Anɛ Loloolo ɔ, Mlaahi Nɛ Ngɛ Baiblo ɔ Mi Nɛ Kɔɔ Nɔ́ Nɛ Da Kɛ Nɔ́ Nɛ Dɛ He ɔ He Hia Lo?
Nihi fuu nɛ a kpɛti ni komɛ po tsɛɛ a he ke Kristofohi ɔ nuɔ he kaa je mi bami he mlaahi nɛ ngɛ Baiblo ɔ mi nɛ́ kɔɔ bɔmi nami kɛ gba si himi he ɔ be be. Jami komɛ tsake níhi nɛ a tsɔɔ kɛ kɔɔ nɔ́ nɛ da kɛ nɔ́ nɛ dɛ he ɔ, konɛ e kɛ bɔ nɛ níhi yaa nɔ ha ngɛ wa be nɛ ɔ mi ɔ nɛ kɔ. Anɛ loloolo ɔ, mlaahi nɛ ngɛ Baiblo ɔ mi nɛ kɔɔ nɔ́ nɛ da kɛ nɔ́ nɛ dɛ he ɔ he hia lo? Ee. Blɔ nɔ nɛ wa gu kɛ le kaa mlaa nɛ ɔmɛ a he hia loloolo ɔ ji nɛ ɔ nɛ.
Adesahi hia Mawu mlaahi nɛ kɔɔ nɔ́ nɛ da kɛ nɔ́ nɛ e dɛ he
A bɔ adesahi konɛ a ngɔ a hɛ kɛ fɔ a Bɔlɔ ɔ nɔ nɛ́ e tsɔɔ mɛ blɔ. Baiblo ɔ de ke: “Pi nɔmlɔ adesa nitsɛ he wami nya ji kaa e maa pee kikɛ nɛ ɔ, loo kikɛ nɛ ɔ.” (Yeremia 10:23) E ngɛ mi kaa Yehowaa Mawu bɔ wɔ kɛ nyɛmi ɔ nɛ́ wa kɛ mwɔ yi mi kpɔhi mohu lɛɛ, se e ha we wɔ he blɔ loo nyɛmi ɔ nɛ wa kɛ tsɔɔ nɔ́ nɛ da kɛ nɔ́ nɛ dɛ kɛ ha wa he. E suɔ kaa waa ngɔ wa hɛ kɛ fɔ e nɔ konɛ e tsɔɔ wɔ blɔ.—Abɛ 3:5.
Wa naa Mawu je mi bami he mlaa amɛ ngɛ Baiblo ɔ mi. Moo hyɛ yi mi tomi enyɔ komɛ a he je nɛ je mi bami he mlaa nɛ ɔmɛ a he hia wawɛɛ ɔ.
Mawu lɛ bɔ wɔ. (La 100:3) Akɛnɛ Yehowa Mawu ji wa Bɔlɔ he je ɔ, e le nɔ́ tutuutu nɛ wa hia bɔ nɛ pee nɛ wa ná nɔmlɔ tso mi he wami kpakpa nɛ wa bua nɛ jɔ ngɛ si himi mi. E le nyagbahi nɛ waa kɛ maa kpe ke wa kua e je mi bami he mlaa amɛ. (Galatia Bi 6:7) Jehanɛ hu ɔ, Yehowa suɔ nɛ wa ná si himi kpakpa. Enɛ ɔ he je ɔ, Baiblo ɔ de ngɛ Mawu he kaa e ‘suɔ kaa e ma tsɔse wɔ, nɛ e maa tsɔɔ wɔ bɔ nɛ waa ba wa je mi ha, konɛ e hi ha wɔ nitsɛmɛ.’—Yesaya 48:17.
Níhi nɛ wa bua jɔ a he ɔ ma nyɛ maa sisi wɔ. Nihi babauu susuɔ kaa ke a nyɛɛ nɔ́ nɛ a tsui suɔ ɔ se ɔ, a ma nyɛ maa mwɔ a yi mi kpɔ ngɛ nɔ́ nɛ da kɛ nɔ́ nɛ dɛ he. Se Baiblo ɔ de ke tsui ɔ “nɔ nɔ sisilɔ ko be ɔ, e hiɔ hu be tsa ba.” (Yeremia 17:9) Ke wa ha we nɛ Mawu nile ɔ nɛ kudɔ wa tsui ɔ, e ma ha nɛ wa maa pee níhi nɛ pee se ɔ wa ma pia wa he.—Abɛ 28:26; Fiɛlɔ 10:2.
