Ma Nɔ Yeli Ɔmɛ Bɔ Kɔkɔ Kaa E Be Kɛe Nɛ Harmagedon Maa Ba—Mɛni Baiblo ɔ De?

Ngɛ October 10, 2022 Hɔɛgbi mɔtu ɔ, Russia bi ɔmɛ ya fia oplɛmihi ngɛ mahi nɛ a ngɛ Ukraine ɔ akɛnɛ a fia oplɛmi ko kɛ je Ukraine bi ɔmɛ a ngɔ ngɛ ligbi enyɔ nɛ be ɔ nɛ́ e puɛ bridge ko nɛ́ e he hia nɛ́ e tsa Crimea kɛ Russia a he je. Benɛ ma hɛ mi nyɛli komɛ de kɛ fɔ si kaa e be kɛe nɛ́ Harmagedon maa ba a, e kɛ we nɛ nɔ́ nɛ ɔ ya nɔ.

• “Kɛ je [U.S. President John F.] Kennedy kɛ Cuban Missile Crisis . . . be ɔ mi kɛ ma nɛ ɔ, wa su Harmagedon he haa wawɛɛ. I he we yi kaa a kɛ oplɛmi nguahi ma tsu ní kikɛ nɛ́ lɔ ɔ kɛ Harmagedon be bae.”—U.S. President Joe Biden, October 6, 2022.

• “I he ye kaa e be kɛe nɛ Harmagedon maa ba, nɛ enɛ ɔ kɛ oslaa maa ba je ɔ mi tsuo.”—Enɛ ɔ ji nɔ́ nɛ Ukraine President Volodymyr Zelensky de benɛ a bi lɛ nɔ́ nɛ e maa je oplɛmihi nɛ́ a kɛ ngɛ ní tsue ɔ mi kɛ ba a, BBC News, October 8, 2022.

Anɛ oplɛmi nguahi nɛ́ a kɛ ngɛ ní tsue ɔ lɛ maa ngɔ Harmagedon kɛ ba a lo? Mɛni Baiblo ɔ de?

Anɛ oplɛmi nguahi nɛ́ a kɛ ngɛ ní tsue ɔ maa ngɔ Harmagedon kɛ ba lo?

Dabi. Munyu nɛ ji “Harmagedon” ɔ je kpo si kake pɛ ngɛ Baiblo ɔ mi ngɛ Kpo Jemi 16:16. E kɔ we ta nɛ maa ya nɔ ngɛ je ma amɛ a kpɛti ɔ he, mohu ɔ e ji ta nɛ maa ya nɔ ngɛ Mawu kɛ “matsɛmɛ ɔmɛ nɛ a ngɛ zugba a nɔ hehi tsuo nɛ nimli ngɛ” ɔ a kpɛti. (Kpo Jemi 16:14) Mawu maa gu Harmagedon ta a nɔ kɛ kpata adesa nɔ yemihi a hɛ mi.​—Daniel 2:44.

Ke o suɔ nɛ́ o kase babauu kɛ kɔ bɔ nɛ Harmagedon maa sa zugba a he ha a, moo kane munyu nɛ ji, What Is the Battle of Armageddon?

Anɛ a ma kpata zugba a kɛ nihi nɛ a ngɛ nɔ ɔ a hɛ mi kɛ gu ta nɛ́ a kɛ oplɛmi maa hwu ɔ nɔ lo?

Dabi. E ngɛ mi kaa eko ɔ ma nɔ yeli ɔmɛ maa ngɔ oplɛmi nguahi kɛ tsu ní hwɔɔ se mohu lɛɛ, se Mawu be mɛ blɔ ngmɛe nɛ́ a kpata zugba a hɛ mi. Baiblo ɔ de ke:

• ‘Zugba a maa hi si kɛ maa ya neneene.’​—Fiɛlɔ 1:4.

• “Nihi nɛ peeɔ nɔ́ nɛ da a, zugba a maa pee a nɔ́ nɛ a maa hi nɔ daa.”​—La 37:29.

Se kɛ̃ ɔ, Baiblo gbamihi kɛ níhi nɛ ngɛ nɔ yae amlɔ nɛ ɔ, tsɔɔ kaa e be kɛe nɛ tsakemi nguahi maa ba adesahi a si himi mi. (Mateo 24:3-7; 2 Timoteo 3:1-5) Moo hyɛ nɔ́ nɛ Baiblo ɔ de kɛ kɔ hwɔɔ se he kɛ gu Baiblo ɔ nɛ́ a kɛ mo maa kase nɛ a he we nɔ́ ko ɔ nɔ.