‘Mo Tsɛ Nikɔtɔma Amɛ’

1. Mɛni Yehowa pee kɛ tsɔɔ kaa e jijɔ ɔmɛ a he jua wa ha lɛ wawɛɛ?

YEHOWA sɔmɔli a he jua wa ha lɛ, ejakaa e ngɔ e Bi ɔ muɔ ɔ kɛ he mɛ. E ngɔ mɛ kɛ wo asafo mi nikɔtɔma amɛ a dɛ konɛ a hyɛ a nɔ. (Níts. 20:28) Mawu suɔ kaa nikɔtɔma amɛ nɛ a hyɛ e jijɔ ɔmɛ a nɔ saminya. Mawu hla Yesu kaa asafo ɔ yi. Mawu kɛ Yesu tsuo suɔ nɛ asafo mi nikɔtɔma amɛ kɛ jijɔ ɔmɛ nɛ a hi si ngɛ mi mi jɔmi mi. Asafo mi nikɔtɔma amɛ ngɔɔ Yesu blɔ tsɔɔmihi kɛ tsuɔ ní, nɛ a yeɔ buaa jijɔ ɔmɛ konɛ huɛ bɔmi kpakpa nɛ hi a kɛ Yehowa a kpɛti.—Yes. 32:​1, 2.

2. Mɛnɔmɛ titli nɛ Yehowa susuɔ a he wawɛɛ? (Ezekiel 34:​15, 16)

² Yehowa susuɔ e jijɔ ɔmɛ tsuo a he wawɛɛ, titli ɔ, ni nɛmɛ nɛ a ngɛ nɔ́ nae ɔ. Yehowa guɔ asafo mi nikɔtɔma amɛ a nɔ kɛ yeɔ buaa nihi nɛ a tɔ̃, nɛ́ lɔ ɔ ha nɛ a ngɛ haoe ɔ. (Kane Ezekiel 34:​15, 16.) Se kɛ̃ ɔ, be fɛɛ be nɛ wa maa hia yemi kɛ buami ɔ, Yehowa suɔ nɛ wa bi lɛ. Pi nɛ e suɔ kaa waa sɔle kɛ bi lɛ yemi kɛ buami kɛkɛ, mohu ɔ, e suɔ nɛ wa bi yemi kɛ buami kɛ je “to nɔ hyɛli kɛ tsɔɔli” nɛ a ngɛ asafo ɔ mi ɔ a ngɔ hulɔ.—Efe. 4:​11, 12.

3. Kɛ wɔ tsuo wa ma nyɛ ma ná nɔ́ nɛ nikɔtɔma amɛ peeɔ kɛ yeɔ buaa wɔ ɔ he se ha kɛɛ?

³ Ngɛ ní kasemi nɛ ɔ mi ɔ, wa maa na bɔ nɛ Yehowa guɔ asafo mi nikɔtɔma amɛ a nɔ kɛ yeɔ buaa nihi nɛ a kɛ Yehowa a kpɛti puɛ ɔ ha. Wa ma ha sane bimihi nɛ nyɛɛ se ɔmɛ a heto hulɔ: Mɛni be e sa kaa wa bi nikɔtɔma amɛ yemi kɛ buami? Mɛni he je nɛ e sa kaa wa bi nikɔtɔma amɛ yemi kɛ buami ɔ? Mɛni nikɔtɔma amɛ peeɔ kɛ yeɔ buaa wɔ? Ke waa kɛ nyagba ko kpi amlɔ nɛ ɔ po ɔ, ní kasemi nɛ ɔ maa ye bua wɔ konɛ wa bua nɛ jɔ blɔ nya nɛ Mawu to ɔ he wawɛɛ. Hwɔɔ se ɔ, ke wɔ hu wa hia yemi kɛ buami ɔ, wa ma nyɛ ma ná he se.

MƐNI BE E SA KAA WA ‘TSƐ NIKƆTƆMA AMƐ’?

4. Kɛ wa plɛ kɛ le kaa Yakobo 5:​14-16, 19, 20 ɔ kɔɔ nɔ ko nɛ huɛ bɔmi kpakpa nɛ ngɛ e kɛ Yehowa a kpɛti ɔ ngɛ puɛe ɔ he ha kɛɛ? (Hyɛ foni ɔmɛ hulɔ.)

⁴ Kaselɔ Yakobo tsɔɔ bɔ nɛ Yehowa guɔ nikɔtɔma amɛ a nɔ kɛ yeɔ buaa wɔ ha. Yakobo ngma ke: “Anɛ nyɛ ti nɔ ko be he wami lo? Ha nɛ e tsɛ asafo ɔ mi nikɔtɔma amɛ kɛ ba e ngɔ.” (Kane Yakobo 5:​14-16, 19, 20.) Yakobo ngɛ nɔ ko nɛ e kɛ Mawu a kpɛti puɛ ɔ he munyu tue. Yakobo tsɔɔ kaa e sa nɛ nɔ nɛ e be he wami ɔ nɛ e tsɛ nikɔtɔma amɛ nɛ a ye bua lɛ, se pi dɔkita. Yakobo tsɔɔ hu kaa ke a ngɔ nɔ ɔ yayamihi kɛ ke lɛ ɔ, e ma ná he wami. Ngɛ blɔ ko nɔ ɔ, níhi nɛ e sa kaa nɔ ko nɛ pee kɛ dla e kɛ Mawu a kpɛti ɔ ngɛ kaa níhi nɛ e sa kaa hiɔtsɛ ko nɛ e pee konɛ e ná tsami ɔ. Ke wa be he wami ɔ, wa ya naa dɔkita, nɛ wa deɔ lɛ nɔ́ nɛ ngɛ wɔ pee, nɛ ke e tsɔɔ wɔ nɔ́ nɛ waa pee konɛ wa ná he wami ɔ, wa peeɔ. Jã nɔuu kɛ̃ nɛ ke huɛ bɔmi nɛ ngɛ waa kɛ Yehowa wa kpɛti ɔ puɛ ɔ, e sa nɛ wa ya na nikɔtɔma amɛ nɛ wa de mɛ nyagba a, nɛ waa ngɔ blɔ tsɔɔmihi nɛ a maa da Ngmami ɔ nɔ kɛ ha wɔ ɔ kɛ tsu ní.

5. Kɛ wa maa pee kɛ le kaa huɛ bɔmi nɛ ngɛ waa kɛ Yehowa wa kpɛti ɔ ngɛ puɛe kɛɛ?

⁵ Ngɛ Yakobo yi 5 ɔ, Yakobo wo wɔ he wami kaa wa ya na nikɔtɔma amɛ be fɛɛ be nɛ wa maa na kaa huɛ bɔmi nɛ ngɛ waa kɛ Yehowa wa kpɛti ɔ ngɛ puɛe ɔ. Nile ngɛ mi kaa wa ma ha nɛ a ye bua wɔ mla loko huɛ bɔmi nɛ ngɛ waa kɛ Yehowa wa kpɛti ɔ nɛ puɛ kulaa! Baiblo ɔ bɔ wɔ kɔkɔ kaa ke wa hyɛ we nɛ hi ɔ, wa ma susu kaa huɛ bɔmi kpakpa ngɛ waa kɛ Mawu wa kpɛti, se eko ɔ, pi jã nɛ e ji kulaa. (Yak. 1:22) Nɔ́ ko kaa jã ba ngɛ Kristofohi nɛ a hi si ngɛ Saadis ɔ a blɔ fa mi, se Yesu de mɛ kaa Yehowa bua jɔɛ a he hu. (Kpoj. 3:​1, 2) Kɛ wa ma plɛ kɛ le kaa huɛ bɔmi gbagbanii ngɛ waa kɛ Yehowa wa kpɛti ha kɛɛ? Ke wa ngɔ suɔmi nɛ wa ngɛ ha Yehowa benɛ a baptisi wɔ pɛ ɔ kɛ to suɔmi nɛ wa ngɛ ha lɛ amlɔ nɛ ɔ he ɔ, e maa ye bua wɔ. (Kpoj. 2:​4, 5) Nɔ fɛɛ nɔ ma nyɛ ma bi e he ke: ‘Anɛ ye bua jɔɔ Baiblo ɔ kanemi he, nɛ i pueɔ ye yi mi tɛ ngɛ nɔ́ nɛ i kaneɔ ɔ he kaa bɔ nɛ i peeɔ be ko nɛ be ɔ lo? Anɛ i yaa asafo mi kpe ɔmɛ tsuo lo? Anɛ i kaseɔ nɔ́ nɛ a maa kase ɔ saminya loko i yaa lo? Anɛ i kɛ kã tsuɔ fiɛɛmi ní tsumi ɔ kaa bɔ nɛ i peeɔ be ko nɛ be ɔ lo? Anɛ i hyɛɔ saminya konɛ hɛja jemi kɛ he lo nya níhi a se dimi nɛ ko ngɔ ye be tsuo lo?’ Ke o ha sane bimi nɛ ɔmɛ eko heto ke dɛbi ɔ, lɛɛ eko ɔ, nyagba ngɛ, nɛ ke o tsu we nyagba a he ní mla a, níhi ma puɛ kulaa. Ke o nyɛ we nɛ o tsu nyagba a he ní, aloo nyagba a ha nɛ o tɔ̃ Yehowa mlaa ko nɔ ɔ, e sa nɛ o ha nɛ nikɔtɔma amɛ nɛ a le konɛ a ye bua mo.

