Ezekiel
27 Yehowa kɛ mi tu munyu ekohu nɛ e de mi ke: 2 “Nɔmlɔ bi, mo la aywilɛho yemi la kɛ kɔ Tiro he, 3 nɛ o de Tiro ke,
‘Mo nɛ o ngɛ wo ɔ agbo ɔmɛ a nya,
Jua yelɔ nɛ o kɛ nihi nɛ a ngɛ zugba kpɔhi nɛ nyu bɔle mɛ ɔ a nɔ yeɔ jua,
Nɔ́ nɛ Nyɔmtsɛ Matsɛ Yehowa de ji nɛ ɔ nɛ:
“Oo Tiro, mo nitsɛ o de ke, ‘Ye he fɛu ɔ ye mluku.’
4 O zugba kpɔ ɔmɛ ngɛ wo ɔ kpɛti tɔɔ,
Nihi nɛ a fia mo kɛ ma si ɔ ha nɛ o he fɛu ɔ ye mluku.
5 A kɛ junipa tsohi nɛ je Senir lɛ pee o mele ɔ he ní ɔmɛ,
Nɛ a ngɔ seda tsohi kɛ je Lebanon kɛ pee mele mi abalaa tso ɔ.
6 A kɛ Bashan oak tsohi lɛ pee o we akɔfa amɛ,
A ngɔ suɔ wu kɛ dla sipro tsohi nɛ a kɛ je Kitim zugba kpɔhi nɛ nyu bɔle mɛ ɔ a nɔ ɔ he, nɛ a kɛ pee o lɛ ɔ hɛ mi blɔ.
7 Egipt klala nɛ hɛɛ kɔla slɔɔtohi nɛ a kɛ pee o we abalaa a,
Nɛ kpa bluu kɛ lohwe he bwɔmi nɛ hɛɛ alamua tu su* nɛ je Elishah zugba kpɔ nɛ nyu bɔle lɛ ɔ nɔ lɛ a kɛ pee o nɔ hami nɔ́ ɔ.
8 Nihi nɛ a ngɛ Sidon kɛ Arvad ji o we akɔfa hluili ɔmɛ.
Tiro, mo nitsɛ o nihi nɛ́ a le nguɛ nya ní tsumi lɛ a tsuɔ ní ngɛ o mele ɔ mi.
9 Gebal nyumuhi nɛ́ a he be* nɛ́ a le nguɛ nya ní tsumi ɔ lɛ a tsi puɔhi nɛ a ngɛ o mele ɔ he ɔ.
Melehi tsuo nɛ a ngɛ wo ɔ nɔ kɛ nihi nɛ a kudɔ ɔ mɛ ɔ tsuo ba nɛ a kɛ mo ba ye jua.
10 Persia, Lud kɛ Put nyumu ɔmɛ piɛɛ o tabuli nɛ a yaa ta a, a he.
A kɛ a tsɛ̃i ɔmɛ kɛ a dade pɛɛ ɔmɛ kplaa si ngɛ o mi, nɛ a haa nɛ o hɛ mi baa nyami.
11 Arvad nyumuhi nɛ a piɛɛ o tabuli ɔmɛ a he ɔ daa si ngɛ o gbogbo ɔmɛ a nɔ tsuo kɛ kpe,
Nɛ nyumu katsɛmɛ hii si ngɛ o mɔ ɔmɛ a nɔ.
A kɛ a tsɛ̃i lokotoo ɔmɛ kpla si ngɛ o gbogbo ɔmɛ a he tsuo kɛ kpe
Nɛ a haa nɛ o he fɛu ɔ jeɔ kpo.
12 “‘“Tarshish kɛ mo yeɔ jua ngɛ o ní nami babauu ɔ he je. A kɛ sika hiɔ, dade, sanyla kɛ sumui ba tsakeɔ níhi nɛ o ngɛ ɔ. 13 Yavan, Tubal kɛ Meshek kɛ mo yeɔ jua, a kɛ nyɔguɛhi kɛ akɔblee níhi ba tsakeɔ o jua yemi ní ɔmɛ. 14 Togarma we ɔ ngɔɔ okpɔngɔhi kɛ teji okpɔngɔhi kɛ ba tsakeɔ níhi nɛ o ngɛ ɔ. 15 Dedanbi ɔmɛ kɛ mo yeɔ jua; o ngɔ nihi nɛ́ a yeɔ jua nɛ a tsu ní ha mo ngɛ zugba kpɔhi nɛ nyu bɔle mɛ babauu ɔ a nɔ; a kɛ suɔ wu kɛ tɛ tso* ba haa mo kaa nike ní. 16 Akɛnɛ o ngɛ níhi babauu he je ɔ, Edom suɔ kaa e kɛ mo maa ye jua. A ngɔɔ tɛkuɔis, lohwe he bwɔmi nɛ hɛɛ alamua tu su, bo nɛ́ a kɛ kɔla slɔɔtohi lo níhi kɛ wo mi, bo kpakpa, kora tɛ kɛ rubi kɛ ba tsakeɔ níhi nɛ o ngɛ ɔ.
17 “‘“Yuda kɛ Israel zugba a kɛ mo yeɔ jua, nɛ a ngɔɔ hwiit nɛ a kɛ je Minit, niye ní kpakpahi, hwo, nu kɛ balsam kɛ baa konɛ a kɛ ba tsake níhi nɛ o ngɛ ɔ.
