Jije Yehowa Odasefohi Náa Sika Ngɛ Kɛ Hyɛɛ A Ní Tsumi ɔ Nɔ?

Yehowa Odasefohia jeɔ a tsui mi nɛ a haa yemi kɛ buami nɛ a kɛ fĩɔ fiɛɛmi ní tsumi ɔ se. Yemi kɛ buami dakahi ngɛ hehi nɛ wa peeɔ wa kpe ɔmɛ ngɛ ɔ, nɛ ke nɔ ko suɔ kaa e ma ha yemi kɛ buami ɔ, e kɛ woɔ mi, jehanɛ hu ke o ya wa Donation blɔ he ɔ, a tsɔɔ blɔ kpahi nɛ o ma nyɛ maa gu a nɔ kɛ ha yemi kɛ buami. A tsɔɔ níhi slɔɔtohi ngɛ lejɛ ɔ, bɔ nɛ pee nɛ ke nɔ ko suɔ kaa e ma ha yemi kɛ buami kɛ fĩ wa je kɛ wɛ ní tsumi ɔ se, aloo e kɛ fĩ asafo nɛ e ngɛ mi ɔ se, aloo e suɔ kaa e ma ha yemi kɛ buami kɛ ha ní enyɔ nɛ ɔmɛ tsuo ɔ, e nyɛ nɛ e pee jã.

Yehowa Odasefohi wui mi dlami nyɔngma, nɛ a hyɛ we blɔ kaa a je sika abɔ ko ngɛ sika nɛ a náa ngɛ a ní tsumi mi ɔ kɛ ha yemi kɛ buami. (2 Korinto Bi 9:7) Wa he we nɔ́ ko ngɛ wa kpehi a sisi, nɛ wa tsu we sika ngɛ wa kpe ɔmɛ a sisi hulɔ, jehanɛ hu nyumuhi nɛ a nyɛɛ wa hɛ mi ɔ he we sika ke a maa baptisi nɔ ko, aloo a maa pee ya, aloo ke yo kpeemi loo jami blɔ nya tomi ko maa ya nɔ. Wa jami ɔ jua we níhi kɛ hla sika, nɛ jehanɛ hu wa fiɛ we asɔ, nɛ wa ngmɛ́ okplɔɔ kɛ yi mi tomi kaa wa kɛ hla sika, nɛ wa pee we ní kpahi nɛ a ngɛ kaa jã hulɔ, jehanɛ hu, wa bɛ sika. A kɛ nihi nɛ a haa yemi kɛ buami ɔ a biɛ loo a he sane ha we nihi. (Mateo 6:2-4) Wa wɛbsaiti ɔmɛ kɛ wa womi ɔmɛ fiɛ ní tsumihi a he adafi konɛ wa kɛ ná sika.

Yehowa Odasefohi asafo ɔmɛ eko fɛɛ eko bɔɔ sika nɛ a náa ngɛ nyɔhiɔ fɛɛ nyɔhiɔ mi ɔ he amaniɛ ngɛ a we asafo mi kpe ɔmɛ a sisi. Nɔ fɛɛ nɔ ma nyɛ maa ya asafo mi kpe ɔ eko. A hyɛɛ konɛ a kɛ sika nɛ asafo ɔ náa a nɛ tsu ní saminya, enɛ ɔ he ɔ, a buɔ asafo ɔ sika he akɔtaa be fɛɛ be.​—2 Korinto Bi 8:20, 21.

Blɔhi A Nɔ Nɛ O Maa Gu Nɛ O Kɛ Sika Maa Ye Bua

• Yemi kɛ buami dakahi: O ma nyɛ maa ngɔ sika loo check kɛ wo yemi kɛ buami dakahi nɛ ngɛ Matsɛ Yemi Asahi, Kpe Peemi Asahi aloo he kpahi nɛ wa buaa wa he nya ngɛ kɛ peeɔ kpehi ɔ a mi.

• Yemi kɛ buami hami ngɛ Intanɛti ɔ nɔ: Ngɛ mahi fuu a nɔ ɔ, nihi ma nyɛ maa ya “Donate to Jehovah’s Witnesses” nɛ ngɛ jw.org ɔ nɔ ɔ, nɛ́ a ha yemi kɛ buami kɛ gu credit card loo debit card nɔ. A ma nyɛ maa gu bank transfer loo electronic blɔ kpahi a nɔ kɛ ha yemi kɛ buami hulɔ.b Yehowa Odasefo ɔmɛ a ti ni komɛ ma a juɛmi nya si kaa a ma “je nɔ́ ko ngɔ to” konɛ a kɛ ha yemi kɛ buami kɛ gu electonic blɔ nɛ ɔmɛ eko nɔ daa nyɔhiɔ.​—1 Korinto Bi 16:2.

  

• Nike ní hami: Blɔ nɔ nɛ wa maa gu kɛ ha yemi kɛ buami loo nike ní komɛ ɔ ma bi nɛ waa sɛ hlami nɛ waa to níhi a he blɔ nya saminya, aloo wa bi yemi kɛ buami kɛ je mlaa leli a ngɔ kɛ to níhi a he blɔ nya. Ke o to níhi a he blɔ nya saminya a, e maa ye bua nɛ a ma nyɛ ma gbɔ tó nɛ o woɔ ngɛ o ma a mi ɔ nɔ aloo o be woe kulaa. Nihi kɛ nike ní ma nyɛ ma ha be mi nɛ a ngɛ wami mi aloo a kɛ ma nyɛ ma ha kaa gbosi ní. Ke nihi nu nike ní hami he blɔ nya tomi nɛ ɔ sisi saminya a, e maa ye bua mɛ wawɛɛ. Wa kpa mo pɛɛ nɛ o bi yemi kɛ buami ngɛ Yehowa Odasefohi a ní tsumi kɔni nɛ ngɛ nyɛ ma a mi ɔ ngɔ ke o ngɛ hlae nɛ o ma ha nike ní ko nɛ kɔɔ níhi nɛ nyɛɛ se nɛ ɔmɛ a he:

  • sika nɛ a kɛ to sika to he

  • insiɔlansi kɛ pension sika he blɔ nya tomi

  • zugbahi kɛ tsuhi

  • stocks kɛ bonds (sika nɛ a kɛ wo ní tsumi ko mi aloo a pa ha ní tsumi ko)

  • gbosi ní he blɔ nya tomi

Ke o ngɛ hlae nɛ o le babauu kɛ kɔ bɔ nɛ o kɛ sika maa ye bua he ɔ, moo ya “Donate to Jehovah’s Witnesses” blɔ he ɔ.