6. Mɛni e sa nɛ nihi nɛ a pee yayami nɛ hɛdɔ ngɛ he ɔ nɛ a pee?

⁶ Se ke nɔ ko pee yayami nɛ hɛdɔ ngɛ he nɛ ma nyɛ ma ha nɛ a je lɛ kɛ je asafo ɔ mi ɔ, lɛɛ e sa kaa nɔ ɔ nɛ e su asafo mi nikɔtɔma amɛ a he, nɛ e bɔ mɛ amaniɛ. (1 Kor. 5:​11-13) Ke nɔ ko pee yayami nɛ hɛdɔ ngɛ he ɔ, e hia yemi kɛ buami konɛ e nyɛ nɛ e dla e kɛ Yehowa a kpɛti. Ja wa pee ‘níhi nɛ tsɔɔ kaa wa tsake wa tsui’ loko Yehowa maa da kpɔmi nɔ́ ɔ nɔ kɛ ngɔ wa yayami ɔmɛ kɛ ke wɔ. (Níts. 26:20) Níhi nɛ e sa nɛ waa pee ɔ eko ji kaa wa maa na asafo mi nikɔtɔma amɛ ke wa pee yayami ko nɛ hɛdɔ ngɛ he.

7. Mɛnɔmɛ hu lɛ a hia nikɔtɔma amɛ a yemi kɛ buami?

⁷ Pi nihi nɛ a pee yayami nɛ hɛdɔ ngɛ he ɔ pɛ nɛ asafo mi nikɔtɔma amɛ yeɔ buaa; a yeɔ buaa nihi nɛ huɛ bɔmi nɛ ngɛ a kɛ Yehowa a kpɛti ɔ ngɛ puɛe ɔ hulɔ. (Níts. 20:35) Eko ɔ, o ngɛ mɔde bɔe kaa o maa ye akɔnɔ yaya ko nɔ, se o nyɛ we. E he ma nyɛ maa wa ha mo kaa o maa pee jã, titli ɔ, ke o kɛ tsopa yaya tsu ní, loo o hyɛ bɔmi nami he fonihi loo videohi, aloo o kɛ o he wo ajuama bɔmi mi loko o ba kase anɔkuale ɔ. Ke o na kaa o nyɛ we nɛ o ye su yaya ko nɔ ɔ, mo bi yemi kɛ buami. O ma nyɛ ma de asafo mi nɔkɔtɔma ko nɛ o he ye kaa e maa bu mo tue saminya, nɛ e maa ye bua mo konɛ o nyɛ nɛ o ye su yaya a nɔ. Nɛ jehanɛ hu ɔ, e ma kai mo kaa ke o ya nɔ nɛ o bu Yehowa tue ɔ, Yehowa bua maa jɔ. (Fiɛɛ. 4:12) Ke loloolo ɔ, o nyɛ we nɛ o ye akɔnɔ yaya a nɔ nɛ o kɔni mi jɔ̃ ɔ, asafo mi nɔkɔtɔma a ma ha nɛ o na kaa Yehowa bua jɔ kaa o bi yemi kɛ buami, nɛ lɔ ɔ tsɔɔ kaa o baa o he si, nɛ o suɔ nɛ o sa Yehowa hɛ mi.—1 Kor. 10:12.

