Yesaya
27 Jamɛ a ligbi ɔ, Yehowa maa ngɔ e klaate nɛ e nya ba, nɛ e kle, nɛ e he wa a
Kɛ fia Leviatan,* sinɔ nɛ e he sɔɔ ɔ,
Sinɔ nɛ sãã si langalanga a,
Nɛ e maa gbe wo mi lohwe ngua a.
2 Jamɛ a ligbi ɔ, nyɛ la ha lɛ* ke:
Wai ngmɔ nɛ e mi wai ngɛ hwɔli fiae!
3 Imi Yehowa i ngɛ e he bue.
I pueɔ e nɔ nyu be fɛɛ be.
I buɔ e he nyɔ kɛ pia,
Konɛ nɔ ko nɛ ko ye lɛ awi.
4 Abofu ko be ye mi.
Mɛnɔ maa ngɔ mio tsohi kɛ nga kɛ ba tua mi ngɛ ta nya?
Ma naa a nɔ nɛ ma sã mɛ tsuo.
5 Ja e ba ye ngɔ kɛ ha he piɛ pomi.
É ba nɛ e kɛ mi nɛ ba dla;
É kɛ mi nɛ ba dla.”
6 Be ma nɛ Yakob sipoku maa pi si,
Israel ma gba mɔmɔ nɛ e maa bɔ,
Nɛ a ma ha nɛ niba ní ma hyi zugba a nɔ tɔ.
7 Anɛ e sa kaa a fiaa lɛ nɔ́ kaa bɔ nɛ nɔ nɛ ngɛ lɛ nɔ́ fiae ɔ ngɛ pee ɔ lo?
Aloo anɛ e sa kaa a gbe lɛ kaa bɔ nɛ a gbe e we bi ɔmɛ ɔ lo?
8 Ke o ngɛ lɛ fiee kɛ ho ɔ, o ma kpa ngmlaa wawɛɛ, nɛ o kɛ lɛ maa plee nɔ́ he.
E kɛ kɔɔhiɔ nɛ nya wa maa fiee lɛ kɛ ho ngɛ ligbi nɛ puje he kɔɔhiɔ ɔ maa fia a nɔ.
9 Blɔ nɛ ɔ nɔ a maa gu kɛ kpata kɛ ha Yakob yayami ɔ,
Nɛ ke a je e yayami ɔ kɛ je ɔ, yiblii nɛ e maa wo ji nɛ ɔ nɛ:
E ma ha nɛ afɔle sami latɛ ɔmɛ
Maa pee kaa ayilɔ nɛ a wɛɛ,
Nɛ wɔ tsohi* loo tsopa kɛ e he via sami nɔ́ ko be piɛe.
10 Ejakaa ma nɛ a fia gbogbo ngɔ wo he ɔ mi maa fɔ si gu;
Lohwehi a ní yemi he ɔ maa fɔ si gu, nɛ e maa pee kaa nga kplanaa nɔ.
Na bi maa ye ní ngɛ lejɛ ɔ, nɛ e maa bu si
Nɛ e ma kpe tso ɔmɛ a kɔni ɔmɛ.
11 Ke e kɔni ɔmɛ gbli ɔ,
Yihi ma ba ku,
Nɛ a kɛ ma ya slɛ la
Ejakaa ma nɛ ɔ nui nɔ́ sisi.
Lɔ ɔ he je nɛ a Bɔlɔ* ɔ be mɛ mɔbɔ nae,
Nɛ nɔ nɛ e bɔ mɛ ɔ mi mi be lɛ sãe ngɛ a he ɔ nɛ.
12 Jamɛ a ligbi ɔ, Yehowa ma kplɔ yiblii ɔ kɛ je Pa a* nɛ ngɛ bee ɔ he kɛ ya si Egipt Dɔgba* a mi, nɛ e ma bua nyɛ nya kakaaka, nyɛ Israelbi. 13 Jamɛ a ligbi ɔ, a ma kpa bɛ ngua ko, nɛ nihi nɛ a hɛ mi ngɛ kpatae ngɛ Asiria zugba a nɔ ɔ kɛ nihi nɛ a gbɛ fia Egipt zugba a nɔ ɔ maa ba, nɛ a ma ba kplã si ha Yehowa ngɛ yoku klɔuklɔu ɔ nɔ ngɛ Yerusalem.