NIHEWI KƐ YIHEWI BIƆ KE

Bɔ Nɛ Baiblo ɔ Ma Nyɛ Maa Ye Bua Mo Ha—Fã 3: Bɔɔ Mɔde Konɛ O Ná O Baiblo Kanemi ɔ He Se

Ke o hyɛ Baiblo ɔ mi ɔ, o maa na munyuhi fuu ngɛ mi. Ko ha nɛ lɔ ɔ nɛ jɔ̃ o kɔni mi ngɛ Baiblo ɔ nɛ o maa kane ɔ he! Se mohu ɔ, moo na Baiblo ɔ kaa tsuapo ngua ko nɛ a juaa ní slɔɔtohi fuu ngɛ mi. O be nyɛe maa mwɔɔ nɔ́ fɛɛ nɔ́ ngɛ mi. Se o ma nyɛ maa hla abɔ nɛ́ o bua jɔ he.

Bɔ nɛ pee nɛ o ná o Baiblo kanemi ɔ he se kɛ pi si ɔ, e sa nɛ o ngɔ o juɛmi kɛ ma nɔ́ nɛ o ngɛ kanee ɔ nɔ. Munyu nɛ ɔ maa ye bua mo konɛ o nyɛ nɛ o pee jã.

Ngɛ munyu nɛ ɔ mi ɔ

Mɛni he je nɛ e sa nɛ o ngɔ o juɛmi kɛ ma nɔ́ nɛ o ngɛ kanee ngɛ Baiblo ɔ mi ɔ nɔ ɔ?

Ke o bɔ mɔde wawɛɛ ngɛ o Baiblo kanemi ɔ mi ɔ, o ma ná he se wawɛɛ. Mo susu nɔ́ he tomi nɔ́ nɛ ɔ he nɛ o hyɛ: Ke o ngɔ lipton tea kake kɛ wo nyu la mi be kpiti ko nɛ o je ɔ, o ma nyɛ ma ná tii ɔ ngɔɔmi bɔɔ ko ngɛ nyu ɔ mi. Se o ma ná e ngɔɔmi ɔ wawɛɛ ke o ha nɛ e se kɛ ngɛ nyu ɔ mi.

Cup ko nɛ a po line ko kɛ be ngɛ mi. A kɛ tii wo cup ɔ he fã kake se e se kɛ we ngɛ nyu ɔ mi, lɔ ɔ ha nɛ nyu ɔ tsake kɔla bɔɔ pɛ. He fã a nɛ e piɛ ɔ lɛɛ tii ɔ se kɛ ngɛ nyu ɔ mi, enɛ ɔ ha nɛ nyu ɔ kɔla tsake wawɛɛ.

Jã nɛ Baiblo kanemi hu ngɛ. O kɛ oya yemi ko kane Baiblo ɔ, mohu ɔ, mo he be kɛ susu nɔ́ nɛ o ngɛ kanee ɔ he. Jã ji bɔ nɛ nɔ nɛ e ngma La 119 ɔ pee. E de ngɛ Mawu mlaa a he ke: “Ke je na kikɛ nɛ ɔ, e he pɛ i susuɔ.”—La 119:97.

Se ngɛ anɔkuale mi ɔ, enɛ ɔ tsɔɔ we kaa o maa hi Baiblo ɔ kanee, nɛ o maa hi he susue ligbi ɔ tsuo. Oti ɔ ji: Latsɛ ɔ he be kɛ susu Mawu Munyu ɔ he. Jã nɛ e pee ɔ ye bua lɛ nɛ e mwɔ yi mi kpɔhi nɛ da.—La 119:98-100.

“Ye mami de mi be ko ke, ‘O ngɛ ligbi kpaago ngɛ otsi ɔ mi nɛ́ o kɛ peeɔ níhi fuu kɛ haa o he. Mɛni he je nɛ o ngɔɛ be ɔ eko kɛ ha Yehowa? Jã nɛ e sa kaa o pee!’”—Melanie.

Ke o susuɔ Baiblo sisi tomi mlaahi a he ɔ, o ma nyɛ maa mwɔɔ yi mi kpɔhi nɛ da ke e ba mi kaa o maa hla huɛmɛ aloo o kɛ ka ko kpe nɛ́ e ma nyɛ ma ha nɛ o pee nɔ́ nɛ e dɛ.