8. Anɛ tɔmi fɛɛ tɔmi nɛ ke wa tɔ̃ ɔ, e sa kaa wa de nikɔtɔma amɛ lo? Moo tsɔɔ nya.

⁸ Pi tɔmi fɛɛ tɔmi nɛ ke wa tɔ̃ ɔ, e sa kaa wa de asafo mi nikɔtɔma amɛ. Kaa nɔ hyɛmi nɔ́ ɔ, ke o de nɔ́ ko nɛ e dɔ nyɛmi ko, aloo o mi mi fu nyɛmi ko wawɛɛ ɔ, e he hia we kaa o ma de nɔkɔtɔma ko. Mohu ɔ, e sa nɛ o ngɔ blɔ tsɔɔmi nɛ Yesu kɛ ha ngɛ nɔ́ nɛ wa maa pee konɛ tue mi jɔmi nɛ hi waa kɛ wa nyɛmi ɔ wa kpɛti ɔ he ɔ kɛ tsu ní. (Mat. 5:​23, 24) O ma nyɛ ma hla níhi a mi kɛ kɔ su komɛ kaa he jɔmi, tsui si tomi, kɛ he nɔ yemi he ngɛ asafo ɔ womi ɔmɛ a mi, konɛ o nyɛ nɛ o je su nɛ ɔmɛ kpo wawɛɛ. Se ke loloolo ɔ, o nyɛ we nɛ o tsu nyagba a he ní ɔ, o ma nyɛ ma de nɔkɔtɔma ko konɛ e ye bua mo. Benɛ Evodia kɛ Sintika nyɛ we nɛ a dla a kpɛti ɔ, bɔfo Paulo de nyɛminyumu ko nɛ e ngɛ asafo ɔ mi ɔ kaa e ye bua mɛ. Jã kɛ̃ nɛ asafo mi nɔkɔtɔma ko nɛ ngɛ o we asafo ɔ mi ɔ hu ma nyɛ maa ye bua mo.—Filip. 4:​2, 3.

MƐNI HE JE NƐ E SA KAA WA TSƐ NIKƆTƆMA AMƐ?

9. Mɛni he je nɛ e sɛ nɛ e pee wɔ zo kaa wa ma tsɛ asafo mi nikɔtɔma amɛ ɔ? (Abɛ 28:13)

⁹ Ke wa pee yayami ko nɛ hɛdɔ ngɛ he, aloo wa nyɛ we nɛ waa ye su yaya ko nɔ ɔ, ja wa ná hemi kɛ yemi kɛ kã loko wa ma nyɛ ma bi yemi kɛ buami. E sɛ nɛ e pee wɔ zo kaa wa ma de nikɔtɔma amɛ. Mɛni he je? Ke waa kɛ Yehowa blɔ tsɔɔmi tsu ní ɔ, e tsɔɔ kaa wa ngɛ hemi kɛ yemi ngɛ e mi, nɛ wa ngɛ nɔ mi mami kaa e blɔ tsɔɔmi ɔmɛ maa ye bua wɔ konɛ huɛ bɔmi kpakpa nɛ hi waa kɛ lɛ wa kpɛti. E tsɔɔ hu kaa wa kplɛɛ nɔ kaa wa hia Yehowa yemi kɛ buami konɛ wa nyɛ nɛ waa pee nɔ́ nɛ da. (La 94:18) Jehanɛ hu ɔ, ke wa pee yayami nɛ wa jaje wa yayami ɔ, nɛ wa kpa jamɛ a yayami ɔ peemi ɔ, Mawu maa na wɔ mɔbɔ.—Kane Abɛ 28:13.

10. Ke wa laa yayami ko nɛ wa pee ɔ nɔ ɔ, mɛni ma nyɛ maa ba?

¹⁰ Ke wa hia yemi kɛ buami, nɛ wa bi nikɔtɔma amɛ ɔ, Mawu maa jɔɔ wɔ, se ke wa laa wa yayami ɔmɛ a nɔ ɔ, wa maa na mi nɔ́. Benɛ Matsɛ David laa e yayami ɔmɛ a nɔ ɔ, e bua jɔɛ nɛ e hao, ejakaa e le kaa Mawu bua jɔɛ e he hu. (La 32:​3-5) Kaa bɔ nɛ ke nɔ ko nu hiɔ nɛ e hla we hiɔ ɔ nya tsaba mla a, hiɔ ɔ he maa wa a, jã kɛ̃ nɛ ke wa pee yayami nɛ hɛdɔ ngɛ he nɛ wa pee we nɔ́ ko ngɛ he mla a, níhi ma puɛ kulaa. Akɛnɛ Yehowa le enɛ ɔ he je ɔ, e wo wɔ he wami kaa waa ba, nɛ ‘wa ba dla waa kɛ lɛ wa kpɛti.’—Yes. 1:​5, 6, 18.

