Anɛ Yehowa Odasefohi Ngɛ Mɛ Nitsɛmɛ A Baiblo Lo?
Yehowa Odasefohi ngɔ Baiblo sisi tsɔɔmi slɔɔtohi kɛ kase Baiblo ɔ. Se waa kɛ New World Translation of the Holy Scriptures ɔ tsuɔ ní wawɛɛ akɛnɛ Mawu biɛ ɔ je kpo ngɛ mi, nɛ bɔ nɛ a tsɔɔ sisi ha a da, nɛ e kanemi hu yi ɔ he je.
Mawu biɛ ɔ nɛ a kɛ tsu ní. Baiblo sisi tsɔɔli kɛ bu ha we Baiblo ɔ Ngmalɔ ɔ. Kaa nɔ hyɛmi nɔ́ ɔ, ngɛ Baiblo sisi tsɔɔmi ko mi ɔ, a ngma nihi nɛ a he hiɛ pe 70 nɛ a ye bua kɛ pee jamɛ a Baiblo ɔ a biɛ ngɛ ba fa nɛ tsɔɔ Baiblo ɔ peeli ɔ. Se ngɛ jamɛ a Baiblo ɔ nɔuu mi ɔ, a je Baiblo ɔ Ngmalɔ, nɛ ji Yehowa Mawu ɔ biɛ kɛ je mi kulaa!
Se nihi nɛ a tsɔɔ New World Translation ɔ sisi ɔ ngɔ Mawu biɛ ɔ kɛ wo Baiblo ɔ mi hehi nɛ a je kpo ngɛ ɔmɛ, nɛ jehanɛ hu, a ngmɛ́ mɛ nitsɛmɛ a biɛ ngɛ Baiblo ɔ mi he ko.
Bɔ nɛ e da ha. Pi Baiblo sisi tsɔɔli tsuo nɛ a tsɔɔ Baiblo ɔ mi sɛ gbi ɔ sisi pɛpɛɛpɛ. Kaa nɔ hyɛmi nɔ́ ɔ, Baiblo sisi tsɔɔmi ko tsɔɔ Mateo 7:13 ɔ sisi ke: “Nyɛɛ sɛ agbo tokofii ɔ mi, ejakaa agbo nɛ kɛ nɔ yaa hɛl mi ɔ mi bli.” Se ngɛ blema Hela Ngmami ɔ mi ɔ, a kɛ munyu nɛ ji “hɛ mi kpatami” lɛ tsu ní, se pi “hɛl.” Eko ɔ, Baiblo sisi tsɔɔli ɔmɛ kɛ munyungu “hɛl” ɔ wo lejɛ ɔ akɛnɛ a he ye kaa a ma kpata yayami peeli a hɛ mi ngɛ hɛl la mi kɛ ya neneene ɔ he je. Se susumi nɛ ɔ dɛ Baiblo ɔ nɔ. Lɔ ɔ he ɔ, New World Translation ɔ tsɔɔ Mateo 7:13 ɔ sisi ngɛ blɔ nɛ da nɔ ke: “Nyɛɛ sɛ agbo tokofii ɔ mi, ejakaa agbo nɛ kɛ nɔ yaa hɛ mi kpatami mi ɔ mi bli.”
Bɔ nɛ e sisi numi yi ha. Baiblo sisi tsɔɔmi nɛ hi ɔ, pi nɛ e da pɛ kɛkɛ, se mohu, e sisi numi hu yi. Mo susu nɔ hyɛmi nɔ́ nɛ ɔ he nɛ o hyɛ. Ngɛ Roma Bi 12:11 ɔ, bɔfo Paulo kɛ Hela munyu ko tsu ní, nɛ nɔ́ nɛ e tsɔɔ ji, “mumi nɛ ngɛ fiae”. Sisi numi be munyu nɛ ɔ he, lɔ ɔ he ɔ, New World Translation ɔ tsɔɔ jamɛ a ngmami ɔ sisi bɔ nɛ e sisi numi be yee. E tsɔɔ kaa e sa nɛ Kristofohi nɛ a “kɛ hɛdɔ nɛ tsu ní.”
New World Translation ɔ kɛ Mawu biɛ ɔ tsu ní, e da, nɛ e sisi numi yi. Ngɛ enɛ ɔmɛ tsuo se ɔ, a gbaa ha nihi nɛ a he we nɔ́ ko. Enɛ ɔ he ɔ, nihi ayɔhi abɔ ngɛ Baiblo ɔ kanee ngɛ a je gbi mi—nɛ nihi nɛ a be nɔ́ ko tsɔ nɛ a kɛ ma he ɔ po ná eko.