Ezekiel

35 Yehowa kɛ mi tu munyu ekohu nɛ e de mi ke: 2 “Nɔmlɔ bi, mo plɛ o hɛ mi kɛ tsɔɔ Seir yoku ɔmɛ nɛ o gba kɛ si mɛ. 3 Mo de mɛ ke, ‘Nɔ́ nɛ Nyɔmtsɛ Matsɛ Yehowa de ji nɛ ɔ nɛ: “Seir yokuhi, i kɛ nyɛ ná, ma kpa ye nine mi ngɛ nyɛ nɔ nɛ ma pee nyɛ ma doku. 4 Ma kpata nyɛ ma amɛ a hɛ mi, nɛ nyɛ maa pee ma doku; nɛ nyɛ ma ná maa le kaa imi ji Yehowa. 5 Ejakaa nyɛ nyɛ Israel wawɛɛ, nɛ nyɛɛ kɛ mɛ wo klaate ɔ dɛ ngɛ a haomi be ɔ mi, ngɛ a nyagbe tue gblami be ɔ mi.

6 “Nɔ́ nɛ Nyɔmtsɛ Matsɛ Yehowa de ji nɛ ɔ nɛ, ‘be abɔ nɛ i ngɛ wami mi nɛ ɔ, ma dla nyɛ kɛ ha muɔ si puemi, nɛ muɔ si puemi maa nyɛɛ nyɛ se. Akɛnɛ nyɛ nyɛ muɔ he je ɔ, muɔ si puemi maa nyɛɛ nyɛ se. 7 Ma ha nɛ Seir yoku ɔmɛ maa pee ma doku, nɛ nɔ fɛɛ nɔ nɛ beɔ kɛ yaa kɛ nɔ fɛɛ nɔ nɛ kpaleɔ kɛ beɔ ngɛ nɔ ɔ, ma po lɛ kɛ fɔ he. 8 Ma ha nɛ nyɛ yoku ɔmɛ a nɔ ma hyi tɔ kɛ gbogboehi; nɛ nihi nɛ a kɛ klaate gbe mɛ ɔ maa hiɛ ngɛ nyɛ kpongu ɔmɛ a nɔ, nyɛ dɔgba amɛ, kɛ nyɛ pa amɛ tsuo a mi. 9 Ma ha nɛ nyɛ maa pee ma doku kɛ ya neneene, nɛ nyɛ ma amɛ maa fɔ si gu; nɛ nyɛ ma ná maa le kaa imi ji Yehowa.’

10 “E ngɛ mi kaa Yehowa nitsɛ ngɛ a kpɛti mohu lɛɛ, se nyɛ de ke, ‘Ma enyɔ nɛ ɔmɛ kɛ zugba enyɔ nɛ ɔmɛ ma ba pee wa nɔ́, nɛ wa maa ngɔ enyɔ ɔmɛ tsuo.’ 11 Enɛ ɔ he ɔ, nɔ́ nɛ Nyɔmtsɛ Matsɛ Yehowa de ji nɛ ɔ nɛ, ‘be abɔ nɛ i ngɛ wami mi nɛ ɔ, akɛnɛ ninyɛ he je ɔ, nyɛ mi mi fu mɛ nɛ nyɛ hɛdɔ kɛ wo mɛ he je ɔ, imi hu i kɛ nyɛ maa ye jã nɔuu; nɛ ke i kojo nyɛ ɔ, ma ha nɛ a maa le mi. 12 Kɛkɛ ɔ, nyɛ ma ná maa le kaa imi Yehowa nitsɛ, i nu nɔ buimi munyuhi nɛ nyɛ tu kɛ si Israel yoku ɔmɛ, benɛ nyɛ de ke, “A pee ma dokuhi nɛ a kɛ mɛ ha wɔ kaa niye ní” ɔ. 13 Nyɛɛ kɛ he nɔ womi tu munyu kɛ si mi, nɛ nyɛ tu munyuhi fuu kɛ si mi. I nu lɛ tsuo.’

14 “Nɔ́ nɛ Nyɔmtsɛ Matsɛ Yehowa de ji nɛ ɔ nɛ: ‘Ke i pee nyɛ ma doku ɔ, zugba a tsuo ma nya. 15 Kaa bɔ nɛ nyɛ nya benɛ Israel we ɔ weto ní ɔ pee ma doku ɔ, jã nɔuu lɛ ma pee nyɛ. Oo Seir yokuhi, ee, nyɛ Edom tsuo, nyɛ maa pee ma doku; nɛ a ma ná le kaa imi ji Yehowa.’”