Kɛ o ma plɛ kɛ ná o Baiblo kanemi ɔ he se kɛ pi si ha kɛɛ?

Moo to blɔ nya. Yiheyo ko nɛ a tsɛɛ lɛ ke Julia a de ke, “Moo to blɔ nya kɛ ha Baiblo ɔ kanemi be fɛɛ be. Bɔɔ mɔde nɛ o le nɔ́ nɛ o ma kanemi ɔ, be nɛ o kɛ maa kane, kɛ he nɛ o maa kane ngɛ.”

Yiheyo ko nɛ e ngɛ blɔ nya nɛ e to kaa e kɛ maa kane Baiblo ɔ ngmae kɛ wo kalenda nɔ.

Mo hlá he nɛ e sa. Yiheyo ko nɛ a tsɛɛ lɛ ke Gianna a de ke, “Mo hla he ko nɛ e ngɛ dii. Jehanɛ hu ɔ, mo ha nɛ o weku ɔ nɛ e le blɔ nya nɛ o to kɛ ha Baiblo ɔ kanemi ɔ konɛ ke o ngɛ kanee ɔ, a ko ngɔ níhi kɛ ba hi mi poe.”

Ke o ngɛ ní ɔ kanee ngɛ o fon aloo tablɛti nɔ ɔ, moo gbe nɔ́ fɛɛ nɔ́ nɛ e ma ha nɛ ke a mane mo sɛ gbi nɛ́ e maa ba ngɛ fon ɔ loo tablɛti ɔ nɔ ɔ. O ma nyɛ maa kane ní ɔ ngɛ Baiblo ɔ nɛ a print ɔ nitsɛ mi. Ngɛ anɔkuale mi ɔ, níhi a mi hlami tsɔɔ kaa ke o kane ní ngɛ womi nɛ a print ɔ nitsɛ mi ɔ, e ma ha nɛ o maa nu nɔ́ nɛ o ngɛ kanee ɔ sisi saminya. Se ke o ngɛ kanee ngɛ klama nɔ ɔ, e he ma nyɛ maa wa ha mo kaa o kɛ o juɛmi maa ma nɔ́ nɛ o ngɛ kanee ɔ nɔ.

“Ke i ngɛ ní kanee ngɛ klama nɔ ɔ níhi gblaa ye juɛmi. I naa sɛ gbihi nɛ baa klama a nɔ aloo eko ɔ battery ɔ ngɛ gboe aloo intanɛti ɔ hu tsu we ní saminya. Se ke i ngɛ ní kanee ngɛ womi nɛ a print ɔ nitsɛ mi ɔ, nɔ́ nɛ i hyɛɛ pɛ ji kaa i ngɛ light nɛ ma kɛ hyɛ nɔ́ kɛ kane ní ɔ.”—Elena.

Moo sɔle kekle. Mo bi Yehowa nɛ e ye bua mo nɛ o nu nɔ́ nɛ o ma kanemi ɔ sisi, nɛ o kai, nɛ́ o ná nɔ́ nɛ o maa kane ɔ he se.—Yakobo 1:5.

Mo tsu o sɔlemi ɔ he ní kɛ gu nɔ́ nɛ o ngɛ kanee ɔ nɛ o ma hla níhi a mi kɛ kɔ he ɔ nɔ. Kɛ o ma plɛ kɛ pee jã ha kɛɛ? Ke o ngɛ Baiblo ɔ kanee ngɛ JW Library app ɔ aloo Intanɛti ɔ nɔ ɔ, moo nyɛ kuku ɔ nɔ konɛ o na níhi a mi hlami munyu kpahi nɛ kɔɔ jamɛ kuku ɔ he ɔ.

Mo bi sanehi. O ma nyɛ ma bi o he ke: ‘Mɛni nɛ munyu nɛ ɔ tsɔɔ mi ngɛ Yehowa he? Anɛ e jeɔ Yehowa su ko kpo nɛ ma nyɛ ma kase lo?’ (Efeso Bi 5:1) ‘Mɛni i kase ngɛ munyu nɛ ɔ mi nɛ ma nyɛ kɛ tsu ní ngɛ ye si himi mi?’ (La 119:105) ‘Anɛ ma nyɛ ma ngɔ nɔ́ nɛ i kane ɔ kɛ ye bua ni kpahi ngɛ blɔ ko nɔ lo?’—Roma Bi 1:11.

