Yeremia

41 Ngɛ nyɔhiɔ kpaagone ɔ mi ɔ, Ishmael nɛ ji Elishama bi Netania bi ɔ, nɔ nɛ ngɛ he blɔ kaa e yeɔ matsɛ ɔ,* nɛ́ e ji matsɛ ɔ he nyumu nikɔtɔma amɛ a kpɛti nɔ kake ɔ kɛ nyumuhi nyɔngma komɛ ba Ahikam bi Gedalia ngɔ ngɛ Mizpa. Benɛ a bla kɛ ngɛ ní yee ngɛ Mizpa a, 2 Netania bi Ishmael kɛ nyumuhi nyɔngma amɛ te si nɛ a kɛ klaate gbe Gedalia, nɛ ji Shafan bi Ahikam bi ɔ. Enɛ ɔ he ɔ, e gbe nɔ nɛ Babilon matsɛ ɔ wo lɛ nya dalɔ ngɛ zugba a nɔ ɔ. 3 Jehanɛ se hu ɔ, Ishmael gbe Yudabi tsuo nɛ a kɛ Gedalia ngɛ Mizpa a, kɛ Kaldea tabuli ɔmɛ nɛ a ngɛ lejɛ ɔ hulɔ.

4 Benɛ a gbe Gedalia se ligbi enyɔ, nɛ́ nɔ ko nɔ ko li he nɔ́ ko ɔ, 5 nyumuhi 80 komɛ je Shekem, Shilo kɛ Samaria kɛ ba. A sɛ a kpɛni nɛ a gba a tade ɔmɛ, nɛ a kɛ nɔ́ poopoo a he, nɛ a hɛɛ ngma afɔle kɛ ohɛ ngɛ a dɛ mi nɛ́ a kɛ ma Yehowa we ɔ. 6 Enɛ ɔ he ɔ, Netania bi Ishmael je Mizpa konɛ e kɛ mɛ nɛ ya kpe, benɛ e ngɛ nyɛɛe kɛ yaa a, e ngɛ ya foe. Benɛ e kɛ mɛ kpe ɔ, e de mɛ ke: “Nyɛɛ ba Ahikam bi Gedalia ngɔ.” 7 Se benɛ a ba ma a mi ɔ, Netania bi Ishmael kɛ e nyumu ɔmɛ gbe mɛ nɛ a sake mɛ kɛ pue nyu si tomi muɔ ko mi.

8 Se a kpɛti nyumuhi nyɔngma de Ishmael ke: “Koo gbe wɔ, ejakaa waa kɛ hwiit, barli,* nu kɛ hwo to ngɛ nga a nɔ.” Enɛ ɔ he ɔ, e gbi mɛ kɛ piɛɛ a nyɛmimɛ ɔmɛ a he. 9 Ishmael sake nyumu ɔmɛ tsuo nɛ e gbe mɛ ɔ a gbogboe ɔmɛ kɛ pue nyu si tomi muɔ agbo ɔ mi. Matsɛ Asa ji nɔ nɛ pee muɔ nɛ ɔ ngɛ Israel matsɛ Baasha he je. Muɔ nɛ ɔ lɛ Netania bi Ishmael sake nyumu ɔmɛ nɛ e gbe mɛ ɔ a gbogboe ɔmɛ kɛ wo mi ɔ nɛ.

10 Ishmael nuu ma a mi bi ɔmɛ tsuo nɛ a piɛ ngɛ Mizpa a nyɔguɛ, mɛ ji matsɛ biyi ɔmɛ kɛ nihi tsuo nɛ a piɛ ngɛ Mizpa nɛ́ Nebuzaradan, nɛ ji buli ɔmɛ a nya dalɔ ɔ ngɔ mɛ kɛ wo Ahikam bi Gedalia dɛ ɔ. Netania bi Ishmael nuu mɛ nyɔguɛ nɛ e kɛ mɛ po mi kɛ ho Ammonbi ɔmɛ a ngɔ ya.

11 Benɛ Karea bi Yohanan kɛ tabo nya dali ɔmɛ tsuo nɛ a kɛ lɛ ngɛ ɔ nu yiwutso níhi tsuo nɛ Netania bi Ishmael pee ɔ, 12 a ngɔ nyumu ɔmɛ tsuo nɛ a kɛ mɛ ho konɛ a kɛ Netania bi Ishmael nɛ ya hwu, nɛ a ya na lɛ ngɛ nyu babauu* ɔ nɛ ngɛ Gibeon ɔ he.

13 Benɛ ni ɔmɛ tsuo nɛ a ngɛ Ishmael ngɔ ɔ na Karea bi Yohanan kɛ tabo nya dali ɔmɛ tsuo nɛ a piɛɛ e he ɔ, a bua jɔ wawɛɛ nitsɛ. 14 Kɛkɛ nɛ ni ɔmɛ tsuo nɛ Ishmael nuu mɛ nyɔguɛ kɛ je Mizpa a kpale a se nɛ a kɛ Karea bi Yohanan je. 15 Se Netania bi Ishmael kɛ e nyumu ɔmɛ a kpɛti nihi kpaanyɔ je Yohanan dɛ nɛ a ho Ammonbi ɔmɛ a ngɔ ya.

16 Karea bi Yohanan kɛ tabo nya dali ɔmɛ tsuo ngɔ ma a mi bi ɔmɛ nɛ a piɛ ngɛ Mizpa a, nɛ ji nihi nɛ a kpɔ̃ mɛ kɛ je Netania bi Ishmael dɛ benɛ e gbe Ahikam bi Gedalia a. A ngɔ nyumu ɔmɛ, tabuli ɔmɛ, yi ɔmɛ, jokuɛwi ɔmɛ kɛ matsɛ we ɔ nikɔtɔma amɛ kɛ kpale kɛ je Gibeon. 17 Lɔ ɔ he ɔ, a ho nɛ a ya to Kimham nibwɔhi a to he ko ngɛ Betlehem kasa nya, nɛ a to a yi mi kaa a ma tsa nɔ kɛ ya Egipt 18 ngɛ Kaldeabi ɔmɛ a he je. Ejakaa a ngɛ mɛ gbeye yee, akɛnɛ Netania bi Ishmael gbe Ahikam bi Gedalia, nɔ nɛ Babilon matsɛ ɔ wo lɛ nya dalɔ ngɛ zugba a nɔ ɔ he je.