Nihi Fuu He We Nihi Nɛ A Nyɛɛ Ma Kudɔmi Kuu Ɔmɛ A Hɛ Mi ɔ Yi Hu​—Mɛni Baiblo ɔ De?

Ngɛ jeha 2024 nɛ ɔ mi ɔ, sɔ fɔmihi maa ya nɔ wawɛɛ ngɛ je ɔ mi tsuo pe jehahi nɛ be ɔ. Se kɛ̃ ɔ, nihi fuu he we nihi nɛ a nyɛɛ ma kudɔmi kuu ɔmɛ a hɛ mi ɔ yi hu.

• Nihi fuu nɛ a bi mɛ munyu ngɛ Amerika a tsɔɔ kaa “nihi fuu nɛ a nyɛɛ ma kudɔmi kuuhi a hɛ mi ɔ suɔ kaa a ma fo mɛ pɛ a nɔ mi” mohu pe nɛ a ma ná suɔmi ɔ kaa a maa pee ní kpakpahi kɛ ye bua nihi nɛ a ngɛ a sisi ɔ.a​—Pew Research Center, September 19, 2023.

Jã nɔuu nɛ nihewi kɛ yihewi fuu hu he we nihi nɛ a nyɛɛ ma kudɔmi kuuhi a hɛ mi ɔ yi hu.

• “Nihewi kɛ yihewi nɛ a ngɛ mwɔnɛ ɔ suɔ kaa a ná nyagbahi a nya tsaba, se ngɛ níhi a mi hlami ko nɛ a pee ɔ mi ɔ, a de kaa ma kudɔmi kuu ɔmɛ a hɛ mi nyɛɛli ɔmɛ nyɛ we nɛ a ná nyagba amɛ a nya tsaba.”​—The New York Times, January 29, 2024.

• “Ngɛ níhi a mi hlami ko nɛ a pee ɔ mi ɔ, nihewi kɛ yihewi fuu nɛ a bi mɛ munyu ɔ tsɔɔ kaa, nihi nɛ a he mɛ ye ji nihi nɛ a peeɔ videohi kɛ fɔɔ Intanɛti ɔ nɔ nɛ́ nihi fuu bua jɔ a he nɛ́ a hyɛɛ a video ɔmɛ ɔ. A he nimli nɛ ɔmɛ ye wawɛɛ pe nihi nɛ a nyɛɛ ma kudɔmi kuu ɔmɛ a hɛ mi ɔ.”​—The Korea Times, January 22, 2024.

Anɛ wa ma nyɛ ma he nihi nɛ a nyɛɛ ma kudɔmi kuu ɔmɛ a hɛ mi ɔ maa ye kaa a ma nyɛ ma ha nɛ wa ná si himi kpakpa hwɔɔ se lo? Mɛnɔ nɛ wa ma nyɛ ma he lɛ maa ye?

Hyɛ saminya ngɛ nɔ nɛ o ma he lɛ maa ye ɔ he

E da blɔ kaa nihi maa hyɛ saminya ngɛ nɔ nɛ a ma he lɛ maa ye ɔ he. Baiblo ɔ de ke “nɔ nɛ e juɛmi nya wɛ ɔ heɔ munyu fɛɛ munyu yeɔ, se nɔ nɛ e hɛ mi tɛ ɔ susuɔ nɔ́ fɛɛ nɔ́ nɛ e peeɔ ɔ he.”​—Abɛ 14:15.

• Ke o suɔ nɛ o na níhi nɛ maa ye bua mo konɛ o na blɔ nɔ nɛ o maa gu kɛ le amaniɛ bɔmihi nɛ a da kɛ ní nɛmɛ nɛ a dɛ ɔ, moo kane munyu nɛ ji “Moo Po O He Piɛ Kɛ Je Sisimi Munyuhi A He.”

Jehanɛ se hu ɔ, nihi nɛ a nyɛɛ ma kudɔmi kuuhi a hɛ mi nɛ́ a yeɔ anɔkuale nɛ a hɛɛ juɛmi nɛ da a po be nyɛe maa pee nɔ́ fɛɛ nɔ́ nɛ a suɔ nɛ́ a pee ɔ. Enɛ ɔ he je nɛ Baiblo ɔ bɔ wɔ kɔkɔ ke:

• “Koo ngɔ o hɛ ngɔ fɔ adesa hɛ mi nyɛɛli a nɔ; adesa ko be nɛ ma nyɛ ma he o yi wami.”​—La 146:3, Good News Translation.

Hɛ mi nyɛɛlɔ nɛ o ma nyɛ ma he lɛ maa ye

Baiblo ɔ ha nɛ wa le kaa Mawu hla hɛ mi nyɛɛlɔ nɛ sa, nɛ́ a ma nyɛ ma he lɛ maa ye: Lɛ ji Yesu Kristo. (Luka 1:32, 33) Yesu ji Mawu Matsɛ Yemi ɔ nya Matsɛ. Matsɛ Yemi nɛ ɔ ji nɔ yemi nɛ maa ye nɔ kɛ je hiɔwe.​—Mateo 6:10.

• Moo kase nɔ́ he je nɛ o ma nyɛ ma he Yesu maa ye ɔ, kɛ nɔ́ nɛ Yesu maa pee kɛ tsu nyagbahi nɛ adesahi kɛ kpeɔ ɔ he ní. Moo kane munyu nɛ ji “Mɛnɔ Ji Mawu Matsɛ Yemi ɔ Nya Matsɛ?” kɛ “Mɛni Mawu Matsɛ Yemi ɔ Ma Tsu?”