Mo bi o he ke, ‘Mɛni tsakpa lɛ ngɛ nɔ́ nɛ i kane ɔ kɛ munyuyi titli nɛ e ngɛ Baiblo ɔ mi ɔ a kpɛti?’ Sane bimi nɛ ɔ he hia wawɛɛ. Mɛni he je? Ejakaa nɔ́ fɛɛ nɔ́ nɛ e ngɛ Baiblo ɔ mi kɛ je Mose kekleekle womi ɔ kɛ ya si Kpo Jemi ɔ kɛ munyuyi titli nɛ ngɛ Baiblo ɔ mi ɔ ngɛ tsakpa ngɛ blɔ ko nɔ. Nɛ lɔ ɔ ji: Bɔ nɛ Yehowa ma tsɔ e biɛ ɔ he ha kɛ gu e hiɔwe Matsɛ Yemi nɔ, nɛ́ e ma ha nɛ a na kaa lɛ nɛ e ngɛ he blɔ kaa e yeɔ nɔ, nɛ blɔ nɔ nɛ e guɔ kɛ yeɔ nɔ ɔ hi pe kulaa.

Nɔ́ nɛ o juami bi de

“Ke o bua jɔ yi nɔ sanehi a he ɔ, lɛɛ moo kase be nɛ́ ní komɛ kɛ ya nɔ ngɛ mahi nɛ Baiblo ɔ wo a ta a blɔ fa mi, kɛ níhi nɛ a de kɛ kɔ jamɛ a ma amɛ a he ɔ he ní. Ke o bua jɔ nihi a subai he ní kasemi he ɔ, moo kase nɔ ko kaa David he ní. Nɔ́ ko kɛ̃ ngɛ kɛ ha nɔ fɛɛ nɔ ko nɛ e maa kase. Lɔ ɔ, e ma bi nɛ o susu nɔ́ nɛ o suɔ kaa o maa kase babauu kɛ kɔ he ɔ he.”—Judah.

“Ke i ngɛ Baiblo mi sane ko kane ɔ, i bɔɔ mɔde kaa ma susu su nɛ nɔ ɔ je kpo ɔ he, ke ji e ji su kpakpa loo su yaya, nɛ i biɔ ke, ‘Mɛni lɛ e ba jamɛ a nɔ ɔ nɔ? Mɛni su nɛ e je kpo, nɛ mɛni je mi kɛ ba?’ Kɛkɛ i bi ye he ke, ‘Kɛ ma plɛ kɛ ná munyu nɛ ɔ he se ha kɛɛ?’”—Mackenzie.

“I bɔɔ mɔde kaa ma hla níhi a mi kɛ kɔ Baiblo mi sane nɛ i ngɛ he ní kanee ɔ he. Kaa nɔ hyɛmi nɔ́ ɔ, mɛni be nɛ a kɛ ngma? Mɛnɔ lɛ e ngma, nɛ mɛni yi mi tomi he je nɛ a ngma jamɛ a Baiblo womi ɔ? Níhi fuu ngɛ mi nɛ waa kɛ ma nyɛ ma tsu ní ngɛ wa mwɔnɛ ɔ be nɛ ɔ mi, se ke i hla níhi a mi kɛ ya tsitsaa a, e yeɔ bua mi nɛ i naa bɔ nɛ níhi nɛ ya nɔ ɔ sa nihi nɛ a hi si ngɛ jamɛ a be ɔ mi ɔ a he ha.”—Elle.

“Ke i ngɛ Baiblo ɔ kanee ɔ, i poɔ he foni ngɛ ye juɛmi mi kaa e sa nɛ ma tsɔɔ mi kɛ ha nɔ ko. Mɛni blɔ nɔ ma gu kɛ ye bua jamɛ a nɔ ɔ konɛ e nu sisi? Mɛni nɔ́ he tomi nɔ́ nɛ ma kɛ tsu ní kɛ tsɔɔ oti ɔmɛ a mi? Sane bimi nɛ ɔmɛ a he nɛ́ i susuɔ ɔ yeɔ bua mi nɛ i nuɔ nɔ́ nɛ i ngɛ kanee ɔ sisi saminya. Kaa bɔ nɛ a pɔɔ demi ɔ, ‘Blɔ nɛ hi pe kulaa nɛ wa maa gu nɔ kɛ kase nɔ́ ko ji kaa wa maa tsɔɔ ni kpahi.’”—Owen.