Anɛ e sa nɛ jami hɛ mi nyɛɛli nɛ a ma a hɛ ngɔ fɔ nɔ́ nɛ Baiblo ɔ de ke e da kɛ nɔ́ nɛ e dɛ ɔ nɔ lo?
Dɛbi! Baiblo ɔ tsɔɔ wɔ anɔkuale nɛ kɔɔ Mawu he kɛ bɔ nɛ e suɔ kaa waa ba wa je mi ha. (1 Korinto Bi 6:9-11; Galatia Bi 5:19-23) E suɔ kaa nihi nɛ a ba le anɔkuale nɛ ɔ. (1 Timoteo 2:3, 4) E sa kaa Kristofohi nɛ a ji tsɔɔli ɔ nɛ a tsɔɔ nɔ́ nɛ Mawu Munyu ɔ de ɔ.—Tito 1:7-9.
Nihi nɛ a sume nɛ a maa bu je mi bami he mlaahi nɛ ngɛ Baiblo ɔ mi ɔ tue ɔ suɔ jami hɛ mi nyɛɛli nɛ a ma “de mɛ níhi nɛ maa ngɔ ngɛ a tue mi.” (2 Timoteo 4:3, sisi ningma) Se Mawu Munyu ɔ kɛ kɔkɔ bɔmi nɛ hɛdɔ ngɛ he nɛ ɔ ha wɔ ke: “Musu tloo nyɛ! Nyɛ tsɛɔ yayami ke kpakpa, nɛ nyɛ tsɛɔ kpakpa ke yayami.” (Yesaya 5:20) E ngɛ heii kaa Mawu maa gbla jami hɛ mi nyɛɛli nɛ a tsɔɔ we nihi anɔkualehi nɛ kɔɔ nɔ́ nɛ Mawu de ke e da kɛ nɔ́ nɛ e dɛ ɔ he ɔ a tue.
Anɛ je mi bami he mlaahi nɛ ngɛ Baiblo ɔ mi ɔ woɔ nihi he wami kaa a ko je bumi kpo kɛ tsɔɔ níhi nɛ ni kpahi hlaa a lo?
Dɛbi. Nihi nɛ a suɔ kaa a maa sa Mawu hɛ mi ɔ ngɔɔ nɔ hyɛmi níhi nɛ Yesu pee kɛ níhi nɛ e tsɔɔ ɔ kɛ tsuɔ ní. E tsɔɔ e se nyɛɛli ɔmɛ kaa a ko kojo ni kpahi se mohu ɔ, e sa nɛ a je suɔmi kɛ bumi kpo kɛ tsɔɔ nɔ fɛɛ nɔ.—Mateo 5:43, 44; 7:1.
E sa nɛ nihi nɛ a nyɛɛɔ Yesu se ɔ nɛ a ngɔ je mi bami he mlaahi nɛ Mawu wo ɔ kɛ tsu ní ngɛ a si himi mi. Se kɛ̃ ɔ, e sa nɛ a kplɛɛ nɔ kaa ni kpahi maa suɔ kaa a maa hla níhi nɛ a ma he ye. (Mateo 10:14) Yesu fã we e se nyɛɛli ɔmɛ kaa a gu ma kudɔmi aloo blɔ kpa ko nɔ kɛ nyɛ nihi a nɔ nɛ a bu Mawu mlaa amɛ tue.—Yohane 17:14, 16; 18:36.
Mɛni se wa ma ná ke waa kɛ je mi bami he mlaahi nɛ ngɛ Baiblo ɔ mi ɔ tsu ní?
Nihi nɛ a bɔɔ mɔde kaa a kɛ Mawu mlaa nɛ kɔɔ nɔ́ nɛ da kɛ nɔ́ nɛ dɛ he ɔ ma tsu ní ɔ, ma ná he se amlɔ nɛ ɔ kɛ hwɔɔ se tsuo. (La 19:8, 11) Se nami nɛ ɔmɛ ekomɛ ji: