NÍHI NƐ MAA YE BUA WEKUHI | GBA SI HIMI
Níhi Nɛ O Maa Pee Konɛ Hunga Jemi Nɛ Ko Hi O Gba Si Himi ɔ Mi
Ke huno kɛ e yo he we a sibi yi, nɛ a yi mi tɛ̃ mɛ ngɛ a sibi a he ɔ, a gba a be nyɛe maa ye manye. Lɔ ɔ mɛni o maa pee konɛ o ko je hunga yaka gu?
Ngɛ munyu nɛ ɔ mi ɔ
Mɛni ji hunga jemi?
Munyungu nɛ ji “hunga jemi” ɔ hɛɛ sisi numi ekpaekpa. Ngɛ munyu nɛ ɔ mi ɔ, e tsɔɔ bɔ nɛ wa nuɔ he ha, ke wa susu kaa nɔ ko ngɛ wa he piɛɛlɔ ɔ he suɔmi náe, aloo lɛ hu e ngɛ nɔ ko he suɔmi náe. Enɛ ɔ ma nyɛ ma ha nɛ waa nu he kaa wa gba a be slɔkee. Ke jã ji sane ɔ niinɛ ɔ, lɛɛ e da blɔ kaa o maa je hunga. Ejakaa gba si himi ji kake peemi nɛ mi wa pe kulaa nɛ hiɔ nihi enyɔ a kpɛti, enɛ ɔ he ɔ, e sa nɛ gba si himi he piɛɛli nɛ a pee nɔ́ fɛɛ nɔ́ nɛ a ma nyɛ kɛ po he piɛ.
Baiblo sisi tomi mlaa: “A pi ni enyɔ hu, mohu ɔ, he lo kake. . . . Nɔ́ nɛ Mawu ngɔ kɛ tsa a, ko ha nɛ adesa ko nɛ e gba mi.”—Mateo 19:6.
“Ke nɔ́ ko ngɛ nɔ yae nɛ́ ma nyɛ ma puɛ nyɛ gba a, lɛɛ hunga jemi ma nyɛ maa pee kaa nɔ́ nɛ e haa nɛ a yɔseɔ ke la su ku ko ngɛ jee ngɛ we ko mi nɛ́ e bɔɔ nihi nɛ a ngɛ we ɔ mi ɔ kɔkɔ ngɛ oslaa nɛ ma a he ɔ, nɛ lɔ ɔ haa nɛ a peeɔ nɔ́ ko ngɛ nɔ́ nɛ ngɛ nɔ yae ɔ he.”—Benjamin.
Nɔ́ nɛ kɛ hunga jemi nɛ se nami ko be he ɔ baa ji ke gba si himi he piɛɛli a yi mi tɛ̃ mɛ ngɛ a sibi a he be mi nɛ a be nɔ dami nɔ́ kpakpa ko. Ke wa suɔ wa he piɛɛlɔ ɔ nitsɛnitsɛ ɔ, wa be jamɛ a hunga nɛ yeɔ nɔ awi ɔ jee. (1 Korinto Bi 13:4, 7) Dr. Robert L. Leahy ngma ke: “Ke o jeɔ hunga nɛ sisi numi be he ɔ, lɔ ɔ mohu ma ha nɛ o pee níhi nɛ ma puɛ huɛ bɔmi nɛ ngɛ o kɛ o he piɛɛlɔ ɔ nyɛ kpɛti nɛ́ o suɔ kaa ó po he piɛ ɔ.”a
Mɛni haa nɛ nɔ jeɔ hunga nɛ́ se nami be he?
Nɔ́ kake nɛ ma nyɛ ma ha nɛ nɔ ko nɛ je hunga nɛ́ se nami be he ɔ eko ji kaa ke nɔ ɔ sɛ gba si himi mi hyɛ, nɛ e he piɛɛlɔ momo ɔ yi lɛ anɔkuale. Aloo eko ɔ, nɔ ɔ fɔli ɔmɛ a gba a puɛ nɛ eko ɔ e ngɛ gbeye yee kaa lɛ hu e nɔ́ ɔ ma ya ba e lɛ jã.
“Ye papa yi ye mami anɔkuale benɛ i ji jokuɛyo ɔ, enɛ ɔ ha nɛ e he wa ha mi kaa ma he ni kpahi ma ye. Enɛ ɔ ná ye susumi nɔ he wami, nɛ i haoɔ wawɛɛ, nɛ lɔ ɔ haa nɛ be komɛ ɔ, e he waa ha mi kaa ma he ye huno ɔ ma ye.”—Melissa.
Nɔ́ kpa ko hu ji: Ke o ngɛ he nue kaa o be slɔkee ngɛ o gba a mi ɔ, lɔ ɔ ma nyɛ ma ha nɛ o na ni kpahi kaa nihi nɛ a ngɛ hlae ma puɛ o gba a. Enɛ ɔ ma nyɛ ma ha nɛ o ná susumi ɔ kaa, ke o he piɛɛlɔ ɔ ná he blɔ ɔ, e maa je o he nɛ e kɛ nɔ kpa ma ya hi si.
“Ye huno ɔ huɛ ko de lɛ kaa e maa ngɔ ní peemi klɛdɛɛ ko kɛ wo e dɛ ngɛ e yo kpeemi ligbi ɔ nɔ. Enɛ ɔ ma bi nɛ e kɛ yo kpa nɛ nyɛɛ kɛ ba ní peemi ɔ sisi, nɛ́ e kɛ lɛ nɛ a ba do. Ye bua jɔɛ nɔ́ nɛ ɔ he kulaa. Lɔ ɔ i de lɛ ke e ko kplɛɛ nɔ.”—Naomi.
Bɔ nɛ yo kpeemi blɔ nya tomihi ngɛ ha a ngɛ ekpaekpa ngɛ ma fɛɛ ma nɔ, nɛ e sa nɛ Kristofohi nɛ a ha nɛ Baiblo sisi tomi mlaahi nɛ kudɔ mɛ. Anɛ e da blɔ kaa Naomi pee e ní jã ngɛ jamɛ a ligbi ɔ nɔ lo? Amlɔ nɛ ɔ ke e susu nɔ́ nɛ e pee ɔ he ɔ, e nuɔ he kaa e sɛ nɛ e ko je hunga. E de ke, “Jamɛ a be ɔ mi ɔ, i nu he kaa i be slɔkee. I susu kaa ye huno ɔ ngɔ mi kɛ ngɛ yi kpahi a he toe, se pi jã ji sane ɔ.”
Ngɛ nɔ́ nɛ haa nɛ o jeɔ hunga a tsuo se ɔ, ke o jeɔ hunga ngɛ blɔ nɛ sɛ nɔ ɔ, lɔ ɔ ma nyɛ ma ha nɛ o ná susumi nɛ dɛ ngɛ o he piɛɛlɔ ɔ he kaa e yi mo anɔkuale, nɛ eko ɔ, lɔ ɔ ma ha nɛ o tu munyu kɛ si lɛ. He numi kaa jã ma nyɛ maa ye o gba a awi, nɛ e ma nyɛ maa wo mo hiɔ po.
Baiblo sisi tomi mlaa: “Hunga jemi ngɛ kaa kansa.”—Abɛ 14:30, Easy-to-Read Version.
Mɛni o ma nyɛ maa pee kɛ ye o he nɔ ngɛ hunga jemi he?
Pee níhi nɛ ma ha nɛ o hé o he piɛɛlɔ ɔ ye wawɛɛ. Be mi nɛ o maa hi ní komɛ nɛ tsɔɔ kaa o he piɛɛlɔ ɔ yi mo anɔkuale ɔ hlae ɔ, mo susu níhi nɛ o he piɛɛlɔ ɔ pee nɛ́ lɔ ɔ ha nɛ o he lɛ ye ɔ he mohu.