11. Ke wa laa yayami nɛ ngɛ hɛdɔ ko nɔ ɔ, kɛ e maa sa ni kpahi a he ha kɛɛ?

¹¹ Ke wa pee yayami nɛ hɛdɔ ngɛ he, nɛ wa laa nɔ ɔ, e ma nyɛ maa ye ni kpahi awi. Jehanɛ se hu ɔ, e be hae nɛ Mawu mumi ɔ nɛ tsu ní saminya ngɛ asafo ɔ mi, nɛ e ma nyɛ ma puɛ tue mi jɔmi nɛ ngɛ asafo ɔ mi ɔ. (Efe. 4:30) Ke wa le hu kaa nyɛmi ko ngɛ asafo ɔ mi ɔ pee yayami nɛ hɛdɔ ngɛ he ɔ, e sa nɛ waa wo lɛ he wami nɛ e ya de nikɔtɔma amɛ.a Ke e ya de we ɔ, lɛɛ e sa nɛ wɔ nitsɛmɛ wa ya de nikɔtɔma amɛ. Ke wa pee we jã a, lɛɛ wɔ hu wa pee yayami kɛ si Yehowa. (3 Mose 5:1) E sa nɛ suɔmi nɛ wa ngɛ kɛ ha Yehowa a nɛ wo wɔ he wami nɛ wa ya na nikɔtɔma amɛ konɛ wa de mɛ anɔkuale ɔ. Ke wa pee jã a, e ma ha nɛ asafo ɔ he ma tsɔ, nɛ a maa ye bua yayami peelɔ ɔ konɛ e dla e kɛ Yehowa a kpɛti.

KƐ NIKƆTƆMA AMƐ YEƆ BUAA WƆ HA KƐƐ?

12. Mɛni nikɔtɔma amɛ peeɔ kɛ yeɔ buaa nihi nɛ a kɛ Yehowa a kpɛti puɛ ɔ?

¹² Baiblo ɔ fã asafo mi nikɔtɔma amɛ kaa a ye bua nihi nɛ a kɛ Yehowa a kpɛti huɛ bɔmi ɔ puɛ ɔ. (1 Tɛs. 5:14) Ke o pee yayami ko ɔ, eko ɔ, nikɔtɔma amɛ ma bi mo sane komɛ konɛ a le o susumihi kɛ níhi nɛ ngɛ o tsui mi. (Abɛ 20:5) Eko ɔ, e he maa wa ha mo kaa o kɛ nikɔtɔma amɛ maa sɛɛ ní akɛnɛ o ngɛ zo gboe loo o susu kaa o hɛ mi ma pue si ɔ he je. Se ke o bɔ mɔde nɛ o de mɛ nɔ́ fɛɛ nɔ́ ɔ, lɔ ɔ ma ha nɛ a ma nyɛ maa ye bua mo saminya. Koo hao kaa níhi nɛ o ma de ɔ ma ha nɛ a susu kaa o “ngɛ munyu tue basabasa.” (Hiob 6:3) Nikɔtɔma amɛ be oya yee kɛ kojo mo. Mohu ɔ, a maa bu mo tue saminya konɛ a na sane ɔ tsuo nya, kɛkɛ lɔ ɔ se ɔ, a maa da Baiblo ɔ nɔ kɛ wo mo ga. (Abɛ 18:13) A le kaa e heɔ be loko a ma nyɛ maa ye bua nɔ ko. Enɛ ɔ he ɔ, be komɛ ɔ, a kɛ ni komɛ ma nyɛ maa kpe si abɔ bɔ nɛ pee nɛ a nyɛ nɛ a ye bua mɛ saminya.