18 “‘“Níhi babauu nɛ o ngɛ kɛ o ní nami ɔ he je ɔ, Damasko kɛ mo yeɔ jua, e ba juaa Helbon wai kɛ lohwe he bwɔmi nɛ́ a kɛ je Sahar* kɛ haa mo. 19 Vedan kɛ Yavan nɛ́ a je Uzal ɔ ngɔɔ dadehi, kasia* kɛ glã* kɛ ba tsakeɔ níhi nɛ o ngɛ ɔ. 20 Dedan ngɔ okpɔngɔ nɔ himi bohi* kɛ ba tsake níhi nɛ o ngɛ ɔ. 21 O ngɔ Arabiabi ɔmɛ kɛ Kedar ganɔ ɔmɛ tsuo nɛ ji nihi nɛ a juaa jijɔ bihi kɛ agbosuhi kɛ apletsihi ɔ kaa a tsu ní ha mo. 22 Sheba kɛ Raama jua yeli ɔmɛ kɛ mo ye jua; a ngɔ tsopa kɛ he via kpakpahi, tɛhi nɛ a he jua wa kɛ sika tsu kɛ ba tsake níhi nɛ o ngɛ ɔ. 23 Haran, Kane, Eden, Sheba jua yeli ɔmɛ, Asshur kɛ Kilmad kɛ mo ye jua. 24 O jua yemi he ɔ ji he nɛ a kɛ mo ye ní nɛ ɔmɛ a he jua ngɛ; tade kpakpahi, tade klɔii nɛ a kɛ bo bluu lɛ pee nɛ́ a kɛ kɔla slɔɔtohi lo níhi kɛ wo mi, kɛ kapɛtihi nɛ hɛɛ kɔla slɔɔtohi, nɛ́ a kɛ kpa fĩ mɛ tsuo wawɛɛ.
25 Tarshish mele ɔmɛ a mi lɛ a kɛ o jua yemi ní ɔmɛ woɔ,
Lɔ ɔ he ɔ, o ná ní kpɔtɔɔ* ngɛ wo ɔ kpɛti.
26 O lɛ hluili ɔmɛ ngɔ mo kɛ ba wo nɛ pee hamahama a nɔ;
Puje he kɔɔhiɔ ɔ butu mo ngɛ wo ɔ kpɛti.
27 Ligbi ɔ nɛ o maa nɔ si ɔ, o ní nami ɔ, níhi nɛ o ngɛ ɔ, o jua yemi níhi, o mele kudɔli ɔmɛ kɛ nihi nɛ a tsuɔ ní ngɛ o mele ɔ mi,
Nihi nɛ a tsiɔ puɔhi ngɛ o mele ɔ mi, o jua yeli ɔmɛ kɛ nyumuhi nɛ a hwuɔ ta a tsuo,
Nihi tsuo* nɛ a ngɛ o mi ɔ
Ma mu ngɛ wo ɔ kpɛti.
28 Ke nihi nɛ a tsuɔ ní ngɛ mele ɔ mi ɔ kpa ngmlaa a, wo nya ma amɛ ma hoso.
29 Nihi nɛ a hɛɛ akɔfa, mele kudɔli kɛ nihi nɛ a tsuɔ ní ngɛ wo ɔ nɔ ɔ
Ma kple si kɛ je a mele ɔmɛ a mi kɛ ya da si ngɛ zugba a nɔ.
30 A ma wo a gbi nɔ nɛ a ma fo ya boboobo kɛ ha mo
Nɛ a maa muɔɔ bunyuku kɛ pue a yi mi nɛ a ma wuwlua si ngɛ lazu mi.
31 A maa sɛ a yi kpalokpalo nɛ a maa ha kpekpe;
A kɛ aywilɛho yemi nɛ nya wa* ma fo ya wawɛɛ ha mo.
32 Ke a ngɛ kɔmɔ yee ɔ, a ma la aywilɛho yemi la nɛ a ma fo ya kɛ ha mo nɛ a ma de ke:
‘Mɛnɔ ngɛ kaa Tiro nɛ́ amlɔ nɛ ɔ, e pee dii ngɛ wo ɔ kpɛti ɔ?
33 Benɛ o ní ɔmɛ je wo ɔ nɔ kɛ ba a, o ha nɛ nihi babauu tɔ.
O ní babauu nɛ o ngɛ kɛ o jua yemi ní ɔmɛ ha nɛ zugba a nɔ matsɛmɛ pee niatsɛmɛ.
34 Amlɔ nɛ ɔ, o butu ngɛ wo ɔ nɔ, ngɛ nyu nɛ mi kuɔ ɔ mi,
Nɛ o jua yemi ní ɔmɛ kɛ o ni ɔmɛ tsuo mu kɛ piɛɛ o he.
35 Nihi tsuo nɛ a ngɛ zugba kpɔhi nɛ nyu bɔle mɛ ɔ a nɔ ɔ maa hyɛ mo too nɛ a nya maa kpɛ a he,
Nɛ gbeye ma ha nɛ a matsɛmɛ ɔmɛ a he maa do blibliibli, nɛ a hɛ mi maa pee mɛ yaa.
36 Jua yeli nɛ a ngɛ je ma amɛ a mi ɔ ma kpa nyagba ngɛ nɔ́ nɛ ba o nɔ ɔ he.
O nyagbe maa ba tlukaa nɛ e maa pee gbeye,
Nɛ o maa laa gbidigbidi kɛ ya neneene.’”’”