Mɛni Nɛ Baiblo ɔ De Ngɛ Hɔ Jemi He?
Nɔ́ nɛ Baiblo ɔ de
E ngɛ mi kaa Baiblo ɔ kɛ munyu nɛ ji “hɔ jemi” tsu we ní mohu lɛɛ, se kɛ̃ ɔ, Baiblo ngmami kpahi yeɔ bua wɔ nɛ wa naa Mawu juɛmi ngɛ adesa wami nɛ bimwɔyo nɛ a fɔ we lɛ lolo hu piɛɛ he ɔ he.
Wami ji nike ní nɛ je Mawu ngɔ. (1 Mose 9:6; La 36:9) E buu wami kaa e he jua wa, nɛ bimwɔyo nɛ e ngɛ e nyɛ muklii mi ɔ hu piɛɛ he. Lɔ ɔ ke nɔ ko je blɔ nɛ e gbe bimwɔyo nɛ a fɔ we lɛ lolo ɔ, e ngɛ kaa nɔ gbemi nɔuu.
Mlaa nɛ Mawu wo Israel bi ɔmɛ tsɔɔ kaa, “Ke nyumuhi ngɛ kunɔ nɔe nɛ a he ya si yohɔyo ko nɛ e fɔ be mi nɛ e sui e fɔmi be, se gbenɔ ko ji mi kɛ bɛ ɔ, nɔ nɛ e he si lɛ ɔ nɛ e wo hiɔ nɛ yo ɔ huno ɔ maa bɔ lɛ ɔ; é wo kɛ gu kojoli ɔmɛ a nɔ. Se ke gbenɔ ko je mi kɛ ba a, lɛɛ á ngɔ wami kɛ to wami nane mi.”—2 Mose 21:22, 23, NW.a
Mɛni be nɛ adesa wami jeɔ sisi?
Ke yo ko ngɔ hɔ pɛ ɔ, Mawu buu bimwɔyo ɔ kaa adesa. Ngɛ Mawu Munyu nɛ ji Baiblo ɔ mi ɔ, Mawu tu bimwɔwi nɛ a fɔ we mɛ lolo ɔ a he munyu si abɔ kaa adesahi. Ha nɛ wa susu nɔ hyɛmi ní komɛ nɛ tsɔɔ kaa Mawu naa bimwɔyo nɛ a fɔ we lɛ lolo ɔ kaa bɔ nɛ e naa bi nɛ a fɔ lɛ momo ɔ he nɛ waa hyɛ.
Matsɛ David de Mawu ke: “O hɛngmɛhi po na mi be nɛ i ji muɔ loku ngɛ fɔmi kotoku mi ɔ.” (La 139:16, NW). Mawu na David kaa e ji adesa loko a fɔ lɛ po.
Jehanɛ se hu ɔ, Mawu to ní tsumi klɛdɛɛ ko he blɔ nya kɛ fɔ si ha gbalɔ Yeremia loko a fɔ lɛ po. Mawu de lɛ ke: “Loko i puɛ mo kɛ wo muklii mi ɔ, jamɛ a be ɔ mi ɔ, i le mo momo. Benɛ a ná we nɛ a fɔ mo ɔ, jamɛ a be ɔ mi ɔ, i hla mo ngɔ to momo nɛ́ o ba gba kɛ tsɔɔ je ma amɛ.”—Yeremia 1:5.
Baiblo ngmalɔ Luka nɛ e ji tsopa peelɔ ɔ ngɔ Hela munyungu nɛ e kɛ kale bi nɛ a fɔ we lɛ lolo ɔ nɔuu kɛ kale bi nɛ a fɔ ɔ.—Luka 1:41; 2:12, 16.
Anɛ Mawu kɛ nɔ ko nɛ je hɔ ɔ tɔ̃mi maa ke lɛ lo?
Mawu kɛ nihi nɛ a je hɔ ɔ a tɔ̃mi ma nyɛ maa ke mɛ. Enɛ ɔ he ɔ, e sɛ nɛ a he nile nɛ ya nɔ nɛ e hi mɛ fɔ bue ke ji kaa amlɔ nɛ ɔ, a ba kplɛɛ bɔ nɛ Mawu naa wami ha a nɔ. ‘Yehowa naa mɔbɔ; e mi mi hi. E jeɔ wa he yayami ɔmɛ kɛ yaa tsitsaa lokoo kaa bɔ nɛ beleku kɛ bonyoku a kpɛti blɔ kɛ ɔ.’b (La 103:8-12) Yehowa kɛ nihi tsuo nɛ a pee yayamihi nɛ́ hɔ jemi hu piɛɛ he, se a pia a he kɛ je a tsui mi ɔ a he yayami maa ke mɛ.—La 86:5.
Anɛ e ji tɔ̃mi kaa nɔ ko ma je hɔ ke binyɛ ɔ loo bimwɔyo ɔ wami ngɛ oslaa mi lo?
Ngɛ nɔ́ nɛ Baiblo ɔ de kɛ kɔ bimwɔyo nɛ a fɔ we lɛ lolo ɔ wami he ɔ nya a, ke nɔ ko je hɔ akɛnɛ eko ɔ, a de lɛ kaa lɛ binyɛ ɔ loo bimwɔyo ɔ ma ná nyagba ko he je ɔ, e ji tɔ̃mi.
Se ke si fɔfɔɛ ko ba nɛ benɛ e su be nɛ binyɛ ɔ ma fɔ aloo benɛ e ngɛ fɔe ɔ, e he ba hia nɛ a hla ke ji a ma he binyɛ ɔ loo bimwɔyo ɔ yi wami hu nɛɛ? Ke e ba lɛ jã a, lɛɛ e sa nɛ nyumu ɔ kɛ yo ɔ nɛ a mwɔ yi mi kpɔ ngɛ nɔ nɛ a maa hla kaa a ma he e yi wami ɔ he.
a Baiblo sisi tsɔɔmi komɛ ha nɛ e pee kaa ngɛ mlaa nɛ ɔ nya a, nɔ́ nɛ he hia wawɛɛ ji nɔ́ nɛ ba binyɛ ɔ nɔ, se pi bimwɔyo nɛ a fɔ we lɛ lolo ɔ nɔ. Se nɔ́ nɛ Hebri ngmami ɔ ngɛ tsɔɔe ji oslaa nɛ maa ba nɛ ma ha nɛ binyɛ ɔ loo bimwɔyo ɔ ma gbo.