13. Ke nikɔtɔma amɛ kɛ wɔ sɔle, nɛ a da Ngmami ɔ nɔ kɛ wo wɔ ga a, kɛ wa ma ná he se ha kɛɛ? (Hyɛ foni ɔmɛ hulɔ.)

¹³ Ke o kɛ nikɔtɔma amɛ ngɛ ní sɛɛe ɔ, a be nɔ́ ko pee nɛ ma ha nɛ o kɔni mi nɛ jɔ̃. Mohu ɔ, a kɛ mo maa sɔle. E maa pee mo nyakpɛ kaa a sɔlemi ɔ ma ‘tsu ní wawɛɛ.’ Nɔ́ kpa ko hu nɛ a maa pee kɛ ye bua mo ji kaa a maa “pɔ [mo] nu ngɛ Yehowa biɛ ɔ mi.” (Yak. 5:​14-16) “Nu” nɛ ɔ ji anɔkuale nɛ ngɛ Mawu Munyu ɔ mi ɔ nɛ. Nikɔtɔma amɛ kɛ mo ma susu ngmamihi nɛ maa ye bua mo ɔ he. A maa wo o bua nɛ a maa ye bua mo konɛ o dla o kɛ Yehowa nyɛ kpɛti. (Yes. 57:18) Ga womihi nɛ je Ngmami ɔ mi nɛ a kɛ ma ha mo ɔ maa wo mo he wami konɛ o ya nɔ nɛ o pee nɔ́ nɛ da. A maa ye bua mo konɛ o na kaa Yehowa kɛ mo ngɛ munyu tue, nɛ e ngɛ mo dee ke: ‘Blɔ ɔ ji nɛ ɔ nɛ. Moo nyɛɛ nɔ.’—Yes. 30:21.

14. Kaa bɔ nɛ Galatia Bi 6:1 ɔ tsɔɔ ɔ, ke nɔ ko “hia nane yaya” a, mɛni nikɔtɔma amɛ ma nyɛ maa pee kɛ ye bua lɛ? (Hyɛ foni ɔmɛ hulɔ.)

¹⁴ Kane Galatia Bi 6:1. Ke Kristofono ko “hia nane yaya” a, lɔ ɔ tsɔɔ kaa e ní peepee kɛ Mawu suɔmi nya ní kɔ we. Eko ɔ, nɔ ɔ mwɔ yi mi kpɔ ko nɛ dɛ aloo e pee yayami ko nɛ hɛdɔ ngɛ he. Akɛnɛ nikɔtɔma amɛ suɔ nɔ ɔ he je ɔ, a ‘bɔɔ mɔde kaa a ma dla lɛ ngɛ he jɔmi mumi mi.’ A ma nyɛ maa ngɔ Hela munyungu nɛ a tsɔɔ sisi ke, “dla” a kɛ kale bɔ nɛ dɔkita tsaa nɔ ko nɛ e wu ku ɔ. Ke dɔkita ko ngɛ nɔ ko nɛ e wu ku tsae ɔ, e hyɛɔ saminya konɛ hiɔtsɛ ɔ nɛ ko nu yeyee he tsɔ. Jã nɔuu kɛ̃ nɛ ke nikɔtɔma amɛ ngɛ nɔ ko nɛ e hia nane yaya ye buae ɔ, a hyɛɔ saminya konɛ a ko pee nɔ́ ko nɛ ma puɛ sane ɔ kulaa. A jeɔ mi mi jɔmi mi kɛ dlaa nɔ ɔ. Ngmami ɔ wo mɛ ga hu kaa ‘a hɛ nɛ hi mɛ nitsɛmɛ a he nɔ.’ Enɛ ɔ he ɔ, ke a ngɛ nɔ ko ye buae ɔ, a kaiɔ kaa mɛ hu a ma nyɛ ma tɔ̃. Nikɔtɔma amɛ bui a he kaa a da pe ni kpahi, mohu ɔ, a baa a he si, nɛ a jeɔ mi mi jɔmi kpo kɛ tsɔɔ nɔ nɛ a ngɛ lɛ ye buae ɔ.—1 Pet. 3:8.

