Ke O Kɛ Ni Kpahi Bɔɔ ɔ, E Maa Ye Bua Mo Nɛ́ O Ko Nu He Kaa E Piɛ Mo Pɛ​—Bɔ Nɛ Baiblo ɔ Maa Ye Bua Mo Ha

Ngɛ jeha 2023 ɔ mi ɔ, nihi nɛ a hyɛɛ nɔmlɔ tso mi he wami nami nɔ ɔ ngɔ kɛ ma a hɛ mi kaa ngɛ je ɔ mi tsuo ɔ, a ma hla tsaba kɛ ha he numi nɛ nihi náa kaa e piɛ mɛ pɛ ɔ. Anɛ he numi nɛ ɔ nya tsaba ngɛ lo?

• Dɔkita nɔkɔtɔma ko nɛ e ngɛ United States nɛ a tsɛɛ lɛ ke Vivek Murthy ɔ de ke: “Ke wa nuɔ he kaa e piɛ wɔ pɛ, nɛ wa yuɔ wa he kɛ jeɔ ni kpahi a he ɔ, lɔ ɔ ma nyɛ maa ye wa nɔmlɔ tso ɔ awi nɛ e be hae nɛ wa ná bua jɔmi.” Se e de kɛ piɛɛ he ke: “E he nɔ ko maa hi pee mi.” Ngɛ mɛni blɔ nɔ? “Kɛ gu ní nyafinyafi komɛ nɛ wa maa pee kɛ wo huɛ bɔmi nɛ ngɛ waa kɛ ni kpahi wa kpɛti ɔ mi he wami ɔ nɔ.”a

Pi wa he nɛ wa yuɔ kɛ jeɔ nihi a he ɔ pɛ nɛ e haa nɛ wa nuɔ he kaa e piɛ wɔ pɛ. Ni komɛ ngɛ nɛ ke a ngɛ ni kpahi a kpɛti po ɔ, a nuɔ he kaa e piɛ mɛ pɛ. Baiblo ɔ ma nyɛ maa ye kɛ bua wɔ kɛ da nɔ́ fɛɛ nɔ́ nɛ e haa nɛ wa nuɔ he kaa e piɛ wɔ pɛ ɔ nya. Ga womi kpakpahi ngɛ mi nɛ ma nyɛ maa tsɔɔ wɔ bɔ nɛ wa maa wo huɛ bɔmi nɛ ngɛ waa kɛ ni kpahi wa kpɛti ɔ mi he wami ha, nɛ enɛ ɔ ma nyɛ maa ye bua wɔ konɛ wa ko nu he kaa e piɛ wɔ pɛ.

Baiblo sisi tomi mlaahi nɛ ma nyɛ maa ye bua mo

Moo pee nɔ ko nɛ e bɔɔ ní sɛɛmi he mɔde. Enɛ ɔ tsɔɔ kaa e sɛ nɛ o tu bɔ nɛ o ngɛ he nue ha pɛ ɔ he munyu, mohu ɔ, e sa nɛ o bu ni kpahi hu tue ke a ngɛ munyu tue. Ke o peeɔ níhi nɛ tsɔɔ kaa o suɔ nihi nitsɛnitsɛ ɔ, huɛ bɔmi nɛ ngɛ o kɛ mɛ nyɛ kpɛti ɔ mi waa.

• Baiblo sisi tomi mlaa: ‘Nyɛ ko fo nyɛ nitsɛmɛ pɛ nyɛ nɔ́ mi, se mohu nyɛ fo ni kpahi hu a nɔ́ mi.’​—Filipi Bi 2:4.

Bɔɔ mɔde nɛ o kɛ nihi fuu nɛ pee huɛ. Moo je o tsui mi nɛ o kɛ nihi nɛ a wa kɛ nihi nɛ a wɛ, kɛ nihi nɛ a je wɛtsohi kɛ ma kpahi a mi ɔ nɛ pee huɛ.

• Baiblo sisi tomi mlaa: “Nyɛ bli nyɛ tsui mi gbajaa.”​—2 Korinto Bi 6:13.

Ke o suɔ nɛ o le babauu kɛ kɔ nɔ́ nɛ o ma nyɛ maa pee konɛ huɛ bɔmi kpakpa nɛ hi o kɛ ni kpahi nyɛ kpɛti ɔ, moo kane munyu nɛ ji “Satisfying Our Hunger for Friendship.”