyɛ we asafo ɔ kɛ atsɛ̃sehi tsuɔ ní ɔ, nyɛɛ ngɔ O Ma Nyɛ Ma Ná Bua Jɔmi Kɛ Ya Neneene! womiyo ɔ kɛ wo mi. Ha nɛ nihi nɛ a bua jɔ womiyo ɔ he ɔ nɛ a le kaa a kɛ mɛ ma nyɛ maa kase Baiblo ɔ nɛ a be mɛ nɔ́ ko hee. Moo tsɔɔ lɛ bɔ nɛ waa kɛ nihi kaseɔ Baiblo ɔ ha a kpiti, loo o ma nyɛ maa tsɔɔ lɛ pee se. Sɔmɔmi ní tsumi nɔ hyɛlɔ ɔ ma nyɛ maa to blɔ nya kɛ ha fiɛɛli nɛ a he sa a nɛ a ya fiɛɛ ngɛ ní tsumi hehi nɛ ngɛ zugba kpɔ ɔ mi ɔ mi, nɛ́ a kɛ nihi nɛ je Baiblo mi ní kasemi sisi. O kɛ nihi nɛ o kɛ mɛ tsuɔ ní loo nihi nɛ o ye mɛ odase be mi nɛ o be fiɛɛmi mi ɔ hu ma nyɛ maa je Baiblo mi ní kasemi sisi.

Yesu fã wɔ kaa waa ‘pee nihi kaseli’ nɛ waa ‘tsɔɔ mɛ ní.’ (Mat 28:19, 20) Fiɛɛmi klɛdɛɛ nɛ ɔ nɛ ye bua wɔ nɛ́ wa nyɛ nɛ waa su oti nɛ ɔ he be mi nɛ waa kɛ O Ma Nyɛ Ma Ná Bua Jɔmi Kɛ Ya Neneene! ɔ ngɛ ní tsue ɔ.