15. Mɛni e sa nɛ waa pee ke wa ngɛ nyagba ko?

¹⁵ Wa ma nyɛ ma he asafo mi nikɔtɔma amɛ maa ye. Akɛnɛ Yehowa tsɔse mɛ he je ɔ, a be wa laami sanehi kpo jee, nɛ a be mɛ nitsɛmɛ a susumi nɔ dae kɛ wo wɔ ga, mohu ɔ, a maa da Baiblo ɔ nɔ kɛ pee jã. Jehanɛ hu ɔ, Yehowa tsɔɔ mɛ kaa e sa nɛ a ya nɔ nɛ a ye bua wɔ konɛ wa nyɛ nɛ wa tsu wa nyagba amɛ a he ní. (Abɛ 11:13; Gal. 6:2) E ngɛ mi kaa e slo bɔ nɛ nikɔtɔma amɛ a ti nɔ fɛɛ nɔ ngɛ ha, kɛ a níhi a si kpami mohu lɛɛ, se waa kɛ a kpɛti nɔ fɛɛ nɔ ma nyɛ maa sɛɛ wa nyagbahi a he ní. E he hia we nɛ wa bi ga womi kɛ je nikɔtɔma ekpaekpahi a ngɔ kɛ susumi ɔ kaa a ti nɔ ko ma de wɔ nɔ́ nɛ wa suɔ kaa waa nu. Ke wa pee jã a, wa maa pee kaa nihi nɛ a suɔ kaa “a ta a tue mi kɛ ha mɛ” mohu pe nɛ a maa nu “tsɔɔmi kpakpa” nɛ je Mawu Munyu ɔ mi ɔ. (2 Tim. 4:3) Ke o de asafo mi nɔkɔtɔma ko o nyagba ko ɔ, eko ɔ, e ma bi mo ke: “Anɛ o kɛ nikɔtɔma kpahi sɛɛ he ní momo lo, nɛ mɛni ga a wo mo?” Akɛnɛ asafo mi nɔkɔtɔma a baa e he si he je ɔ, e ma nyɛ ma bi ga womi ngɛ nɔkɔtɔma kpa ko ngɔ.—Abɛ 13:10.

WƆ NITSƐMƐ WA BLƆ NYA NÍ TSUMI

16. Mɛni blɔ nya ní tsumi lɛ fɔɔ si ngɛ wa nɔ?

¹⁶ Ke wa hia yemi kɛ buami ɔ, nikɔtɔma amɛ maa wo wɔ ga, se a be wɔ nɔ́ nɛ e sa kaa waa pee ɔ dee. E sa nɛ wa ti nɔ fɛɛ nɔ nɛ e ngɔ e munyu tutui kɛ e ní peepee kɛ tsɔɔ kaa e suɔ Yehowa, nɛ e suɔ nɛ e pee e suɔmi nya ní. Nɔ ko be nyɛe maa pee enɛ ɔ kɛ ha wɔ. Yehowa maa ye bua wɔ konɛ waa mwɔ yi mi kpɔ nɛ da nɛ waa ye lɛ anɔkuale. (Rom. 14:12) Enɛ ɔ he ɔ, nikɔtɔma amɛ be yi mi kpɔ mwɔe ha wɔ, mohu ɔ, a maa da Baiblo ɔ nɔ kɛ tsɔɔ wɔ Yehowa susumi ngɛ sane ɔ he konɛ wɔ nitsɛmɛ waa mwɔ yi mi kpɔ. Ke waa kɛ a ga womihi nɛ je Baiblo ɔ mi ɔ tsu ní ɔ, wa ma tsɔse wa ‘juɛmi nɛ waa kɛ kɔɔ nɔ́ se ɔ,’ nɛ wa maa mwɔ yi mi kpɔhi nɛ da.—Heb. 5:14.

17. Mɛni e sa kaa waa fia wa pɛɛ si kaa wa maa pee?

¹⁷ Wa bua jɔ kaa Yehowa guɔ asafo mi nikɔtɔma amɛ a nɔ kɛ hyɛɔ wa nɔ saminya kaa bɔ nɛ to nɔ hyɛlɔ kpakpa hyɛɔ e tohi a nɔ ɔ. Yehowa tsɔ Yesu nɛ ji “to hyɛlɔ kpakpa a” konɛ e ngɔ e wami kɛ ha kaa kpɔmi nɔ́ bɔ nɛ pee nɛ wa ná neneene wami. (Yoh. 10:11) Yehowa ha wɔ nikɔtɔmahi hulɔ konɛ a hyɛ wa nɔ ngɛ asafo ɔ mi kaa bɔ nɛ e wo si ɔ. E de ke: “Ma ha nyɛ to hyɛli nɛ́ a maa pee nɔ́ nɛ ye tsui suɔ, nɛ a kɛ nile kɛ nɔ́ se kɔmi maa lɛ nyɛ.” (Yer. 3:15) Ke wa na kaa huɛ bɔmi nɛ ngɛ waa kɛ Yehowa wa kpɛti ɔ puɛ ɔ, e sa nɛ wa ha nɛ nikɔtɔma amɛ nɛ a ye bua wɔ. Ke wa pee jã a, wa maa na bɔ nɛ Yehowa maa gu nikɔtɔma amɛ a nɔ kɛ ye bua wɔ ha.