“I susuɔ ye huno ɔ su kpakpa amɛ a he. Ke e ná be kɛ ha ni kpahi ɔ, i le kaa akɛnɛ e susuɔ nɔ he ɔ he je nɛ e náa be kɛ haa mɛ ɔ nɛ, se pi kaa e hɛɛ yi mi tomi yaya ko. E sa nɛ ma kai kaa e slo ye fɔli ɔmɛ a gba a ngɛ ye nɔ́ ɔ he.”—Melissa.
Baiblo sisi tomi mlaa: “Suɔmi . . . heɔ níhi tsuo yeɔ.”—1 Korinto Bi 13:4, 7.
Koo ngɔ lɛ kaa níhi nɛ o susu ɔ da. Dr. Leahy, nɛ wa tsɛ e munyu se kɛ sɛ hlami ɔ ngma ke: “Behi fuu ɔ, ke wa ná susumi ko ɔ, e peeɔ wɔ kaa jamɛ a susumi ɔ da. Nɛ nɔ mi mami nɛ wa ngɛ kaa nɔ́ nɛ wa susu ɔ da a ba peeɔ odase kɛ haa wɔ kaa nɔ́ nɛ wa susu ɔ ji anɔkuale. Se ke wa he nɔ́ ko ye kaa e ji anɔkuale ɔ, lɔ ɔ tsɔɔ we kaa nɔ́ nɛ wa he ye ɔ ji anɔkuale niinɛ, nɛ nɔ mi mami nɛ wa ngɛ ɔ hu pee we odase nitsɛnitsɛ nɛ tsɔɔ kaa nɔ́ nɛ wa susu ɔ da.”b
“Ke nɔ́ ko ngɛ nɔ yae, nɛ wa bɔni susumi nɛ dɛ nami ngɛ nɔ́ nɛ ngɛ nɔ yae ɔ he ɔ, lɔ ɔ ma nyɛ maa ngɔ nyagbahi kɛ ba wa gba si himi ɔ mi, pohu pi jã nɛ níhi ngɛ.”—Nadine.
Baiblo sisi tomi mlaa: “Nyɛ ha nɛ nihi tsuo nɛ a le kaa nyɛ susuɔ nɔ́ he.”—Filipi Bi 4:5.
Nyɛ susu níhi nɛ gbaa o nya a he. Ngɛ nɔ́ nɛ haa nɛ o jeɔ hunga a tsuo se ɔ, o kɛ o he piɛɛlɔ ɔ nɛ susu níhi nɛ gbaa o nya a he, bɔ nɛ pee nɛ nyɛ ni enyɔ ɔmɛ nyɛɛ to huzu nɛ sa ngɛ nyɛ ní peepee he.
“Ke nyɛ ngɛ ní sɛɛe kɛ kɔ níhi kaa jã he ɔ, moo ngɔ lɛ kaa pi nɛ o he piɛɛlɔ ɔ suɔ nɛ e pee nɔ́ ko nɛ maa dɔ mo, nɛ jehanɛ hu moo na lɛ kaa e ngɛ mɔde bɔe kaa e maa mwɔ yi mi kpɔhi nɛ da. Moo na o he piɛɛlɔ ɔ kaa e hɛɛ juɛmi nɛ da. Eko ɔ, o haa nɛ ní nyafinyafi gbaa o nya tsɔ, nɛ o hyɛɛ níhi fuu blɔ ngɛ o he piɛɛlɔ ɔ dɛ. Aloo eko ɔ, o he piɛɛlɔ ɔ yɔse we kaa e ná we be nɛ sa kɛ ha mo kaa bɔ nɛ o ngɛ hlae ɔ.”—Ciara.
Baiblo sisi tomi mlaa: “Ha nɛ nɔ fɛɛ nɔ nɛ e ya nɔ nɛ e hla nɔ́ nɛ maa hi kɛ ha nɔ kpa, se pi kɛ ha lɛ nitsɛ e he.”—1 Korinto Bi 10:24.